उ॒क्थं ॅवा॒चीन्द्रा॒येत्या॑ह तृतीयसव॒नं प्र॑ति॒गीर्य॑ स॒प्तैतान्य॒क्षरा॑णि स॒प्तप॑दा॒ शक्व॑री शाक्व॒रो वज्रो॒ वज्रे॑णै॒व तृ॑तीयसव॒ने वज्र॑म॒न्तर्द्ध॑त्ते ब्रह्मवा॒दिनो॑ वदन्ति॒ स त्वा अ॑द्ध्व॒र्युः स्या॒द्यो य॑थासव॒नं प्र॑तिग॒रे छन्दाꣳ॑सि सम्पा॒दये॒त् तेजः॑ प्रातः सव॒न आ॒त्मन् दधी॑तेन्द्रि॒यं माद्ध्य॑न्दिने॒ सव॑ने प॒शूꣳ स्तृ॑तीयसव॒न इत्युक्थ॑शा॒ इत्या॑ह प्रातस्सव॒नं प्र॑ति॒गीर्य॒ त्रीण्ये॒तान्य॒क्षरा॑णि - [ ]
पदपाठः (Word-by-word)
उ॒क्थम् । वा॒चि । इन्द्रा॑य । इति॑ । आ॒ह॒ । तृ॒ती॒य॒स॒व॒नमिति॑ तृतीय -स॒व॒नम् । प्र॒ति॒गीर्येति॑ प्रति - गीर्य॑ । स॒प्त । ए॒तानि॑ । अ॒क्षरा॑णि । स॒प्तप॒देति॑ स॒प्त - प॒दा॒ । शक्व॑री । शा॒क्व॒रः । वज्रः॑ । वज्रे॑ण । ए॒व । तृ॒ती॒य॒स॒व॒न इति॑ तृतीय - स॒व॒ने । वज्र᳚म् । अ॒न्तः । ध॒त्ते॒ । ब्र॒ह्म॒वा॒दिन॒ इति॑ ब्रह्म - वा॒दिनः॑ । व॒द॒न्ति॒ । सः । तु । वै । अ॒ध्व॒र्युः । स्या॒त् । यः । य॒था॒स॒व॒नमिति॑ यथा - स॒व॒नम् । प्र॒ति॒ग॒र इति॑ प्रति - ग॒रे । छन्दाꣳ॑सि । स॒पां॒दये॒दिति॑ सं - पा॒दये᳚त् । तेजः॑ । प्रा॒त॒स्स॒व॒न इति॑ प्रातः - स॒व॒ने । आ॒त्मन्न् । दधी॑त । इ॒न्द्रि॒यम् । माध्य॑न्दिने । सव॑ने । प॒शून् । तृ॒ती॒य॒स॒व॒न इति॑ तृतीय - स॒व॒ने । इति॑ । उक्थ॑शा॒ इत्युक्थ॑ - शाः॒ । इति॑ । आ॒ह॒ । प्रा॒त॒स्स॒व॒नमिति॑ प्रातः - स॒व॒नम् । प्र॒ति॒गीर्येति॑ प्रति - गीर्य॑ । त्रीणि॑ । ए॒तानि॑ । अ॒क्षरा॑णि ।