च॒न्द्रमा॒ वा अ॑कामयत । अ॒हो॒रा॒त्रा-न॑र्द्धमा॒सान्-मासा॑-नृ॒तून्थ्- स॑म्ॅवथ्स॒र-मा॒प्त्वा । च॒न्द्रम॑सः॒ सायु॑ज्यꣳ सलो॒कता॑-माप्नुया॒मिति॑ । स ए॒तं च॒न्द्रम॑से प्रती॒दृश्या॑यै पुरो॒डाशं॒ पञ्च॑दशकपालं॒ निर॑वपत् । ततो॒ वै सो॑ऽहोरा॒त्रा-न॑र्द्धमा॒सान्-मासा॑-नृ॒तून्थ्-स॑म्ॅवथ्स॒र-मा॒प्त्वा । च॒न्द्रम॑सः॒ सायु॑ज्यꣳ सलो॒कता॑माप्नोत् । अ॒हो॒रा॒त्रान्. ह॒ वा अ॑र्द्धमा॒सान् मासा॑न्-ऋ॒तून्थ्-स॑म्ॅवथ्स॒र-मा॒प्त्वा । च॒न्द्रम॑सः॒ सायु॑ज्यꣳ सलो॒कता॑माप्नोति । य ए॒तेन॑ ह॒विषा॒ यज॑ते । य उ॑ चैनदे॒वं ॅवेद॑ । सोऽत्र॑ जुहोति । च॒न्द्रम॑से॒ स्वाहा᳚ प्रती॒दृश्या॑यै॒ स्वाहा᳚ । अ॒हो॒रा॒त्रेभ्यः॒ स्वाहा᳚ ऽर्द्धमा॒सेभ्यः॒ स्वाहा᳚ । मासे᳚भ्यः॒ स्वाह॒र्तुभ्यः॒ स्वाहा᳚ । स॒म्ॅव॒थ्स॒राय॒ स्वाहेति॑ ।

अ॒हो॒रा॒त्रे वा अ॑कामयेताम् । अत्य॑होरा॒त्रे मु॑च्येवहि । न ना॑वहोरा॒त्रे आ᳚प्नुयाता॒मिति॑ । ते ए॒तम॑हो-रा॒त्राभ्यां᳚ च॒रुं निर॑वपताम् । द्व॒यानां᳚ ॅव्रीही॒णाम् । शु॒क्लानां᳚ च कृ॒ष्णानां᳚ च । स॒वा॒त्योर्दु॒ग्धे । श्वे॒तायै॑ च कृ॒ष्णायै॑ च । ततो॒ वै ते अत्य॑होरा॒त्रे अ॑मुच्येते । नैने॑ अहोरा॒त्रे आ᳚प्नुताम् । अति॑ ह॒ वा अ॑होरा॒त्रे मु॑च्यते । नैन॑महोरा॒त्रे आ᳚प्नुतः । य ए॒तेन॑ ह॒विषा॒ यज॑ते । य उ॑ चैनदे॒वंॅवेद॑ । सोऽत्र॑ जुहोति । अह्ने॒ स्वाहा॒ रात्रि॑यै॒ स्वाहा᳚ । अति॑मुक्त्यै॒ स्वाहेति॑ ।

उ॒षा वा अ॑कामयत । प्रि॒या ऽऽदि॒त्यस्य॑ सु॒भगा᳚ स्या॒मिति॑ । सैतमु॒षसे॑ च॒रुं निर॑वपत् । ततो॒ वै सा प्रि॒या ऽऽदि॒त्यस्य॑ सु॒भगा॑ ऽभवत् । प्रि॒यो ह॒ वै स॑मा॒नानाꣳ॑ सु॒भगो॑ भवति । य ए॒तेन॑ ह॒विषा॒ यज॑ते । य उ॑ चैनदे॒वं ॅवेद॑ । सोऽत्र॑ जुहोति । उ॒षसे॒ स्वाहा॒ व्यु॑ष्ट्यै॒ स्वाहा᳚ । व्यू॒षुष्यै॒ स्वाहा᳚ व्यु॒च्छन्त्यै॒ स्वाहा᳚ । व्यु॑ष्टायै॒ स्वाहेति॑ ।

अथै॒तस्मै॒ नक्ष॑त्राय च॒रुं निर्व॑पति । यथा॒ त्वं दे॒वाना॒मसि॑ । ए॒वम॒हं म॑नु॒ष्या॑णां भूयास॒मिति॑ । यथा॑ ह॒ वा ए॒तद्-दे॒वाना᳚म् । ए॒वꣳ ह॒ वा ए॒ष म॑नु॒ष्या॑णां भवति । य ए॒तेन॑ ह॒विषा॒ यज॑ते । य उ॑ चैनदे॒वं ॅवेद॑ । सोऽत्र॑ जुहोति । नक्ष॑त्राय॒ स्वाहो॑देष्य॒ते स्वाहा᳚ । उ॒द्य॒ते स्वाहोदि॑ताय॒ स्वाहा᳚ । हर॑से॒ स्वाहा॒ भर॑से॒ स्वाहा᳚ । भ्राज॑से॒ स्वाहा॒ तेज॑से॒ स्वाहा᳚ । तप॑से॒ स्वाहा᳚ ब्रह्मवर्च॒साय॒ स्वाहेति॑ ।

सूर्यो॒ वा अ॑कामयत । नक्ष॑त्राणां प्रति॒ष्ठा स्या॒मिति॑ । स ए॒तꣳ सूर्या॑य॒ नक्ष॑त्रेभ्यश्च॒रुं निर॑वपत् । ततो॒ वै स नक्ष॑त्राणां प्रति॒ष्ठा ऽभ॑वत् । प्र॒ति॒ष्ठा ह॒ वै स॑मा॒नानां᳚ भवति । य ए॒तेन॑ ह॒विषा॒ यज॑ते । य उ॑ चैनदे॒वं ॅवेद॑ । सोऽत्र॑ जुहोति । सूर्या॑य॒ स्वाहा॒ नक्ष॑त्रेभ्यः॒ स्वाहा᳚ । प्र॒ति॒ष्ठायै॒ स्वाहेति॑ ।

अथै॒तमदि॑त्यै च॒रुं निर्व॑पति । इ॒यं ॅवा अदि॑तिः । अ॒स्यामे॒व प्रति॑ तिष्ठति । सोऽत्र॑ जुहोति । अदि॑त्यै॒ स्वाहा᳚ प्रति॒ष्ठायै॒ स्वाहेति॑ ।

अथै॒तं ॅविष्ण॑वे च॒रुं निर्व॑पति । य॒ज्ञो वै विष्णुः॑ । य॒ज्ञ् ए॒वान्त॒तः प्रति॑ तिष्ठति । सोऽत्र॑ जुहोति । विष्ण॑वे॒ स्वाहा॑ य॒ज्ञाय॒ स्वाहा᳚ । प्र॒ति॒ष्ठायै॒ स्वाहेति॑ ।