सर्वा॒ दिशो॑ दि॒क्षु । यच्चा॒न्त र्भू॒तं प्रति॑ष्ठितं । सर्वा॒स्ता इष्ट॑काः कृ॒त्वा । उप॑ काम॒दुघा॑ दधे ।तेनर्.षि॑णा॒ तेन॒ ब्रह्म॑णा । तया॑ दे॒वत॑या-ऽङ्गिर॒स्वद्-ध्रु॒वा सी॑द ॥अ॒न्तरि॑क्षञ्च॒ केव॑लं । यच्चा॒स्मि-न्न॑न्त॒राहि॑तं ।सर्वा॒स्ताः ॥ आ॒न्त॒रि॒क्ष्य॑श्च॒ याः प्र॒जाः

ग॒न्ध॒र्वा॒॒-फ्स॒रस॑श्च॒ ये । सर्वा॒स्ताः ॥ सर्वा॑-नुदा॒रान्-थ्स॒लिलान्॑ ।अ॒न्तरि॑क्षे॒ प्रति॑ष्ठितान् । सर्वा॒स्ताः ॥ सर्वा॑-नुदा॒रान्-थ्स॑लि॒लान् ।स्था॒व॒राः प्रो॒ष्या᳚श्च॒ ये । सर्वा॒स्ताः ॥ सर्वां॒ धुनिꣳ॒॒ सर्वा᳚न्-ध्वꣳ॒॒सान् । हि॒मो यच्च॑ शी॒यते᳚

सर्वा॒स्ताः ॥ सर्वा॒न् मरी॑ची॒न॒. वित॑तान् । नी॒हा॒रो यच्च॑ शी॒यते᳚ । सर्वा॒स्ताः ॥ सर्वा॑ वि॒द्युतः॒ सर्वा᳚न्थ् स्तनयि॒त्नून् । ह्रा॒दुनी॒ र्यच्च॑ शी॒यते᳚ । सर्वा॒स्ताः ॥ सर्वाः॒ स्रव॑न्तीः स॒रितः॑ । सर्व॑मफ्सु च॒रञ्च॒ यत् । सर्वा॒स्ताः ।

याश्च॒ कूप्या॒ याश्च॑ ना॒द्याः᳚ समु॒द्रियाः᳚ । याश्च॑ वैश॒न्तीरु॒त प्रा॑स॒चीर्याः । सर्वा॒स्ताः ॥ ये चो॒त्तिष्ठ॑न्ति जी॒मूताः᳚ । याश्च॒ वर्.ष॑न्ति वृ॒ष्टयः॑ । सर्वा॒स्ताः ॥ तप॒स्तेज॑ आका॒शं । यच्चा॑का॒शे प्रति॑ष्ठितं । सर्वा॒स्ताः ॥ वा॒युं ॅवयाꣳ॑सि॒ सर्वा॑णि

अ॒न्त॒रि॒क्ष॒च॒रञ्च॒ यत् । सर्वा॒स्ताः ॥ अ॒ग्निꣳ सूर्यं॑ च॒न्द्रं । मि॒त्रं ॅवरु॑णं॒ भगं᳚ । सर्वा॒स्ताः ॥ स॒त्यꣳ श्र॒द्धां तपो॒ दमं᳚ । नाम॑ रू॒पञ्च॑ भू॒तानां᳚ । सर्वा॒स्ता इष्ट॑काः कृ॒त्वा । उप॑ काम॒दुघा॑ दधे । तेनर्.षि॑णा॒ तेन॒ ब्रह्म॑णा ( ) । तया॑ दे॒वत॑या-ऽङ्गिर॒स्वद्-ध्रु॒वा सी॑द ।