वै॒श्व॒दे॒वेन॒ वै प्र॒जाप॑तिः प्र॒जा अ॑सृजत । ता व॑रुण-प्रघा॒सैर्-व॑रुणपा॒शाद॑मुञ्चत् । सा॒क॒मे॒धैः प्रत्य॑स्थापयत् । त्र्य॑म्बकै रु॒द्रं नि॒रवा॑दयत । पि॒तृ॒य॒ज्ञेन॑ सुव॒र्गं ॅलो॒कम॑गमयत् । यद्-वै᳚श्वदे॒वेन॒ यज॑ते । प्र॒जा ए॒व तद्-यज॑मानः सृजते । ता व॑रुण-प्रघा॒सैर्-व॑रुणपा॒शान्-मु॑ञ्चति । सा॒क॒मे॒धैः प्रति॑ष्ठापयति । त्र्य॑म्बकैरु॒द्रं नि॒रव॑दयते

पि॒तृ॒य॒ज्ञेन॑ सुव॒र्गं ॅलो॒कं ग॑मयति । द॒क्षि॒ण॒तः प्रा॑चीनावी॒ती निर्व॑पति । द॒क्षि॒णावृ॒द्धि पि॑तृ॒णाम् । अना॑दृत्य॒ तत् । उ॒त्त॒र॒त ए॒वोप॒वीय॒ निर्व॑पेत् । उ॒भये॒ हि दे॒वाश्च॑ पि॒तर॑श्चे॒ज्यन्ते᳚ । अथो॒ यदे॒व द॑क्षिणा॒र्द्धे॑ऽधि॒ श्रय॑ति । तेन॑ दक्षि॒णावृ॑त् । सोमा॑य पितृ॒मते॑ पुरो॒डाशꣳ॒॒ षट्क॑पालं॒ निर्व॑पति । स॒म्ॅव॒थ्स॒रो वै सोमः॑ पितृ॒मान्

स॒म्ॅव॒थ्स॒रमे॒व प्री॑णाति । पि॒तृभ्यो॑ बर्.हि॒षद्भ्यो॑ धा॒नाः । मासा॒ वै पि॒तरो॑ बर्.हि॒षदः॑ । मासा॑ने॒व प्री॑णाति । यस्मि॒न् वा ऋ॒तौ पुरु॑षः प्र॒मीय॑ते । सो᳚ऽस्या॒मुष्मि॑न् ॅलो॒के भ॑वति । ब॒हु॒रू॒पा धा॒ना भ॑वन्ति । अ॒हो॒रा॒त्राणा॑-म॒भिजि॑त्यै । पि॒तृभ्यो᳚ ऽग्निष्वा॒त्तेभ्यो॑ म॒न्थम् । अ॒र्द्ध॒मा॒सा वै पि॒तरो᳚ऽग्निष्वा॒त्ताः

अ॒र्द्ध॒मा॒साने॒व प्री॑णाति । अ॒भि॒वा॒न्या॑यै दु॒ग्धे भ॑वति । सा हि पि॑तृदेव॒त्यं॑ दु॒हे । यत् पू॒र्णम् । तन् म॑नु॒ष्या॑णाम् । उ॒प॒र्य॒र्द्धो दे॒वाना᳚म् । अ॒र्द्धः पि॑तृ॒णाम् । अ॒र्द्ध उप॑मन्थति । अ॒र्द्धो हि पि॑तृ॒णाम् । एक॒योप॑मन्थति

एका॒ हि पि॑तृ॒णाम् । द॒क्षि॒णोप॑मन्थति । द॒क्षि॒णा वृ॒द्धि पि॑तृ॒णाम् । अना॑र॒भ्योप॑मन्थति । तद्धि पि॒तॄन्-गच्छ॑ति । इ॒मां दिशं॒ ॅवेदि॒मुद्ध॑न्ति । उ॒भये॒ हि दे॒वाश्च॑ पि॒तर॑श्चे॒ज्यन्ते᳚ । चतुः॑ स्रक्तिर्भवति । सर्वा॒ ह्यनु॒ दिशः॑ पि॒तरः॑ । अखा॑ता भवति

खा॒ता हि दे॒वाना᳚म् । म॒द्ध्य॒तो᳚ ऽग्निराधी॑यते । अ॒न्त॒तो हि दे॒वाना॑-माधी॒यते᳚ । वर्.षी॑यानि॒द्ध्म इ॒द्ध्माद्-भ॑वति॒ व्यावृ॑त्त्यै । परि॑ श्रयति । अ॒न्तर्.हि॑तो॒ हि पि॑तृलो॒को म॑नुष्यलो॒कात् । यत्-परु॑षि दि॒नम् । तद्-दे॒वाना᳚म् । यद॑न्त॒रा । तन्-म॑नु॒ष्या॑णाम्

यथ् समू॑लम् । तत् पि॑तृ॒णाम् । समू॑लं ब॒र्॒.हिर्-भ॑वति॒ व्यावृ॑त्त्यै । द॒क्षि॒णा स्तृ॑णाति । द॒क्षि॒णा वृ॒द्धि पि॑तृ॒णाम् । त्रिः पर्ये॑ति । तृ॒तीये॒ वा इ॒तो लो॒के पि॒तरः॑ । ताने॒व प्री॑णाति । त्रिः पुनः॒ पर्ये॑ति । षट्थ्संप॑द्यन्ते

षड्वा ऋ॒तवः॑ । ऋ॒तूने॒व प्री॑णाति । यत् प्र॑स्त॒रं ॅयजु॑षा गृह्णी॒यात् । प्र॒मायु॑को॒ यज॑मानः स्यात् । यन्न गृ॑ह्णी॒यात् । अ॒ना॒य॒त॒नः स्या᳚त् । तू॒ष्णीमे॒व न्य॑स्येत् । न प्र॒मायु॑को॒ भव॑ति । नाना॑यत॒नः । यत्-त्रीन्-प॑रि॒धीन् प॑रिद॒द्ध्यात्

मृ॒त्युना॒ यज॑मानं॒ परि॑ गृह्णीयात् । यन्न प॑रि-द॒द्ध्यात् । रक्षाꣳ॑सि य॒ज्ञ्ꣳ ह॑न्युः । द्वौ प॑रि॒धी परि॑दधाति । रक्ष॑सा॒-मप॑हत्यै । अथो॑ मृ॒त्योरे॒व यज॑मान॒-मुथ्सृ॑जति । यत् त्रीणि॑ त्रीणि ह॒वीꣳष्यु॑दा॒हरे॑युः । त्रय॑स्त्रय एषाꣳ सा॒कं प्रमी॑येरन्न् । एकै॑क-मनू॒चीना᳚-न्यु॒दाह॑रन्ति । एकै॑क ए॒वैषा॑म॒न्वञ्चः॒ प्रमी॑यते ( ) । क॒शिपु॑ कशिप॒व्या॑य । उ॒प॒बर्.ह॑ण-मुपबर्.ह॒ण्या॑य । आञ्ज॑न-माञ्ज॒न्या॑य । अ॒भ्यञ्ज॑न-मभ्यञ्ज॒न्या॑य । य॒था॒भा॒गमे॒वैना᳚न् प्रीणाति ।