भि॒षजा॒विति॒ तस्मा᳚द् ब्राह्म॒णेन॑ भेष॒जं न का॒र्य॑मपू॑तो॒ ह्ये᳚(1॒)षो॑ ऽमे॒द्ध्यो यो भि॒षक्तौ ब॑हिष्पवमा॒नेन॑ पवयि॒त्वा ताभ्या॑-मे॒तमा᳚श्वि॒न-म॑गृह्ण॒न् तस्मा᳚द् बहिष्पवमा॒ने स्तु॒त आ᳚श्वि॒नो गृ॑ह्यते॒ तस्मा॑दे॒वं ॅवि॒दुषा॑ बहिष्पवमा॒न उ॑प॒सद्यः॑ प॒वित्रं॒ ॅवै ब॑हिष्पवमा॒न आ॒त्मान॑मे॒व प॑वयते॒ तयो᳚ऽस्त्रे॒धा भैष॑ज्यं॒ ॅवि न्य॑दधुर॒ग्नौ तृती॑यम॒फ्सु तृती॑यं ब्राह्म॒णे तृती॑यं॒ तस्मा॑दुदपा॒त्र- [ ]
पदपाठः (Word-by-word)
भि॒षजौ᳚ । इति॑ । तस्मा᳚त् । ब्रा॒ह्म॒णेन॑ । भे॒ष॒जम् । न । का॒र्य᳚म् । अपू॑तः । हि । ए॒षः । अ॒मे॒द्ध्यः । यः । भि॒षक् । तौ । ब॒हि॒ष्प॒व॒मा॒नेनेति॑ बहिः - प॒व॒मा॒नेन॑ । प॒व॒यि॒त्वा । ताभ्या᳚म् । ए॒तम् । आ॒श्वि॒नम् । अ॒गृ॒ह्ण॒न्न् । तस्मा᳚त् । ब॒हि॒ष्प॒व॒मा॒न इति॑ बहिः-प॒व॒मा॒ने । स्तु॒ते । आ॒श्वि॒नः । गृ॒ह्य॒ते॒ । तस्मा᳚त् । ए॒वम् । वि॒दुषा᳚ । ब॒हि॒ष्प॒व॒मा॒न इति॑ बहिः - प॒व॒मा॒नः । उ॒प॒सद्य॒ इत्यु॑प - सद्यः॑ । प॒वित्र᳚म् । वै । ब॒हि॒ष्प॒व॒मा॒न इति॑ बहिः - प॒व॒मा॒नः । आ॒त्मान᳚म् । ए॒व । प॒व॒य॒ते॒ । तयोः᳚ । त्रे॒धा । भैष॑ज्यम् । वि । नीति॑ । अ॒द॒धुः॒ । अ॒ग्नौ । तृती॑यम् । अ॒फ्स्वित्य॑प्-सु । तृती॑यम् । ब्रा॒ह्म॒णे । तृती॑यम् । तस्मा᳚त् । उ॒द॒पा॒त्रमित्यु॑द - पा॒त्रम् ।