दे॒वा वै यथा॒दर्.शं॑ ॅय॒ज्ञानाह॑रन्त । यो᳚ऽग्निष्टो॒मम् । य उ॒क्थ्य᳚म् । यो॑ऽतिरा॒त्रम् । ते स॒हैव सर्वे॑ वाज॒पेय॑-मपश्यन्न् । ते । अ॒न्यो᳚न्यस्मै॒ नाति॑ष्ठन्त । अ॒हम॒नेन॑ यजा॒ इति॑ । ते᳚ऽब्रुवन्न् । आ॒जिम॒स्य धा॑वा॒मेति॑

तस्मि॑न्-ना॒जिम॑धावन्न् । तं बृह॒स्पति॒-रुद॑जयत् । तेना॑यजत । स स्वारा᳚ज्य-मगच्छत् । तमिन्द्रो᳚ऽब्रवीत् । माम॒नेन॑ याज॒येति॑ । तेनेन्द्र॑-मयाजयत् । सोऽग्रं॑ दे॒वता॑नां॒ पर्यै᳚त् । अग॑च्छ॒थ्-स्वारा᳚ज्यम् । अति॑ष्ठन्तास्मै॒ ज्यैष्ठ्या॑य ।

य ए॒वं ॅवि॒द्वान्. वा॑ज॒पेये॑न॒ यज॑ते । गच्छ॑ति॒ स्वारा᳚ज्यम् । अग्रꣳ॑ समा॒नानां॒ पर्ये॑ति । तिष्ठ॑न्तेऽस्मै॒ ज्यैष्ठ्या॑य ॥ स वा ए॒ष ब्रा᳚ह्म॒णस्य॑ चै॒व रा॑ज॒न्य॑स्य च य॒ज्ञ्ः ॥ तं ॅवा ए॒तं ॅवा॑ज॒पेय॒ इत्या॑हुः । वा॒जाप्यो॒ वा ए॒षः । वाजꣳ॒॒ ह्ये॑तेन॑ दे॒वा ऐफ्सन्न्॑ ॥ सोमो॒ वै वा॑ज॒पेयः॑ । यो वै सोमं॑ ॅवाज॒पेयं॒ ॅवेद॑

वा॒ज्ये॑वैनं॑ पी॒त्वा भ॑वति । आऽस्य॑ वा॒जी जा॑यते ॥ अन्नं॒ ॅवै वा॑ज॒पेयः॑ । य ए॒वं ॅवेद॑ । अत्त्यन्न᳚म् । आऽस्या᳚न्ना॒दो जा॑यते ॥ ब्रह्म॒ वै वा॑ज॒पेयः॑ । य ए॒वं ॅवेद॑ । अत्ति॒ ब्रह्म॒णाऽन्न᳚म् । आऽस्य॑ ब्र॒ह्मा जा॑यते ।

वाग्वै वाज॑स्य प्रस॒वः । य ए॒वं ॅवेद॑ । क॒रोति॑ वा॒चा वी॒र्य᳚म् । ऐनं॑ ॅवा॒चा ग॑च्छति । अपि॑वतीं॒ ॅवाचं॑ ॅवदति ॥ प्र॒जाप॑तिर् दे॒वेभ्यो॑ य॒ज्ञान् व्यादि॑शत् । स आ॒त्मन् वा॑ज॒पेय॑-मधत्त । तं दे॒वा अ॑ब्रुवन्न् । ए॒ष वाव य॒ज्ञ्ः । यद्-वा॑ज॒पेयः॑

अप्ये॒व नोऽत्रा॒स्त्विति॑ । तेभ्य॑ ए॒ता उज्जि॑तीः॒ प्राय॑च्छत् ॥ ता वा ए॒ता उज्जि॑तयो॒ व्याख्या॑यन्ते । य॒ज्ञ्स्य॑ सर्व॒त्वाय॑ । दे॒वता॑ना॒-मनि॑र्भागाय ॥ दे॒वा वै ब्रह्म॑ण॒श्चान्न॑स्य च॒ शम॑ल॒मपा᳚घ्नन्न् । यद्-ब्रह्म॑णः॒ शम॑ल॒मासी᳚त् । सा गाथा॑ नाराशꣳ॒॒स्य॑ भवत् । यदन्न॑स्य । सा सुरा᳚ ।

तस्मा॒द्-गाय॑तश्च म॒त्तस्य॑ च॒ न प्र॑ति॒गृह्य᳚म् । यत् प्र॑तिगृह्णी॒यात् । शम॑लं॒ प्रति॑गृह्णीयात् ॥ सर्वा॒ वा ए॒तस्य॒ वाचो ऽव॑रुद्धाः । यो वा॑जपेयया॒जी । या पृ॑थि॒व्यां ॅयाऽग्नौ या र॑थन्त॒रे । याऽन्तरि॑क्षे॒ या वा॒यौ या वा॑मदे॒व्ये । या दि॒वि याऽऽदि॒त्ये या बृ॑ह॒ति । याऽफ्सु यौष॑धीषु॒ या वन॒स्पति॑षु ॥ तस्मा᳚द् वाजपेयया॒ज्यार्त्वि॑जीनः ( ) । सर्वा॒ ह्य॑स्य॒ वाचो ऽव॑रुद्धाः ।