कश्चि॑द्ध॒वा अ॒स्मा-ल्लो॒कात् प्रेत्य॑ । आ॒त्मानं॑ ॅवेद । अ॒य-म॒ह-म॒स्मीति॑ । कश्चि॒थ्स्वं ॅलो॒कं न प्रति॒ प्रजा॑नाति ॥ अ॒ग्निमु॑ग्धो है॒व धु॒मता᳚न्तः । स्वं ॅलो॒कं न प्रति॒ प्रजा॑नाति ।अथ॒ यो है॒वैत-म॒ग्निꣳ सा॑वि॒त्रं ॅवेद॑ । स ए॒वास्मा ल्लो॒कात् प्रेत्य॑ । आ॒त्मानं॑ ॅवेद । अ॒य-म॒ह-म॒स्मीति॑

स स्वं ॅलो॒कं प्रति॒ प्रजा॑नाति ॥ ए॒ष उ॑ वे॒वैनं॒ तथ्सा॑वि॒त्रः । स्व॒र्गं ॅलो॒क-म॒भिव॑हति ॥ अ॒हो॒रा॒त्रै र्वा इदꣳ स॒युग्भिः॑ क्रियते । इ॒ति॒ रा॒त्राया॑ दीक्षिषत । इ॒ति॒ रा॒त्राय॑ व्र॒त-मुपा॑गु॒रिति॑ । तानि॒ हाने॑वं ॅवि॒दुषः॑ । अ॒मुष्मि॑न् ॅलो॒के शे॑व॒धिं ध॑यन्ति ।धी॒तꣳ है॒व स शे॑व॒धि-मनु॒परै॑ति ॥अथ॒ यो है॒वैतम॒ग्निꣳ सा॑वि॒त्रं ॅवेद॑

तस्य॑ है॒वा-हो॑रा॒त्राणि॑ । अ॒मुष्मि॑न् ॅलो॒के शे॑व॒धिं न ध॑यन्ति ।अधी॑तꣳ है॒व स शे॑व॒धि-मनु॒परै॑ति ॥ भ॒रद्वा॑जो ह त्रि॒भिरायु॑र्भि र्ब्रह्म॒चर्य॑मुवास । तꣳ ह॒ जीर्णिꣳ॒॒ स्थवि॑रꣳ॒॒ शया॑नं । इन्द्र॑ उप॒व्रज्यो॑ वाच । भर॑द्वाज । यत्ते॑ चतु॒र्थमायु॑र्द॒द्यां । किमे॑नेन कुर्या॒ इति॑ । ब्र॒ह्म॒चर्य॑मे॒वैने॑न चरेय॒मिति॑ होवाच

तꣳ ह॒ त्रीन् गि॒रि-रू॑पा॒न वि॑ज्ञातानिव दर्.श॒यां च॑कार । तेषाꣳ॒॒ हैकै॑कस्मान् मु॒ष्टिनाऽऽद॑दे । स हो॑वाच ।भर॑द्वा॒जेत्या॒मन्त्र्य॑ । वेदा॒ वा ए॒ते । अ॒न॒न्ता वै वेदाः᳚ । ए॒तद्वा ए॒तै स्त्रि॒भि-रायु॑र्भि॒-रन्व॑वोचथाः । अथ॑ त॒ इत॑र॒-दन॑नूक्तमे॒व । एही॒मं ॅवि॑द्धि । अ॒यं ॅवै स॑र्व वि॒द्येति॑

तस्मै॑ है॒तम॒ग्निꣳ सा॑वि॒त्रमु॑वाच । तꣳ स वि॑दि॒त्वा । अ॒मृतो॑ भू॒त्वा । स्व॒र्गं ॅलो॒कमि॑याय । आ॒दि॒त्यस्य॒ सायु॑ज्यं ॥ अ॒मृतो॑ है॒व भू॒त्वा । स्व॒र्गं ॅलो॒कमे॑ति । आ॒दि॒त्यस्य॒ सायु॑ज्यं । य ए॒वं ॅवेद॑ ॥ ए॒षो ए॒व त्रयी॑ वि॒द्या

याव॑न्तꣳ ह॒ वै त्र॒य्या वि॒द्यया॑ लो॒कं ज॑यति । ताव॑न्तं ॅलो॒कं ज॑यति । य ए॒वं ॅवेद॑ ॥ अ॒ग्ने र्वा ए॒तानि॑ नाम॒धेया॑नि ।अ॒ग्नेरे॒व सायु॑ज्यꣳ सलो॒कता॑-माप्नोति ।य ए॒वं ॅवेद॑ । वा॒यो र्वा ए॒तानि॑ नाम॒धेया॑नि । वा॒योरे॒व सायु॑ज्यꣳ सलो॒कता॑-माप्नोति । य ए॒वं ॅवेद॑ । इन्द्र॑स्य॒ वा ए॒तानि॑ नाम॒धेया॑नि

इन्द्र॑स्यै॒व सायु॑ज्यꣳ सलो॒कता॑-माप्नोति । य ए॒वं ॅवेद॑ ।बृह॒स्पते॒ र्वा ए॒तानि॑ नाम॒धेया॑नि । बृह॒स्पते॑रे॒व सायु॑ज्यꣳ सलो॒कता॑-माप्नोति ।य ए॒वं ॅवेद॑ । प्र॒जाप॑ते॒ र्वा ए॒तानि॑ नाम॒धेया॑नि । प्र॒जाप॑तेरे॒व सायु॑ज्यꣳ सलो॒कता॑-माप्नोति । य ए॒वं ॅवेद॑ ।ब्रह्म॑णो॒ वा ए॒तानि॑ नाम॒धेया॑नि । ब्रह्म॑ण ए॒व सायु॑ज्यꣳ सलो॒कता॑-माप्नोति ( ) । य ए॒वं ॅवेद॑ ॥ स वा ए॒षो᳚ऽग्नि-र॑पक्षपु॒च्छो वा॒युरे॒व । तस्या॒ग्नि र्मुखं᳚ । अ॒सावा॑दि॒त्यः शिरः॑ । स यदे॒ते दे॒वते॒ अन्त॑रेण । तथ्सर्वꣳ॑ सीव्यति । तस्मा᳚थ् सावि॒त्रः ।