प्र॒जाप॑ति र्दे॒वान॑सृजत । ते पा॒प्मना॒ संदि॑ता अजायन्त । तान् व्य॑द्यत् । यद् व्य॒द्यत् । तस्मा᳚द् वि॒द्युत् । तम॑वृश्चत् । यदवृ॑श्चत् । तस्मा॒द् वृष्टिः॑ । तस्मा॒द् यत्रै॒ते दे॒वते॑ अभि॒प्राप्नु॑तः । विच॑ है॒वास्य॒ तत्र॑ पा॒प्मान॒न्द्यतः॑

वृ॒श्चत॑श्च ॥ सैषा मी॑माꣳ॒॒साऽग्नि॑हो॒त्र ए॒व स॑पंन्ना । अथो॑ आहुः । सर्वे॑षु यज्ञ्क्र॒तुष्विति॑ ॥ होष्य॑न्न॒प उप॑स्पृशेत् । विद्यु॑दसि॒ विद्य॑मे पा॒प्मान॒मिति॑ । अथ॑ हु॒त्वोप॑स्पृशेत् । वृष्टि॑रसि॒ वृश्च॑ मे पा॒प्मान॒मिति॑ ।य॒क्ष्यमा॑णो वे॒ष्ट्वा वा᳚ । वि च॑ है॒वास्यै॒ते दे॒वते॑ पा॒प्मानं॒ द्यतः॑

वृ॒श्चत॑श्च ॥ अ॒त्यꣳ॒॒हो हारु॑णिः । ब्र॒ह्म॒चा॒रिणे᳚ प्र॒श्नान् प्रोच्य॒ प्रजि॑घाय ।परे॑हि । प्ल॒क्षं दैयां᳚ (दैय्यां᳚) पातिं पृच्छ । वेत्थ॑ सावि॒त्रां(3) न वे॒त्था(3) इति॑ ।तमा॒गत्य॑ पप्रच्छ । आ॒चार्यो॑ मा॒ प्राहै॑षीत् ।वेत्थ॑ सावि॒त्रां(3) न वे॒त्था(3) इति॑ । सहो॑वाच॒ वेदेति॑ ।

स कस्मि॒न् प्रति॑ष्ठित॒ इति॑ । प॒रोर॑ज॒सीति॑ ।कस्तद्यत् प॒रोर॑जा॒ इति॑ । ए॒ष वाव स प॒रोर॑जा॒ इति॑ होवाच । य ए॒ष तप॑ति । ए॒षो᳚ ऽर्वाग्र॑जा॒ इति॑ । स कस्मि॑न् त्वे॒ष इति॑ । स॒त्य इति॑ । किं तथ्स॒त्यमिति॑ । तप॒ इति॑

कस्मि॒न्नु तप॒ इति॑ । बल॒ इति॑ । किं तद् ब॒लमिति॑ । प्रा॒ण इति॑ । मास्म॑ प्रा॒णमति॑ पृच्छ॒ इति॑ माऽऽचा॒र्यो᳚ ऽब्रवी॒दिति॑ होवाच ब्रह्मचा॒री ॥ सहो॑वाच प्ल॒क्षो दैयां᳚ (दैय्यां᳚) पातिः । यद्वै ब्र॑ह्मचारिन् प्रा॒णमत्य॑प्रक्ष्यः । मू॒द्र्धा ते॒ व्यप॑तिष्यत् ।अ॒हमु॑त आचा॒र्या-च्छ्रेया᳚न् भविष्यामि । यो मा॑ सावि॒त्रे स॒मवा॑दि॒ष्टेति॑

तस्मा᳚थ् सावि॒त्रे न सम्ॅव॑देत ॥ स यो ह॒वै सा॑वि॒त्रं ॅवि॒दुषा॑ सावि॒त्रे स॒म्ॅवद॑ते । सहा᳚स्मि॒-ञ्छ्रियं॑ दधाति ।अनु॑ ह॒वा अ॑स्मा अ॒सौ तप॒ञ्छ्रियं॑ मन्यते ।अन्व॑स्मै॒ श्रीस्तपो॑ मन्यते । अन्व॑स्मै॒ तपो॒ बलं॑ मन्यते । अन्व॑स्मै॒ बलं॑ प्रा॒णं म॑न्यते ॥ स यदाह॑ ।स॒ज्ञांनं॑ ॅवि॒ज्ञानं॒ दर्.शा॑ दृ॒ष्टेति॑ । ए॒ष ए॒व तत् ।

अथ॒ यदाह॑ । प्रस्तु॑तं॒ ॅविष्टु॑तꣳ सु॒ता सु॑न्व॒तीति॑ । ए॒ष ए॒व तत् ॥ ए॒ष ह्ये॑व तान्यहा॑नि । ए॒ष रात्र॑यः ॥ अथ॒ यदाह॑ । चि॒त्रः के॒तु र्दा॒ता प्र॑दा॒ता स॑वि॒ता प्र॑सवि॒ता ऽभि॑शा॒स्ता ऽनु॑म॒न्तेति॑ । ए॒ष ए॒व तत् । ए॒ष ह्ये॑व तेऽह्नो॑ मुहू॒र्ताः । ए॒ष रात्रेः᳚ ।

अथ॒ यदाह॑ । प॒वित्रं॑ पवयि॒ष्यन्-थ्सह॑स्वा॒न्-थ्सही॑यानरु॒णो॑ ऽरु॒णर॑जा॒ इति॑ । ए॒ष ए॒व तत् । ए॒ष ह्ये॑व ते᳚ ऽद्र्धमा॒साः । ए॒ष मासाः᳚ ॥ अथ॒ यदाह॑ । अ॒ग्नि॒ष्टो॒म उ॒क्थ्यो᳚ऽग्निर्. ऋ॒तुः प्र॒जाप॑तिः सम्ॅवथ्स॒र इति॑ । ए॒ष ए॒व तत् । ए॒ष ह्ये॑व ते य॑ज्ञ्क्र॒तवः॑ । ए॒ष ऋ॒तवः॑

ए॒ष स॑म्ॅवथ्स॒रः ॥ अथ॒ यदाह॑ । इ॒दानीं᳚ त॒दानी॒मिति॑ । ए॒ष ए॒व तत् । ए॒ष ह्ये॑व ते मु॑हू॒र्तानां᳚ मुहू॒र्ताः ॥ ज॒न॒को ह॒ वै दे॑हः । अ॒हो॒रा॒त्रैः स॒माज॑गाम । तꣳ हो॑चुः । यो वा अ॒स्मान्. वेद॑ । वि॒जह॑त्-पा॒प्मान॑मेति

सर्व॒-मायु॑रेति । अ॒भि स्व॒र्गं ॅलो॒कं ज॑यति । नास्या॒-मुष्मि॑न् ॅलो॒केऽन्नं॑ क्षीयत॒ इति॑ ॥ वि॒जह॑द्ध॒ वै पा॒प्मान॑मेति । सर्व॒मायु॑रेति । अ॒भि स्व॒र्गं ॅलो॒कं ज॑यति । नास्या॒-मुष्मि॑न् ॅलो॒के ऽन्नं॑ क्षीयते । य ए॒वं ॅवेद॑ ॥ अही॑ना॒ हाश्व॑त्थ्यः । सा॒वि॒त्रं ॅवि॒दां च॑कार

स ह॑ हꣳ॒॒सो हि॑र॒ण्मयो॑ भू॒त्वा । स्व॒र्गं ॅलो॒कमि॑याय । आ॒दि॒त्यस्य॒ सायु॑ज्यं ॥ हꣳ॒॒सो ह॒वै हि॑र॒ण्मयो॑ भू॒त्वा ।स्व॒र्गं ॅलो॒कमे॑ति । आ॒दि॒त्यस्य॒ सायु॑ज्यं । य ए॒वं ॅवेद॑ ॥ दे॒व॒भा॒गो ह॑ श्रौत॒र्॒.षः । सा॒वि॒त्रं ॅवि॒दां च॑कार । तꣳ ह॒ वागदृ॑श्यमा॒ना ऽभ्यु॑वाच

सर्व॑म्बत गौत॒मो वे॑द । यः सा॑वि॒त्रं ॅवेदेति॑ । स हो॑वाच । कैषा वाग॒सीति॑ । अ॒यम॒हꣳ सा॑वि॒त्रः । दे॒वाना॑-मुत्त॒मो लो॒कः । गुह्यं॒ महो॒ बिभ्र॒दिति॑ । ए॒ताव॑ति ह गौत॒मः । य॒ज्ञो॒प॒वी॒तं कृ॒त्वा-ऽधो निप॑पात । नमो॒ नम॒ इति॑

स हो॑वाच । मा भै॑षी र्गौतम । जि॒तो वै ते॑ लो॒क इति॑ ॥ तस्मा॒द्ये के च॑ सावि॒त्रं ॅवि॒दुः । सर्वे॒ ते जि॒तलो॑काः ॥ स यो ह॒वै सा॑वि॒त्र-स्या॒ष्टाक्ष॑रं प॒दꣳ श्रि॒या ऽभिषि॑क्तं॒ ॅवेद॑ । श्रि॒या है॒वाभिषि॑च्यते । घृणि॒रिति॒ द्वे अ॒क्षरे᳚ । सूर्य॒ इति॒ त्रीणि॑ । आ॒दि॒त्य इति॒ त्रीणि॑

ए॒तद्वै सा॑वि॒त्र-स्या॒ष्टाक्ष॑रं प॒दꣳ श्रि॒याभिषि॑क्तं । य ए॒वं ॅवेद॑ ।श्रि॒या है॒वाभिषि॑च्यते ॥ तदे॒-तदृ॒चा-ऽभ्यु॑क्तं । ऋ॒चो अ॒क्षरे॑ पर॒मे व्यो॑मन्न् । यस्मि॑न् दे॒वा अधि॒ विश्वे॑ निषे॒दुः ।यस्तन्न वेद॒ किमृ॒चा क॑रिष्यति । य इत् तद्वि॒दुस्त इ॒मे समा॑सत॒ इति॑ ॥ न ह॒वा ए॒तस्य॒र्चा न यजु॑षा॒ न साम्ना-ऽर्थो᳚ऽस्ति । यः सा॑वि॒त्रं ॅवेद॑ ।

तदे॒तत् प॑रि॒ यद्दे॑वच॒क्रं । आ॒र्द्रं पिन्व॑मानꣳ स्व॒र्गे लो॒क ए॑ति ।वि॒जह॒द् विश्वा॑ भू॒तानि॑ स॒पंश्य॑त् ॥ आ॒र्द्रो ह॒ वै पिन्व॑मानः स्व॒र्गे लो॒क ए॑ति । वि॒जह॒न् विश्वा॑ भू॒तानि॑ स॒पंश्यन्न्॑ । य ए॒वं ॅवेद॑ ॥ शू॒षो ह॒वै वा᳚र्ष्णे॒यः । आ॒दि॒त्येन॑ स॒माज॑गाम । तꣳ हो॑वाच । एहि॑ सावि॒त्रं ॅवि॑द्धि ( ) । अ॒यं ॅवै स्व॒र्ग्यो᳚ऽग्निः पा॑रयि॒ष्णु-र॒मृता॒-थ्संभू॑त॒ इति॑ । ए॒ष वाव स सा॑वि॒त्रः । य ए॒ष तप॑ति । एहि॒ मां ॅवि॑द्धि । इति॑ है॒वैनं॒ तदु॑वाच ।