नं॑ ॅलो॒कं ग॑मयि॒त्वा क्री॑णाति॒ गच्छ॑ति॒ स्वानाꣳ॒॒ साम्रा᳚ज्यं॒ ॅयो वै ता॑नून॒प्त्रस्य॑ प्रति॒ष्ठां ॅवेद॒ प्रत्ये॒व ति॑ष्ठति ब्रह्मवा॒दिनो॑ वदन्ति॒ न प्रा॒श्नन्ति॒ न जु॑ह्व॒त्यथ॒ क्व॑ तानून॒प्त्रं प्रति॑ तिष्ठ॒तीति॑ प्र॒जाप॑तौ॒ मन॒सीति॑ ब्रूया॒त् त्रिरव॑ जिघ्रेत् प्र॒जाप॑तौ त्वा॒ मन॑सि जुहो॒मीत्ये॒षा वै ता॑नून॒प्त्रस्य॑ प्रति॒ष्ठा य ए॒वं ॅवेद॒ प्रत्ये॒व ति॑ष्ठति॒ यो - [ ]
पदपाठः (Word-by-word)
ए॒न॒म् । लो॒कम् । ग॒म॒यि॒त्वा । क्री॒णा॒ति॒ । गच्छ॑ति । स्वाना᳚म् । साम्रा᳚ज्य॒मिति॒ साम् - रा॒ज्य॒म् । यः । वै । ता॒नू॒न॒प्त्रस्येति॑ तानू - न॒प्त्रस्य॑ । प्र॒ति॒ष्ठामिति॑ प्रति - स्थाम् । वेद॑ । प्रतीति॑ । ए॒व । ति॒ष्ठ॒ति॒ । ब्र॒ह्म॒वा॒दिन॒ इति॑ ब्रह्म - वा॒दिनः॑ । व॒द॒न्ति॒ । न । प्रा॒श्नन्तीति॑ प्र - अ॒श्नन्ति॑ । न । जु॒ह्व॒ति॒ । अथ॑ । क्व॑ । ता॒नू॒न॒प्त्रमिति॑ तानू - न॒प्त्रम् । प्रतीति॑ । ति॒ष्ठ॒ति॒ । इति॑ । प्र॒जाप॑ता॒विति॑ प्र॒जा-प॒तौ॒ । मन॑सि । इति॑ । ब्रू॒या॒त् । त्रिः । अवेति॑ । जि॒घ्रे॒त् । प्र॒जाप॑ता॒विति॑ प्र॒जा - प॒तौ॒ । त्वा॒ । मन॑सि । जु॒हो॒मि॒ । इति॑ । ए॒षा । वै । ता॒नू॒न॒प्त्रस्येति॑ तानू - न॒प्त्रस्य॑ । प्र॒ति॒ष्ठेति॑ प्रति - स्था । यः । ए॒वम् । वेद॑ । प्रतीति॑ । ए॒व । ति॒ष्ठ॒ति॒ । यः ।