यच्चा॒मृतं॒ ॅयच्च मर्त्यं᳚ । यच्च॒ प्राणि॑ति॒ यच्च॒ न । सर्वा॒स्ता इष्ट॑काः कृ॒त्वा । उप॑ काम॒दुघा॑ दधे । तेनर्.षि॑णा॒ तेन॒ ब्रह्म॑णा । तया॑ दे॒वत॑या-ऽङ्गिर॒स्वद्-ध्रु॒वा सी॑द ॥ सर्वाः॒ स्त्रियः॒ सर्वा᳚न् पुꣳ॒॒सः । सर्वं॒ न स्त्री॑-पुमञ्च॒ यत् ।सर्वा॒स्ताः ॥ याव॑न्तः पाꣳ॒॒सवो॒ भूमेः᳚

सङ्ख्या॑ता देवमा॒यया᳚ । सर्वा॒स्ताः ॥ याव॑न्त॒ ऊषाः᳚ पशू॒नां । पृ॒थि॒व्यां पुष्टि॑ र्हि॒ताः । सर्वा॒स्ताः ॥ याव॑तीः॒ सिक॑ताः॒ सर्वाः᳚ ।अ॒फ्स्व॑न्तश्च॒ याः श्रि॒ताः । सर्वा॒स्ताः ॥ याव॑तीः॒ शर्क॑रा॒ धृत्यै᳚ । अ॒स्यां पृ॑थि॒व्यामधि॑

सर्वा॒स्ताः ॥ याव॒न्तो-ऽश्मा॑नो॒ऽस्यां पृ॑थि॒व्यां । प्र॒ति॒ष्ठासु॒ प्रति॑ष्ठिताः । सर्वा॒स्ताः ॥ याव॑ती र्वी॒रुधः॒ सर्वाः᳚ ।विष्ठि॑ताः पृथि॒वीमनु॑ । सर्वा॒स्ताः ॥ याव॑ती॒रोष॑धीः॒ सर्वाः᳚ ।विष्ठि॑ताः पृथि॒वीमनु॑ । सर्वा॒स्ताः ।

याव॑न्तो॒ वन॒स्पत॑यः । अ॒स्यां पृ॑थि॒व्यामधि॑ । सर्वा॒स्ताः ॥याव॑न्तो ग्रा॒म्याः प॒शवः॒ सर्वे᳚ । आ॒र॒ण्याश्च॒ ये । सर्वा॒स्ताः ॥ ये द्वि॒पाद॒-श्चतु॑ष्पादः । अ॒पाद॑ उदरस॒र्पिणः॑ ।सर्वा॒स्ताः ॥ याव॒दाञ्ज॑-नमु॒च्यते᳚

दे॒व॒त्रा यच्च॑ मानु॒षं । सर्वा॒स्ताः ॥ याव॑त्कृ॒ष्णाय॑सꣳ॒॒ सर्वं᳚ ।दे॒व॒त्रा यच्च॑ मानु॒षं । सर्वा॒स्ताः ॥ याव॑ ल्लो॒हाय॑सꣳ॒॒ सर्वं᳚ ।दे॒व॒त्रा यच्च॑ मानु॒षं । सर्वा॒स्ताः ॥ सर्वꣳ॒॒ सीसꣳ॒॒ सर्वं॒ त्रपु॑ ।दे॒व॒त्रा यच्च॑ मानु॒षं

सर्वा॒स्ताः ॥ सर्वꣳ॒॒ हिर॑ण्यꣳ रज॒तं । दे॒व॒त्रा यच्च॑ मानु॒षं ।सर्वा॒स्ताः ॥ सर्वꣳ॒॒ सुव॑र्णꣳ॒॒ हरि॑तं । दे॒व॒त्रा यच्च॑ मानु॒षं । सर्वा॒स्ता इष्ट॑काः कृ॒त्वा । उप॑काम॒दुघा॑ दधे । तेनर्.षि॑णा॒ तेन॒ ब्रह्म॑णा । तया॑ दे॒वत॑या-ऽङ्गिर॒स्वद्-ध्रु॒वा सी॑द ( ) ।