नमः॑ । ते॒ । रु॒द्र॒ । म॒न्यवे᳚ । उ॒तो इति॑ । ते॒ । इष॑वे । नमः॑ ॥ नमः॑ । ते॒ । अ॒स्तु॒ । धन्व॑ने । बा॒हुभ्या॒मिति॑ बा॒हु-भ्या॒म् । उ॒त । ते॒ । नमः॑ ॥ या । ते॒ । इषुः॑ । शि॒वत॒मेति॑ शि॒व - त॒मा॒ । शि॒वम् । ब॒भूव॑ । ते॒ । धनुः॑ ॥ शि॒वा । श॒र॒व्या᳚ । या । तव॑ । तया᳚ । नः॒ । रु॒द्र॒ । मृ॒ड॒य॒ ॥ या । ते॒ । रु॒द्र॒ । शि॒वा । त॒नूः । अघो॑रा । अपा॑पकाशि॒नीत्यपा॑प-का॒शि॒नी॒ ॥ तया᳚ । नः॒ । त॒नुवा᳚ । शन्त॑म॒येति॒ शं - त॒म॒या॒ । गिरि॑श॒न्तेति॒ गिरि॑ - श॒न्त॒ । अ॒भीति॑ । चा॒क॒शी॒हि॒ ॥ याम् । इषु᳚म् । गि॒रि॒श॒न्तेति॑ गिरि - श॒न्त॒ । हस्ते᳚ ।

बिभ॑र्.षि । अस्त॑वे ॥ शि॒वाम् । गि॒रि॒त्रेति॑ गिरि - त्र॒ । ताम् । कु॒रु॒ । मा । हिꣳ॒॒सीः॒ । पुरु॑षम् । जग॑त् ॥ शि॒वेन॑ । वच॑सा । त्वा॒ । गिरि॑श । अच्छ॑ । व॒दा॒म॒सि॒ ॥ यथा᳚ । नः॒ । सर्व᳚म् । इत् । जग॑त् । अ॒य॒क्ष्मम् । सु॒मना॒ इति॑ सु - मनाः᳚ । अस॑त् ॥ अधीति॑ । अ॒वो॒च॒त् । अ॒धि॒व॒क्तेत्य॑धि - व॒क्ता । प्र॒थ॒मः । दैव्यः॑ । भि॒षक् ॥ अहीन्॑ । च॒ । सर्वान्॑ । ज॒भंयन्न्॑ । सर्वाः᳚ । च॒ । या॒तु॒धा॒न्य॑ इति॑ यातु - धा॒न्यः॑ ॥ अ॒सौ । यः । ता॒म्रः । अ॒रु॒णः । उ॒त । ब॒भ्रुः । सु॒म॒ङ्गल॒ इति॑ सु - म॒ङ्गलः॑ ॥ ये । च॒ । इ॒माम् । रु॒द्राः । अ॒भितः॑ । दि॒क्षु ।

श्रि॒ताः । स॒ह॒स्र॒श इति॑ सहस्र - शः । अवेति॑ । ए॒षा॒म् । हेडः॑ । ई॒म॒हे॒ ॥ अ॒सौ । यः । अ॒व॒सर्प॒तीत्य॑व - सर्प॑ति । नील॑ग्रीव॒ इति॒ नील॑ - ग्री॒वः॒ । विलो॑हित॒ इति॒ वि - लो॒हि॒तः॒ ॥ उ॒त । ए॒न॒म् । गो॒पा इति॑ गो - पाः । अ॒दृ॒श॒न्न् । अदृ॑शन्न् । उ॒द॒हा॒र्य॑ इत्युद॑-हा॒र्यः॑ ॥ उ॒त । ए॒न॒म् । विश्वा᳚ । भू॒तानि॑ । सः । दृ॒ष्टः । मृ॒ड॒या॒ति॒ । नः॒ ॥ नमः॑ । अ॒स्तु॒ । नील॑ग्रीवा॒येति॒ नील॑ - ग्री॒वा॒य॒ । स॒ह॒स्रा॒क्षायेति॑ सहस्र - अ॒क्षाय॑ । मी॒ढुषे᳚ ॥ अथो॒ इति॑ । ये । अ॒स्य॒ । सत्वा॑नः । अ॒हम् । तेभ्यः॑ । अ॒क॒र॒म् । नमः॑ ॥ प्रेति॑ । मु॒ञ्च॒ । धन्व॑नः । त्वम् । उ॒भयोः᳚ । आर्त्नि॑योः । ज्याम् ॥ याः । च॒ । ते॒ । हस्ते᳚ । इष॑वः ।

परेति॑ । ताः । भ॒ग॒व॒ इति॑ भग - वः॒ । व॒प॒ ॥ अ॒व॒तत्येत्य॑व - तत्य॑ । धनुः॑ । त्वम् । सह॑स्रा॒क्षेति॒ सह॑स्र - अ॒क्ष॒ । शते॑षुध॒ इति॒ शत॑ - इ॒षु॒धे॒ ॥ नि॒शीर्येति॑ नि-शीर्य॑ । श॒ल्याना᳚म् । मुखा᳚ । शि॒वः । नः॒ । सु॒मना॒ इति॑ सु - मनाः᳚ । भ॒व॒ ॥ विज्य॒मिति॒ वि - ज्य॒म् । धनुः॑ । क॒प॒र्दिनः॑ । विश॑ल्य॒ इति॒ वि - श॒ल्यः॒ । बाण॑वानिति॒ बाण॑ - वा॒न् । उ॒त ॥ अने॑शन्न् । अ॒स्य॒ । इष॑वः । आ॒भुः । अ॒स्य॒ । नि॒ष॒ङ्गथिः॑ ॥ या । ते॒ । हे॒तिः । मी॒ढु॒ष्ट॒मेति॑ मीढुः - त॒म॒ । हस्ते᳚ । ब॒भूव॑ । ते॒ । धनुः॑ ॥ तया᳚ । अ॒स्मान् । वि॒श्वतः॑ । त्वम् । अ॒य॒क्ष्मया᳚ । परीति॑ । भु॒ज॒ ॥ नमः॑ । ते॒ । अ॒स्तु॒ । आयु॑धाय । अना॑तता॒येत्यना᳚ - त॒ता॒य॒ । धृ॒ष्णवे᳚ ॥ उ॒भाभ्या᳚म् ( ) । उ॒त । ते॒ । नमः॑ । बा॒हुभ्या॒मिति॑ बा॒हु - भ्या॒म् । तव॑ । धन्व॑ने ॥ परीति॑ । ते॒ । धन्व॑नः । हे॒तिः । अ॒स्मान् । वृ॒ण॒क्तु॒ । वि॒श्वतः॑ ॥ अथो॒ इति॑ । यः । इ॒षु॒धिरिती॑षु-धिः । तव॑ । आ॒रे । अ॒स्मत् । नीति॑ । धे॒हि॒ । तम् ॥

नमः॑ । हिर॑ण्यबाहव॒ इति॒ हिर॑ण्य - बा॒ह॒वे॒ । से॒ना॒न्य॑ इति॑ सेना - न्ये᳚ । दि॒शाम् । च॒ । पत॑ये । नमः॑ । नमः॑ । वृ॒क्षेभ्यः॑ । हरि॑केशेभ्य॒ इति॒ हरि॑ - के॒शे॒भ्यः॒ । प॒शू॒नाम् । पत॑ये । नमः॑ । नमः॑ । स॒स्पिञ्ज॑राय । त्विषी॑मत॒ इति॒ त्विषि॑ - म॒ते॒ । प॒थी॒नाम् । पत॑ये । नमः॑ । नमः॑ । ब॒भ्लु॒शाय॑ । वि॒व्या॒धिन॒ इति॑ वि - व्या॒धिने᳚ । अन्ना॑नाम् । पत॑ये । नमः॑ । नमः॑ । हरि॑केशा॒येति॒ हरि॑ - के॒शा॒य॒ । उ॒प॒वी॒तिन॒ इत्यु॑प - वी॒तिने᳚ । पु॒ष्टाना᳚म् । पत॑ये । नमः॑ । नमः॑ । भ॒वस्य॑ । हे॒त्यै । जग॑ताम् । पत॑ये । नमः॑ । नमः॑ । रु॒द्राय॑ । आ॒त॒ता॒विन॒ इत्या᳚ - त॒ता॒विने᳚ । क्षेत्रा॑णाम् । पत॑ये । नमः॑ । नमः॑ । सू॒ताय॑ । अह॑न्त्याय । वना॑नाम् । पत॑ये । नमः॑ । नमः॑ ।

रोहि॑ताय । स्थ॒पत॑ये । वृ॒क्षाणा᳚म् । पत॑ये । नमः॑ । नमः॑ । म॒न्त्रिणे᳚ । वा॒णि॒जाय॑ । कक्षा॑णाम् । पत॑ये । नमः॑ । नमः॑ । भु॒व॒न्तये᳚ । वा॒रि॒व॒स्कृ॒तायेति॑ वारिवः - कृ॒ताय॑ । ओष॑धीनाम् । पत॑ये । नमः॑ । नमः॑ । उ॒च्चैर्घो॑षा॒येत्यु॒च्चैः - घो॒षा॒य॒ । आ॒क्र॒न्दय॑त॒ इत्या᳚-क्र॒न्दय॑ते । प॒त्ती॒नाम् । पत॑ये । नमः॑ । नमः॑ । कृ॒थ्स्न॒वी॒तायेति॑ कृथ्स्न-वी॒ताय॑ । धाव॑ते । सत्त्व॑नाम् । पत॑ये । नमः॑ ॥

नमः॑ । सह॑मानाय । नि॒व्या॒धिन॒ इति॑ नि - व्या॒धिने᳚ । आ॒व्या॒धिनी॑ना॒मित्या᳚ - व्या॒धिनी॑नाम् । पत॑ये । नमः॑ । नमः॑ । क॒कु॒भाय॑ । नि॒ष॒ङ्गिण॒ इति॑ नि-स॒ङ्गिने᳚ । स्ते॒नाना᳚म् । पत॑ये । नमः॑ । नमः॑ । नि॒ष॒ङ्गिण॒ इति॑ नि - स॒ङ्गिने᳚ । इ॒षु॒धि॒मत इती॑षुधि - मते᳚ । तस्क॑राणाम् । पत॑ये । नमः॑ । नमः॑ । वञ्च॑ते । प॒रि॒वञ्च॑त॒ इति॑ परि - वञ्च॑ते । स्ता॒यू॒नाम् । पत॑ये । नमः॑ । नमः॑ । नि॒चे॒रव॒ इति॑ नि - चे॒रवे᳚ । प॒रि॒च॒रायेति॑ परि - च॒राय॑ । अर॑ण्यानाम् । पत॑ये । नमः॑ । नमः॑ । सृ॒का॒विभ्य॒ इति॑ सृका॒वि - भ्यः॒ । जिघाꣳ॑सद्भ्य॒ इति॒ जिघाꣳ॑सत् - भ्यः॒ । मु॒ष्ण॒ताम् । पत॑ये । नमः॑ । नमः॑ । अ॒सि॒मद्भ्य॒ इत्य॑सि॒मत् - भ्यः॒ । नक्त᳚म् । चर॑द्भ्य॒ इति॒ चर॑त् - भ्यः॒ । प्र॒कृ॒न्ताना॒मिति॑ प्र - कृ॒न्ताना᳚म् । पत॑ये । नमः॑ । नमः॑ । उ॒ष्णी॒षिणे᳚ । गि॒रि॒च॒रायेति॑ गिरि - च॒राय॑ । कु॒लु॒ञ्चाना᳚म् । पत॑ये । नमः॑ । नमः॑ ।

इषु॑मद्भ्य॒ इतीषु॑मत् - भ्यः॒ । ध॒न्वा॒विभ्य॒ इति॑ धन्वा॒वि-भ्यः॒ । च॒ । वः॒ । नमः॑ । नमः॑ । आ॒त॒न्वा॒नेभ्य॒ इत्या᳚ - त॒न्वा॒नेभ्यः॑ । प्र॒ति॒दधा॑नेभ्य॒ इति॑ प्रति - दधा॑नेभ्यः । च॒ । वः॒ । नमः॑ । नमः॑ । आ॒यच्छ॑द्भ्य॒ इत्या॒यच्छ॑त् - भ्यः॒ । वि॒सृ॒जद्भ्य॒ इति॑ विसृ॒जत् - भ्यः॒ । च॒ । वः॒ । नमः॑ । नमः॑ । अस्य॑द्भ्य॒ इत्यस्य॑त् - भ्यः॒ । विद्ध्य॑द्भ्य॒ इति॒ विद्ध्य॑त्-भ्यः॒ । च॒ । वः॒ । नमः॑ । नमः॑ । आसी॑नेभ्यः । शया॑नेभ्यः । च॒ । वः॒ । नमः॑ । नमः॑ । स्व॒पद्भ्य॒ इति॑ स्व॒पत् - भ्यः॒ । जाग्र॑द्भ्य॒ इति॒ जाग्र॑त्-भ्यः॒ । च॒ । वः॒ । नमः॑ । नमः॑ । तिष्ठ॑द्भ्य॒ इति॒ तिष्ठ॑त् - भ्यः॒ । धाव॑द्भ्य॒ इति॒ धाव॑त् - भ्यः॒ । च॒ । वः॒ । नमः॑ । नमः॑ । स॒भाभ्यः॑ । स॒भाप॑तिभ्य॒ इति॑ स॒भाप॑ति - भ्यः॒ । च॒ । वः॒ । नमः॑ । नमः॑ । अश्वे᳚भ्यः । अश्व॑पतिभ्य॒ इत्यश्व॑पति - भ्यः॒ ( ) । च॒ । वः॒ । नमः॑ ॥

नमः॑ । आ॒व्या॒धिनी᳚भ्य॒ इत्या᳚ - व्या॒धिनी᳚भ्यः । वि॒विद्ध्य॑न्तीभ्य॒ इति॑ वि - विद्ध्य॑न्तीभ्यः । च॒ । वः॒ । नमः॑ । नमः॑ । उग॑णाभ्यः । तृꣳ॒॒ह॒तीभ्यः॑ । च॒ । वः॒ । नमः॑ । नमः॑ । गृ॒थ्सेभ्यः॑ । गृ॒थ्सप॑तिभ्य॒ इति॑ गृ॒थ्सप॑ति - भ्यः॒ । च॒ । वः॒ । नमः॑ । नमः॑ । व्राते᳚भ्यः । व्रात॑पतिभ्य॒ इति॒ व्रात॑पति-भ्यः॒ । च॒ । वः॒ । नमः॑ । नमः॑ । ग॒णेभ्यः॑ । ग॒णप॑तिभ्य॒ इति॑ ग॒णप॑ति - भ्यः॒ । च॒ । वः॒ । नमः॑ । नमः॑ । विरू॑पेभ्य॒ इति॒ वि - रू॒पे॒भ्यः॒ । वि॒श्वरू॑पेभ्य॒ इति॑ वि॒श्व-रू॒पे॒भ्यः॒ । च॒ । वः॒ । नमः॑ । नमः॑ । म॒हद्भ्य॒ इति॑ म॒हत्-भ्यः॒ । क्षु॒ल्ल॒केभ्यः॑ । च॒ । वः॒ । नमः॑ । नमः॑ । र॒थिभ्य॒ इति॑ र॒थि-भ्यः॒ । अ॒र॒थेभ्यः॑ । च॒ । वः॒ । नमः॑ । नमः॑ । रथे᳚भ्यः ।

रथ॑पतिभ्य॒ इति॒ रथ॑पति-भ्यः॒ । च॒ । वः॒ । नमः॑ । नमः॑ । सेना᳚भ्यः । से॒ना॒निभ्य॒ इति॑ सेना॒नि - भ्यः॒ । च॒ । वः॒ । नमः॑ । नमः॑ । क्ष॒त्तृभ्य॒ इति॑ क्ष॒त्तृ - भ्यः॒ । स॒ग्रं॒ही॒तृभ्य॒ इति॑ संग्रही॒तृ - भ्यः॒ । च॒ । वः॒ । नमः॑ । नमः॑ । तक्ष॑भ्य॒ इति॒ तक्ष॑ - भ्यः॒ । र॒थ॒का॒रेभ्य॒ इति॑ रथ-का॒रेभ्यः॑ । च॒ । वः॒ । नमः॑ । नमः॑ । कुला॑लेभ्यः । क॒र्मारे᳚भ्यः । च॒ । वः॒ । नमः॑ । नमः॑ । पु॒ञ्जिष्टे᳚भ्यः । नि॒षा॒देभ्यः॑ । च॒ । वः॒ । नमः॑ । नमः॑ । इ॒षु॒कृद्भ्य॒ इती॑षु॒कृत् - भ्यः॒ । ध॒न्व॒कृद्भ्य॒ इति॑ धन्व॒कृत् - भ्यः॒ । च॒ । वः॒ । नमः॑ । नमः॑ । मृ॒ग॒युभ्य॒ इति॑ मृग॒यु-भ्यः॒ । श्व॒निभ्य॒ इति॑ श्व॒नि - भ्यः॒ । च॒ । वः॒ । नमः॑ । नमः॑ । श्वभ्य॒ इति॒ श्व - भ्यः॒ । श्वप॑तिभ्य॒ इति॒ श्वप॑ति - भ्यः॒ । च॒ ( ) । वः॒ । नमः॑ ॥

नमः॑ । भ॒वाय॑ । च॒ । रु॒द्राय॑ । च॒ । नमः॑ । श॒र्वाय॑ । च॒ । प॒शु॒पत॑य॒ इति॑ पशु-पत॑ये । च॒ । नमः॑ । नील॑ग्रीवा॒येति॒ नील॑ - ग्री॒वा॒य॒ । च॒ । शि॒ति॒कण्ठा॒येति॑ शिति - कण्ठा॑य । च॒ । नमः॑ । क॒प॒र्दिने᳚ । च॒ । व्यु॑प्तकेशा॒येति॒ व्यु॑प्त - के॒शा॒य॒ । च॒ । नमः॑ । स॒ह॒स्रा॒क्षायेति॑ सहस्र-अ॒क्षाय॑ । च॒ । श॒तध॑न्वन॒ इति॑ श॒त - ध॒न्व॒ने॒ । च॒ । नमः॑ । गि॒रि॒शाय॑ । च॒ । शि॒पि॒वि॒ष्टायेति॑ शिपि - वि॒ष्टाय॑ । च॒ । नमः॑ । मी॒ढुष्ट॑मा॒येति॑ मी॒ढुः - त॒मा॒य॒ । च॒ । इषु॑मत॒ इतीषु॑ - म॒ते॒ । च॒ । नमः॑ । ह्र॒स्वाय॑ । च॒ । वा॒म॒नाय॑ । च॒ । नमः॑ । बृ॒ह॒ते । च॒ । वर्.षी॑यसे । च॒ । नमः॑ । वृ॒द्धाय॑ । च॒ । सं॒ॅवृद्ध्व॑न॒ इति॑ सं - वृद्ध्व॑ने । च॒ ।

नमः॑ । अग्रि॑याय । च॒ । प्र॒थ॒माय॑ । च॒ । नमः॑ । आ॒शवे᳚ । च॒ । अ॒जि॒राय॑ । च॒ । नमः॑ । शीघ्रि॑याय । च॒ । शीभ्या॑य । च॒ । नमः॑ । ऊ॒र्म्या॑य । च॒ । अ॒व॒स्व॒न्या॑येत्य॑व - स्व॒न्या॑य । च॒ । नमः॑ । स्रो॒त॒स्या॑य । च॒ । द्वीप्या॑य । च॒ ॥

नमः॑ । ज्ये॒ष्ठाय॑ । च॒ । क॒नि॒ष्ठाय॑ । च॒ । नमः॑ । पू॒र्व॒जायेति॑ पूर्व - जाय॑ । च॒ । अ॒प॒र॒जायेत्य॑पर-जाय॑ । च॒ । नमः॑ । म॒द्ध्य॒माय॑ । च॒ । अ॒प॒ग॒ल्भायेत्य॑प - ग॒ल्भाय॑ । च॒ । नमः॑ । ज॒घ॒न्या॑य । च॒ । बुद्ध्नि॑याय । च॒ । नमः॑ । सो॒भ्या॑य । च॒ । प्र॒ति॒स॒र्या॑येति॑ प्रति - स॒र्या॑य । च॒ । नमः॑ । याम्या॑य । च॒ । क्षेम्या॑य । च॒ । नमः॑ । उ॒र्व॒र्या॑य । च॒ । खल्या॑य । च॒ । नमः॑ । श्लोक्या॑य । च॒ । अ॒व॒सा॒न्या॑येत्य॑व - सा॒न्या॑य । च॒ । नमः॑ । वन्या॑य । च॒ । कक्ष्या॑य । च॒ । नमः॑ । श्र॒वाय॑ । च॒ । प्र॒ति॒श्र॒वायेति॑ प्रति-श्र॒वाय॑ । च॒ ।

नमः॑ । आ॒शुषे॑णा॒येत्या॒शु - से॒ना॒य॒ । च॒ । आ॒शुर॑था॒येत्या॒शु-र॒था॒य॒ । च॒ । नमः॑ । शूरा॑य । च॒ । अ॒व॒भि॒न्द॒त इत्य॑व-भि॒न्द॒ते । च॒ । नमः॑ । व॒र्मिणे᳚ । च॒ । व॒रू॒थिने᳚ । च॒ । नमः॑ । बि॒ल्मिने᳚ । च॒ । क॒व॒चिने᳚ । च॒ । नमः॑ । श्रु॒ताय॑ । च॒ । श्रु॒त॒से॒नायेति॑ श्रुत-से॒नाय॑ । च॒ ॥

नमः॑ । दु॒न्दु॒भ्या॑य । च॒ । आ॒ह॒न॒न्या॑येत्या᳚ - ह॒न॒न्या॑य । च॒ । नमः॑ । धृ॒ष्णवे᳚ । च॒ । प्र॒मृ॒शायेति॑ प्र - मृ॒शाय॑ । च॒ । नमः॑ । दू॒ताय॑ । च॒ । प्रहि॑ता॒येति॒ प्र - हि॒ता॒य॒ । च॒ । नमः॑ । नि॒ष॒ङ्गिण॒ इति॑ नि - स॒ङ्गिने᳚ । च॒ । इ॒षु॒धि॒मत॒ इती॑षुधि - मते᳚ । च॒ । नमः॑ । ती॒क्ष्णेष॑व॒ इति॑ ती॒क्ष्ण - इ॒ष॒वे॒ । च॒ । आ॒यु॒धिने᳚ । च॒ । नमः॑ । स्वा॒यु॒धायेति॑ सु - आ॒यु॒धाय॑ । च॒ । सु॒धन्व॑न॒ इति॑ सु - धन्व॑ने । च॒ । नमः॑ । स्रुत्या॑य । च॒ । पथ्या॑य । च॒ । नमः॑ । का॒ट्या॑य । च॒ । नी॒प्या॑य । च॒ । नमः॑ । सूद्या॑य । च॒ । स॒र॒स्या॑य । च॒ । नमः॑ । ना॒द्याय॑ । च॒ । वै॒श॒न्ताय॑ । च॒ ।

नमः॑ । कूप्या॑य । च॒ । अ॒व॒ट्या॑य । च॒ । नमः॑ । वर्ष्या॑य । च॒ । अ॒व॒र्ष्याय॑ । च॒ । नमः॑ । मे॒घ्या॑य । च॒ । वि॒द्यु॒त्या॑येति॑ वि - द्यु॒त्या॑य । च॒ । नमः॑ । ई॒द्ध्रिया॑य । च॒ । आ॒त॒प्या॑येत्या᳚ - त॒प्या॑य । च॒ । नमः॑ । वात्या॑य । च॒ । रेष्मि॑याय । च॒ । नमः॑ । वा॒स्त॒व्या॑य । च॒ । वा॒स्तु॒पायेति॑ वास्तु - पाय॑ । च॒ ॥

नमः॑ । सोमा॑य । च॒ । रु॒द्राय॑ । च॒ । नमः॑ । ता॒म्राय॑ । च॒ । अ॒रु॒णाय॑ । च॒ । नमः॑ । श॒ङ्गाय॑ । च॒ । प॒शु॒पत॑य॒ इति॑ पशु-पत॑ये । च॒ । नमः॑ । उ॒ग्राय॑ । च॒ । भी॒माय॑ । च॒ । नमः॑ । अ॒ग्रे॒व॒धायेत्य॑ग्रे - व॒धाय॑ । च॒ । दू॒रे॒व॒धायेति॑ दूरे - व॒धाय॑ । च॒ । नमः॑ । ह॒न्त्रे । च॒ । हनी॑यसे । च॒ । नमः॑ । वृ॒क्षेभ्यः॑ । हरि॑केशेभ्य॒ इति॒ हरि॑ - के॒शे॒भ्यः॒ । नमः॑ । ता॒राय॑ । नमः॑ । श॒भंव॒ इति॑ शं - भवे᳚ । च॒ । म॒यो॒भव॒ इति॑ मयः - भवे᳚ । च॒ । नमः॑ । श॒ङ्क॒रायेति॑ शं - क॒राय॑ । च॒ । म॒य॒स्क॒रायेति॑ मयः - क॒राय॑ । च॒ । नमः॑ । शि॒वाय॑ । च॒ । शि॒वत॑रा॒येति॑ शि॒व - त॒रा॒य॒ । च॒ ।

नमः॑ । तीर्थ्या॑य । च॒ । कूल्या॑य । च॒ । नमः॑ । पा॒र्या॑य । च॒ । अ॒वा॒र्या॑य । च॒ । नमः॑ । प्र॒तर॑णा॒येति॑ प्र - तर॑णाय । च॒ । उ॒त्तर॑णा॒येत्यु॑त् - तर॑णाय । च॒ । नमः॑ । आ॒ता॒र्या॑येत्या᳚-ता॒र्या॑य । च॒ । आ॒ला॒द्या॑येत्या᳚ - ला॒द्या॑य। च॒ । नमः॑ । शष्प्या॑य । च॒ । फेन्या॑य । च॒ । नमः॑ । सि॒क॒त्या॑य । च॒ । प्र॒वा॒ह्या॑येति॑ प्र - वा॒ह्या॑य । च॒ ।

नमः॑ । इ॒रि॒ण्या॑य । च॒ । प्र॒प॒थ्या॑येति॑ प्र - प॒थ्या॑य । च॒ । नमः॑ । किꣳ॒॒शि॒लाय॑ । च॒ । क्षय॑णाय । च॒ । नमः॑ । क॒प॒र्दिने᳚ । च॒ । पु॒ल॒स्तये᳚ । च॒ । नमः॑ । गोष्ठ्या॒येति॒ गो - स्थ्या॒य॒ । च॒ । गृह्या॑य । च॒ । नमः॑ । तल्प्या॑य । च॒ । गेह्या॑य । च॒ । नमः॑ । का॒ट्या॑य । च॒ । ग॒ह्व॒रे॒ष्ठायेति॑ गह्वरे - स्थाय॑ । च॒ । नमः॑ । ह्र॒द॒य्या॑य । च॒ । नि॒वे॒ष्प्या॑येति॑ नि - वे॒ष्प्या॑य । च॒ । नमः॑ । पाꣳ॒॒स॒व्या॑य । च॒ । र॒ज॒स्या॑य । च॒ । नमः॑ । शुष्क्या॑य । च॒ । ह॒रि॒त्या॑य । च॒ । नमः॑ । लोप्या॑य । च॒ । उ॒ल॒प्या॑य । च॒ ।

नमः॑ । ऊ॒र्व्या॑य । च॒ । सू॒र्म्या॑य । च॒ । नमः॑ । प॒र्ण्या॑य । च॒ । प॒र्ण॒श॒द्या॑येति॑ पर्ण - श॒द्या॑य। च॒ । नमः॑ । अ॒प॒गु॒रमा॑णा॒येत्य॑प - गु॒रमा॑णाय । च॒ । अ॒भि॒घ्न॒त इत्य॑भि - घ्न॒ते । च॒ । नमः॑ । आ॒क्खि॒द॒त इत्या᳚ - खि॒द॒ते । च॒ । प्र॒क्खि॒द॒त इति॑ प्र-खि॒द॒ते । च॒ । नमः॑ । वः॒ । कि॒रि॒केभ्यः॑ । दे॒वाना᳚म् । हृद॑येभ्यः । नमः॑ । वि॒क्षी॒ण॒केभ्य॒ इति॑ वि - क्षी॒ण॒केभ्यः॑ । नमः॑ । वि॒चि॒न्व॒त्केभ्य॒ इति॑ वि - चि॒न्व॒त्केभ्यः॑ । नमः॑ । आ॒नि॒र्॒.ह॒तेभ्य॒ इत्या॑निः-ह॒तेभ्यः॑ । नमः॑ । आ॒मी॒व॒त्केभ्य॒ इत्या᳚ - मी॒व॒त्केभ्यः॑ ॥

द्रापे᳚ । अन्ध॑सः । प॒ते॒ । दरि॑द्रत् । नील॑लोहि॒तेति॒ नील॑ - लो॒हि॒त॒ ॥ ए॒षाम् । पुरु॑षाणाम् । ए॒षाम् । प॒शू॒नाम् । मा । भेः । मा । अ॒रः॒ । मो इति॑ । ए॒षा॒म् । किम् । च॒न । आ॒म॒म॒त् ॥ या । ते॒ । रु॒द्र॒ । शि॒वा । त॒नूः । शि॒वा । वि॒श्वाह॑भेष॒जीति॑ वि॒श्वाह॑-भे॒ष॒जी॒ ॥ शि॒वा । रु॒द्रस्य॑ । भे॒ष॒जी । तया᳚ । नः॒ । मृ॒ड॒ । जी॒वसे᳚ ॥ इ॒माम् । रु॒द्राय॑ । त॒वसे᳚ । क॒प॒र्दिने᳚ । क्ष॒यद्वी॑रा॒येति॑ क्ष॒यत् - वी॒रा॒य॒ । प्रेति॑ । भ॒रा॒म॒हे॒ । म॒तिम् ॥ यथा᳚ । नः॒ । शम् । अस॑त् । द्वि॒पद॒ इति॑ द्वि - पदे᳚ । चतु॑ष्पद॒ इति॒ चतुः॑ - प॒दे॒ । विश्व᳚म् । पु॒ष्टम् । ग्रामे᳚ । अ॒स्मिन्न् ।

अना॑तुर॒मित्यना᳚ - तु॒र॒म् ॥ मृ॒ड । नः॒ । रु॒द्र॒ । उ॒त । नः॒ । मयः॑ । कृ॒धि॒ । क्ष॒यद्वी॑रा॒येति॑ क्ष॒यत् - वी॒रा॒य॒ । नम॑सा । वि॒धे॒म॒ । ते॒ ॥ यत् । शम् । च॒ । योः । च॒ । मनुः॑ । आ॒य॒ज इत्या᳚ - य॒जे । पि॒ता । तत् । अ॒श्या॒म॒ । तव॑ । रु॒द्र॒ । प्रणी॑ता॒विति॒ प्र - नी॒तौ॒ ॥ मा । नः॒ । म॒हान्त᳚म् । उ॒त । मा । नः॒ । अ॒र्भ॒कम् । मा । नः॒ । उक्ष॑न्तम् । उ॒त । मा । नः॒ । उ॒क्षि॒तम् ॥ मा । नः॒ । व॒धीः॒ । पि॒तर᳚म् । मा । उ॒त । मा॒तर᳚म् । प्रि॒याः । मा । नः॒ । त॒नुवः॑ ।

रु॒द्र॒ । री॒रि॒षः॒ ॥ मा । नः॒ । तो॒के । तन॑ये । मा । नः॒ । आयु॑षि । मा । नः॒ । गोषु॑ । मा । नः॒ । अश्वे॑षु । री॒रि॒षः॒ ॥ वी॒रान् । मा । नः॒ । रु॒द्र॒ । भा॒मि॒तः । व॒धीः॒ । ह॒विष्म॑न्तः । नम॑सा । वि॒धे॒म॒ । ते॒ ॥ आ॒रात् । ते॒ । गो॒घ्न इति॑ गो - घ्ने । उ॒त । पू॒रु॒ष॒घ्न इति॑ पूरुष - घ्ने । क्ष॒यद्वी॑रा॒येति॑ क्ष॒यत् - वी॒रा॒य॒ । सु॒म्नम् । अ॒स्मे इति॑ । ते॒ । अ॒स्तु॒ ॥ रक्ष॑ । च॒ । नः॒ । अधीति॑ । च॒ । दे॒व॒ । ब्रू॒हि॒ । अध॑ । च॒ । नः॒ । शर्म॑ । य॒च्छ॒ । द्वि॒बर्.हा॒ इति॑ द्वि - बर्.हाः᳚ ॥ स्तु॒हि ।

श्रु॒तम् । ग॒र्त्त॒सद॒मिति॑ गर्त्त-सद᳚म् । युवा॑नम् । मृ॒गम् । न । भी॒मम् । उ॒प॒ह॒त्नुम् । उ॒ग्रम् ॥ मृ॒ड । ज॒रि॒त्रे । रु॒द्र॒ । स्तवा॑नः । अ॒न्यम् । ते॒ । अ॒स्मत् । नीति॑ । व॒प॒न्तु॒ । सेनाः᳚ ॥ परीति॑ । नः॒ । रु॒द्रस्य॑ । हे॒तिः । वृ॒ण॒क्तु॒ । परीति॑ । त्वे॒षस्य॑ । दु॒र्म॒तिरिति॑ दुः - म॒तिः । अ॒घा॒योरित्य॑घ - योः ॥ अवेति॑ । स्थि॒रा । म॒घव॑द्भ्य॒ इति॑ म॒घव॑त् - भ्यः॒ । त॒नु॒ष्व॒ । मीढ्वः॑ । तो॒काय॑ । तन॑याय । मृ॒ड॒य॒ ॥ मीढु॑ष्ट॒मेति॒ मीढुः॑ - त॒म॒ । शिव॑त॒मेति॒ शिव॑ - त॒म॒ । शि॒वः । नः॒ । सु॒मना॒ इति॑ सु - मनाः᳚ । भ॒व॒ ॥ प॒र॒मे । वृ॒क्षे । आयु॑धम् । नि॒धायेति॑ नि - धाय॑ । कृत्ति᳚म् । वसा॑नः । एति॑ । च॒र॒ । पिना॑कम् ।

बिभ्र॑त् । एति॑ । ग॒हि॒ ॥ विकि॑रि॒देति॒ वि - कि॒रि॒द॒ । विलो॑हि॒तेति॒ वि - लो॒हि॒त॒ । नमः॑ । ते॒ । अ॒स्तु॒ । भ॒ग॒व॒ इति॑ भग - वः॒ ॥ याः । ते॒ । स॒हस्र᳚म् । हे॒तयः॑ । अ॒न्यम् । अ॒स्मत् । नीति॑ । व॒प॒न्तु॒ । ताः ॥ स॒हस्रा॑णि । स॒ह॒स्र॒धेति॑ सहस्र-धा । बा॒हु॒वोः । तव॑ । हे॒तयः॑ ॥ तासा᳚म् । ईशा॑नः । भ॒ग॒व॒ इति॑ भग - वः॒ । प॒रा॒चीना᳚ । मुखा᳚ । कृ॒धि॒ ॥

स॒हस्रा॑णि । स॒ह॒स्र॒श इति॑ सहस्र - शः । ये । रु॒द्राः । अधीति॑ । भूम्या᳚म् ॥ तेषा᳚म् । स॒ह॒स्र॒यो॒ज॒न इति॑ सहस्र - यो॒ज॒ने । अवेति॑ । धन्वा॑नि । त॒न्म॒सि॒ ॥ अ॒स्मिन्न् । म॒ह॒ति । अ॒र्ण॒वे । अ॒न्तरि॑क्षे । भ॒वाः । अधि॑ ॥ नील॑ग्रीवा॒ इति॒ नील॑ - ग्री॒वाः॒ । शि॒ति॒कण्ठा॒ इति॑ शिति - कण्ठाः᳚ । श॒र्वाः । अ॒धः । क्ष॒मा॒च॒राः ॥ नील॑ग्रीवा॒ इति॒ नील॑-ग्री॒वाः॒ । शि॒ति॒कण्ठा॒ इति॑ शिति - कण्ठाः᳚ । दिव᳚म् । रु॒द्राः । उप॑श्रिता॒ इत्युप॑ - श्रि॒ताः॒ ॥ ये । वृ॒क्षेषु॑ । स॒स्पिञ्ज॑राः । नील॑ग्रीवा॒ इति॒ नील॑ - ग्री॒वाः॒ । विलो॑हिता॒ इति॒ वि - लो॒हि॒ताः॒ ॥ ये । भू॒ताना᳚म् । अधि॑पतय॒ इत्यधि॑ - प॒त॒यः॒ । वि॒शि॒खास॒ इति॑ वि -शि॒खासः॑ । क॒प॒र्दिनः॑ ॥ ये । अन्ने॑षु । वि॒विद्ध्य॒न्तीति॑ वि-विद्ध्य॑न्ति । पात्रे॑षु । पिब॑तः । जनान्॑ ॥ ये । प॒थाम् । प॒थि॒रक्ष॑य॒ इति॑ पथि - रक्ष॑यः । ऐ॒ल॒बृ॒दाः । य॒व्युधः॑ ॥ ये । ती॒र्थानि॑ ।

प्र॒चर॒न्तीति॑ प्र - चर॑न्ति । सृ॒काव॑न्त॒ इति॑ सृ॒का - व॒न्तः॒ । नि॒ष॒ङ्गिण॒ इति॑ नि - स॒ङ्गिनः॑ ॥ ये । ए॒ताव॑न्तः । च॒ । भूयाꣳ॑सः । च॒ । दिशः॑ । रु॒द्राः । वि॒त॒स्थि॒र इति॑ वि - त॒स्थि॒रे ॥ तेषा᳚म् । स॒ह॒स्र॒यो॒ज॒न इति॑ सहस्र - यो॒ज॒ने । अवेति॑ । धन्वा॑नि । त॒न्म॒सि॒ ॥ नमः॑ । रु॒द्रेभ्यः॑ । ये । पृ॒थि॒व्याम् । ये । अ॒न्तरि॑क्षे । ये । दि॒वि । येषा᳚म् । अन्न᳚म् । वातः॑ । व॒र्॒.षम् । इष॑वः । तेभ्यः॑ । दश॑ । प्राचीः᳚ । दश॑ । द॒क्षि॒णा । दश॑ । प्र॒तीचीः᳚ । दश॑ । उदी॑चीः । दश॑ । ऊ॒द्‌र्ध्वाः । तेभ्यः॑ । नमः॑ । ते । नः॒ । मृ॒ड॒य॒न्तु॒ । ते॒ । यम् । द्वि॒ष्मः । यः । च॒ ( ) । नः॒ । द्वेष्टि॑ । तम् । वः॒ । जंभे᳚ । द॒धा॒मि॒ ॥