स प्र॑त्न॒वन्नवी॑यसा । अग्ने᳚ द्यु॒म्नेन॑ स॒म्ॅयता᳚ । बृ॒हत् ततन्थ भा॒नुना᳚ ॥ नवं॒ नु स्तोम॑म॒ग्नये᳚ । दि॒वः श्ये॒नाय॑ जीजनम् । वसोः᳚ कु॒विद्व॒नाति॑ नः ॥ स्वा॒रु॒हा यस्य॒ श्रियो॑ दृ॒शे । र॒यिर्वी॒रव॑तो यथा । अग्रे॑ य॒ज्ञ्स्य॒ चेत॑तः ॥ अदा᳚भ्यः पुर ए॒ता

अ॒ग्निर्वि॒शां मानु॑षीणाम् । तूर्णी॒ रथः॒ सदा॒ नवः॑ ॥ नवꣳ॒॒ सोमा॑य वा॒जिने᳚ । आज्यं॒ पय॑सोऽजनि । जुष्टꣳ॒॒ शुचि॑तमं॒ ॅवसु॑ ॥ नवꣳ॑ सोम जुषस्व नः । पी॒यूष॑स्ये॒ह तृ॑प्णुहि । यस्ते॑ भा॒ग ऋ॒ताव॒यम् ॥ नव॑स्य सोम ते व॒यम् । आ सु॑म॒तिं ॅवृ॑णीमहे

स नो॑ रास्व सह॒स्रिणः॑ ॥ नवꣳ॑ ह॒विर्जु॑षस्व नः । ऋ॒तुभिः॑ सोम॒ भूत॑मम् । तद॒ङ्ग प्रति॑हर्य नः । राजन᳚थ् सोम स्व॒स्तये᳚ ॥ नवꣳ॒॒ स्तोमं॒ नवꣳ॑ ह॒विः । इ॒न्द्रा॒ग्निभ्यां॒ निवे॑दय । तज्जु॑षेताꣳ॒॒ सचे॑तसा ॥ शुचिं॒ नु स्तोमं॒ नव॑जातम॒द्य । इन्द्रा᳚ग्नी वृत्रहणा जु॒षेथा᳚म्

उ॒भा हि वाꣳ॑ सु॒हवा॒ जोह॑वीमि । ता वाजꣳ॑ स॒द्य उ॑श॒ते धेष्ठा᳚ ॥ अ॒ग्निरिन्द्रो॒ नव॑स्य नः । अ॒स्य ह॒व्यस्य॑ तृप्यताम् । इ॒ह दे॒वौ स॑ह॒स्रिणौ᳚ ॥ य॒ज्ञ्ं न॒ आ हि गच्छ॑ताम् । वसु॑मन्तꣳ सुव॒र्विद᳚म् । अ॒स्य ह॒व्यस्य॑ तृप्यताम् । अ॒ग्निरिन्द्रो॒ नव॑स्य नः ॥ विश्वा᳚न् दे॒वाꣳ स्त॑र्पयत

ह॒विषो॒ऽस्य नव॑स्य नः । सु॒व॒र्विदो॒ हि ज॑ज्ञि॒रे ॥ एदं ब॒र्॒.हिः सु॒ष्टरी॑मा॒ नवे॑न । अ॒यं ॅय॒ज्ञो यज॑मानस्य भा॒गः । अ॒यं ब॑भूव॒ भुव॑नस्य॒ गर्भः॑ । विश्वे॑ दे॒वा इ॒दम॒द्याग॑मिष्ठाः ॥ इ॒मे नु द्यावा॑पृथि॒वी स॒मीची᳚ । त॒न्वा॒ने य॒ज्ञ्ं पु॑रु॒पेश॑सं धि॒या । आऽस्मै॑ पृणीतां॒ भुव॑नानि॒ विश्वा᳚ । प्र॒जां पुष्टि॑म॒मृतं॒ नवे॑न ।

इ॒मे धे॒नू अ॒मृतं॒ ॅये दु॒हाते᳚ । पय॑स्व-त्युत्त॒रामे॑तु॒ पुष्टिः॑ । इ॒मं ॅय॒ज्ञ्ं जु॒षमा॑णे॒ नवे॑न । स॒मीची॒ द्यावा॑पृथि॒वी घृ॒ताची᳚ ॥ यवि॑ष्ठो हव्य॒वाह॑नः । चि॒त्रभा॑नुर्-घृ॒तासु॑तिः । नव॑जातो॒ विरो॑चसे । अग्ने॒ तत्ते॑ महित्व॒नम् ॥ त्वम॑ग्ने दे॒वता᳚भ्यः । भा॒गे दे॑व॒ न मी॑यसे

स ए॑ना वि॒द्वान्. य॑क्ष्यसि । नवꣳ॒॒ स्तोमं॑ जुषस्व नः ॥ अ॒ग्निः प्र॑थ॒मः प्राश्ना॑तु । स हि वेद॒ यथा॑ ह॒विः । शि॒वा अ॒स्मभ्य॒-मोष॑धीः । कृ॒णोतु॑ वि॒श्वच॑र्.षणिः ॥ भ॒द्रान्नः॒ श्रेयः॒ सम॑नैष्ट देवाः । त्वया॑ऽव॒सेन॒ सम॑शीमहि त्वा । स नो॑ मयो॒भूः पि॑तो॒ आवि॑शस्व । शं तो॒काय॑ त॒नुवे᳚ स्यो॒नः ( ) ॥ ए॒तमु॒ त्यं मधु॑ना॒ सम्ॅयु॑तं॒ ॅयव᳚म् । सर॑स्वत्या॒ अधि॑म॒नाव॑चर्कृषुः । इन्द्र॑ आसी॒थ् सीर॑पतिः श॒तक्र॑तुः । की॒नाशा॑ आसन् म॒रुतः॑ सु॒दान॑वः ।