ब्रह्म॒ वै चतु॑र्.होतारः । चतु॑र्.होतृ॒भ्योऽधि॑ य॒ज्ञो निर्मि॑तः । नैनꣳ॑ श॒प्तं । नाभिच॑रित॒-माग॑च्छति । य ए॒वं ॅवेद॑ ॥ यो ह॒ वै चतु॑र्.होतृणां चतुर्.होतृ॒त्वं ॅवेद॑ । अथो॒ पञ्च॑ होतृत्वं । सर्वा॑ हास्मै॒ दिशः॑ कल्पन्ते ।वा॒चस्पति॒र्॒. होता॒ दश॑होतॄणां । पृ॒थि॒वी होता॒ चतु॑र्.होतॄणां

अ॒ग्निर्. होता॒ पञ्च॑होतॄणां । वाग्घोता॒ षड्ढो॑तॄणां ।म॒हाह॑वि॒र्॒. होता॑ स॒प्तहो॑तॄणां । ए॒तद्वै चतु॑र्.होतृणां चतुर्.होतृ॒त्वं ।अथो॒ पञ्च॑होतृत्वं । सर्वा॑ हास्मै॒ दिशः॑ कल्पन्ते । य ए॒वं ॅवेद॑ ॥ए॒षा वै स॑र्व वि॒द्या । ए॒तद् भे॑ष॒जं ।ए॒षा प॒ङ्क्तिः स्व॒र्गस्य॑ लो॒कस्यां᳚ ज॒साय॑निः स्रु॒तिः

ए॒तान्. योऽद्ध्यै-त्यछ॑दिर्द॒र्॒.शे याव॑त्त॒रसं᳚ । स्व॑रेति । अ॒न॒प॒ब्र॒वः सर्व॒मायु॑रेति । वि॒न्दते᳚ प्र॒जां । रा॒यस्पोषं॑ गौप॒त्यं । ब्र॒ह्म॒व॒र्च॒सी भ॑वति ॥ ए॒तान्. योऽद्ध्यैति॑ । स्पृ॒णोत्या॒त्मानं᳚ । प्र॒जां पि॒तॄन् ॥ ए॒तान्. वा अ॑रु॒ण औ॑पवे॒शि र्वि॒दाञ्च॑कार

ए॒तैर॑धिवा॒दमपा॑जयत् । अथो॒ विश्वं॑ पा॒प्मानं᳚ । स्व॑र्ययौ । ए॒तान्. योऽद्ध्यैति॑ । अ॒धि॒वा॒दं ज॑यति । अथो॒ विश्वं॑ पा॒प्मानं᳚ । स्व॑रेति ॥ ए॒तैर॒ग्निं चि॑न्वीत स्व॒र्गका॑मः ।ए॒तैरायु॑ष्कामः । प्र॒जा प॒शुका॑मो वा ।

पु॒रस्ता॒-द्दश॑होतार॒-मुद॑ञ्च॒-मुप॑दधाति यावत्प॒दं । हृद॑यं॒ ॅयजु॑षी॒ पत्न्यौ॑ च । द॒क्षि॒ण॒तः प्राञ्चं॒ चतु॑र्.होतारं ।प॒श्चादुद॑ञ्चं॒ पञ्च॑ होतारं । उ॒त्त॒र॒तः प्राञ्चꣳ॒॒ षड्ढो॑तारं ।उ॒परि॑ष्टा॒त् प्राञ्चꣳ॑ स॒प्तहो॑तारं । हृद॑यं॒ ॅयजूꣳ॑षि॒ पत्न्य॑श्च । य॒था॒व॒का॒शं ग्रहान्॑ । य॒था॒व॒का॒शं प्र॑तिग्र॒हान् ॅलो॑कं पृ॒णाश्च॑ ।सर्वा॑ हास्यै॒ता दे॒वताः᳚ प्री॒ता अ॒भीष्टा॑ भवन्ति

सदे॑वम॒ग्निं चि॑नुते ॥ र॒थस॑मिंत-श्चेत॒व्यः॑ । वज्रो॒ वै रथः॑ ।वज्रे॑णै॒व पा॒प्मानं॒ भ्रातृ॑व्यꣳ स्तृणुते । प॒क्षः स॑मिंत-श्चेत॒व्यः॑ । ए॒तावा॒न॒. वै रथः॑ । याव॑त्प॒क्षः । र॒थस॑मिंतमे॒व चि॑नुते ॥ इ॒ममे॒व लो॒कं प॑शुब॒न्धेना॒भिज॑यति । अथो॑ अग्निष्टो॒मेन॑

अ॒न्तरि॑क्ष-मु॒क्थ्ये॑न । स्व॑रतिरा॒त्रेण॑ । सर्वा᳚न् ॅलो॒कान॑ही॒नेन॑ । अथो॑ स॒त्रेण॑ ॥ वरो॒ दक्षि॑णा । वरे॑णै॒व वरꣳ॑ स्पृणोति ।आ॒त्मा हि वरः॑ ॥ एक॑विꣳशति॒ र्दक्षि॑णा ददाति । ए॒क॒विꣳ॒॒शो वा इ॒तः स्व॒र्गो लो॒कः । प्रस्व॒र्गं ॅलो॒कमा᳚प्नोति

अ॒सावा॑दि॒त्य ए॑कविꣳ॒॒शः । अ॒मुमे॒वा-दि॒त्यमा᳚प्नोति ॥ श॒तं द॑दाति । श॒तायुः॒ पुरु॑षः श॒तेन्द्रि॑यः । आयु॑ष्ये॒वेन्द्रि॒ये प्रति॑तिष्ठति ॥ स॒हस्रं॑ ददाति ।स॒हस्र॑ संमितः स्व॒र्गो लो॒कः । स्व॒र्गस्य॑ लो॒कस्या॒-भिजि॑त्यै ॥ अ॒न्वि॒ष्ट॒कं दक्षि॑णा ददाति । सर्वा॑णि॒ वयाꣳ॑सि

सर्व॒स्याप्त्यै᳚ । सर्व॒स्या-व॑रुद्ध्यै ॥ यदि॒ न वि॒न्देत॑ । म॒न्थाने॑ताव॒तो द॑द्यादोद॒नान्. वा᳚ । अ॒श्नु॒ते तं कामं᳚ । यस्मै॒ कामा॑या॒-ग्निश्ची॒यते᳚ ॥ प॒ष्ठौ॒हीं त्व॒न्तर्व॑तीं दद्यात् ।सा हि सर्वा॑णि॒ वयाꣳ॑सि । सर्व॒स्याप्त्यै᳚ । सर्व॒स्या-व॑रुद्ध्यै ।

हिर॑ण्यं ददाति । हिर॑ण्य-ज्योतिरे॒व स्व॒र्गं ॅलो॒कमे॑ति ॥ वासो॑ ददाति । तेनायुः॒ प्रति॑रते ॥ वे॒दि॒तृ॒ती॒ये य॑जेत । त्रिष॑त्या॒ हि दे॒वाः । स स॑त्यम॒ग्निं चि॑नुते ॥ तदे॒तत् प॑शुब॒न्धे ब्राह्म॑णं ब्रूयात् । नेत॑रेषु य॒ज्ञेषु॑ ॥ यो ह॒ वै चतु॑र्.होतॄ-ननुसव॒नं त॑र्पयित॒व्यान्॑. वेद॑

तृप्य॑ति प्र॒जया॑ प॒शुभिः॑ । उपै॑नꣳ सोमपी॒थो न॑मति ।ए॒ते वै चतु॑र्.होतारो ऽनुसव॒नं त॑र्पयित॒व्याः᳚ । ये ब्रा᳚ह्म॒णा ब॑हु॒विदः॑ ।तेभ्यो॒ यद्दक्षि॑णा॒ न नये᳚त् । दुरि॑ष्टꣳ स्यात् । अ॒ग्निम॑स्य वृञ्जीरन्न् । तेभ्यो॑ यथा श्र॒द्धं द॑द्यात् । स्वि॑ष्टमे॒वैतत्क्रि॑यते । नास्या॒ग्निं ॅवृ॑ञ्जते ।

हि॒र॒ण्ये॒ष्ट॒को भ॑वति । याव॑दुत्त॒म-म॑ङ्गुलि-का॒ण्डं ॅय॑ज्ञ् प॒रुषा॒ संमि॑तं ।तेजो॒ हिर॑ण्यं ॥ यदि॒ हिर॑ण्यं॒ न वि॒न्देत् । शर्क॑रा अ॒क्ता उप॑दद्ध्यात् । तेजो॑ घृ॒तं । सते॑जसमे॒-वाग्निं चि॑नुते ॥ अ॒ग्निञ्चि॒त्वा सौ᳚त्राम॒ण्या य॑जेत मैत्रावरु॒ण्या वा᳚ । वी॒र्ये॑ण॒ वा ए॒ष व्यृ॑द्ध्यते । यो᳚ऽग्निञ्चि॑नु॒ते ( )

याव॑दे॒व वी॒र्यं᳚ । तद॑स्मिन् दधाति ॥ ब्रह्म॑णः॒ सायु॑ज्यꣳ सलो॒कता॑-माप्नोति । ए॒तासा॑मे॒व दे॒वता॑नाꣳ॒॒ सायु॑ज्यं । सा॒र्ष्टिताꣳ॑ समान लो॒कता॑-माप्नोति । य ए॒तम॒ग्निं चि॑नु॒ते । य उ॑चैनमे॒वं ॅवेद॑ ॥ ए॒तदे॒व सा॑वि॒त्रे ब्राह्म॑णं । अथो॑ नाचिके॒ते ।