शं ॅयोर॑र॒पो द॑धात ॥ आऽहं पि॒तॄन्थ् सु॑वि॒दत्राꣳ॑ अविथ्सि॒ नपा॑तं च वि॒क्रम॑णं च॒ विष्णोः᳚ । ब॒र्॒.हि॒षदो॒ ये स्व॒धया॑ सु॒तस्य॒ भज॑न्त पि॒त्वस्त इ॒हाऽऽ ग॑मिष्ठाः ॥ उप॑हूताः पि॒तरः॑ सो॒म्यासो॑ बर्.हि॒ष्ये॑षु नि॒धिषु॑ प्रि॒येषु॑ । त आ ग॑मन्तु॒ त इ॒ह श्रु॑व॒न्त्वधि॑ ब्रुवन्तु॒ ते अ॑वन्त्व॒स्मान् ॥ उदी॑रता॒मव॑र॒ उत् परा॑स॒ उन्म॑द्ध्य॒माः पि॒तरः॑ सो॒म्यासः॑ । असुं॒ - [ ]
पदपाठः (Word-by-word)
शम् । योः । अ॒र॒पः । द॒धा॒त॒ ॥ एति॑ । अ॒हम् । पि॒तॄन् । सु॒वि॒दत्रा॒निति॑ सु - वि॒दत्रान्॑ । अ॒वि॒थ्सि॒ । नपा॑तम् । च॒ । वि॒क्रम॑ण॒मिति॑ वि - क्रम॑णम् । च॒ । विष्णोः᳚ ॥ ब॒र्॒.हि॒षद॒ इति॑ बर्.हि - सदः॑ । ये । स्व॒धयेति॑ स्व - धया᳚ । सु॒तस्य॑ । भज॑न्त । पि॒त्वः । ते । इ॒ह । आग॑मिष्ठा॒ इत्या - ग॒मि॒ष्ठाः॒ ॥ उप॑हूता॒ इत्युप॑ - हू॒ताः॒ । पि॒तरः॑ । सो॒म्यासः॑ । ब॒र्॒.हि॒ष्ये॑षु । नि॒धिष्विति॑ नि-धिषु॑ । प्रि॒येषु॑ ॥ ते । एति॑ । ग॒म॒न्तु॒ । ते । इ॒ह । श्रु॒व॒न्तु॒ । अधीति॑ । ब्रु॒व॒न्तु॒ । ते । अ॒व॒न्तु॒ । अ॒स्मान् ॥ उदिति॑ । ई॒र॒ता॒म् । अव॑रे । उदिति॑ । परा॑सः । उदिति॑ । म॒द्ध्य॒माः । पि॒तरः॑ । सो॒म्यासः॑ ॥ असु᳚म् ।