उद॑स्थाद्-दे॒व्यदि॑तिर्-विश्वरू॒पी । आयु॑र्य॒ज्ञ्प॑तावधात् । इन्द्रा॑य कृण्व॒ती भा॒गम् । मि॒त्राय॒ वरु॑णाय च ॥ इ॒यं ॅवा अ॑ग्निहो॒त्री । इ॒यं ॅवा ए॒तस्य॒ निषी॑दति । यस्या᳚ग्निहो॒त्री नि॒षीद॑ति । तामुत्था॑पयेत् । उद॑स्थाद्-दे॒व्यदि॑ति॒रिति॑ । इ॒यं ॅवै दे॒व्यदि॑तिः

इ॒मामे॒वास्मा॒ उत्था॑पयति ॥ आयु॑र्य॒ज्ञ्प॑तावधा॒दित्या॑ह । आयु॑रे॒वास्मि॑न् दधाति ॥ इन्द्रा॑य कृण्व॒ती भा॒गं मि॒त्राय॒ वरु॑णाय॒ चेत्या॑ह । य॒था॒ य॒जुरे॒वैतत् ॥ अव॑र्तिं॒ ॅवा ए॒षैतस्य॑ पा॒प्मानं॑ प्रति॒ख्याय॒ निषी॑दति । यस्या᳚-ग्निहो॒त्र्युप॑सृष्टा नि॒षीद॑ति । तां दु॒ग्ध्वा ब्रा᳚ह्म॒णाय॑ दद्यात् । यस्यान्नं॒ नाद्यात् । अव॑र्तिमे॒वास्मि॑न् पा॒प्मानं॒ प्रति॑मुञ्चति ।

दु॒ग्ध्वा द॑दाति । न ह्यदृ॑ष्टा॒ दक्षि॑णा दी॒यते᳚ ॥ पृ॒थि॒वीं ॅवा ए॒तस्य॒ पयः॒ प्रवि॑शति । यस्या᳚ग्निहो॒त्रं दु॒ह्यमा॑नꣳ॒॒ स्कन्द॑ति ॥ यद॒द्य दु॒ग्धं पृ॑थि॒वीमस॑क्त । यदोष॑धी-र॒प्यस॑र॒द्-यदापः॑ । पयो॑ गृ॒हेषु॒ पयो॑ अघ्नि॒यासु॑ । पयो॑ व॒थ्सेषु॒ पयो॑ अस्तु॒ तन्मयीत्या॑ह । पय॑ ए॒वात्मन् गृ॒हेषु॑ प॒शुषु॑ धत्ते ॥ अ॒प उप॑सृजति

अ॒द्भिरे॒वैन॑दाप्नोति ॥ यो वै य॒ज्ञ्स्यार्ते॒नाना᳚र्तꣳ सꣳ सृ॒जति॑ । उ॒भे वै ते तर्ह्यार्च्छ॑तः । आर्च्छ॑ति॒ खलु॒ वा ए॒तद॑ग्निहो॒त्रम् । यद्-दु॒ह्यमा॑नꣳ॒॒ स्कन्द॑ति । यद॑भिदु॒ह्यात् । आर्ते॒नाना᳚र्तं ॅय॒ज्ञ्स्य॒ सꣳसृ॑जेत् । तदे॒व या॒दृक्की॒दृक्च॑ होत॒व्य᳚म् । अथा॒न्यां दु॒ग्ध्वा पुन॑र्.-होत॒व्य᳚म् । अना᳚र्तेनै॒वार्तं॑ ॅय॒ज्ञ्स्य॒ निष्क॑रोति ।

यद्-युद्द्रु॑तस्य॒ स्कन्दे᳚त् । यत् ततोऽहु॑त्वा॒ पुन॑रे॒यात् । य॒ज्ञ्ं ॅविच्छि॑न्द्यात् । यत्र॒ स्कन्दे᳚त् । तन्नि॒षद्य॒ पुन॑र्गृह्णीयात् । यत्रै॒व स्कन्द॑ति । तत॑ ए॒वैन॒त्-पुन॑र्गृह्णाति । तदे॒व या॒दृक्-की॒दृक्च॑ होत॒व्य᳚म् । अथा॒न्यां दु॒ग्ध्वा पुन॑र्.-होत॒व्य᳚म् । अना᳚र्तेनै॒वार्तं॑ ॅय॒ज्ञ्स्य॒ निष्क॑रोति ।

वि वा ए॒तस्य॑ य॒ज्ञ्श्छि॑द्यते । यस्या᳚ग्निहो॒त्रे॑ऽधिश्रि॑ते॒ श्वाऽन्त॒रा धाव॑ति । रु॒द्रः खलु॒ वा ए॒षः । यद॒ग्निः । यद्-गाम॑न्वत्याव॒र्तये᳚त् । रु॒द्राय॑ प॒शू-नपि॑दद्ध्यात् । अ॒प॒शुर्-यज॑मानः स्यात् । यद॒पो᳚ ऽन्वतिषि॒ञ्चेत् । अ॒ना॒द्य-म॒ग्नेरापः॑ । अ॒ना॒द्यमा᳚भ्या॒-मपि॑दद्ध्यात् ( ) । गार्.ह॑पत्या॒द्-भस्मा॒दाय॑ । इ॒दं ॅविष्णु॒र्-विच॑क्रम॒ इति॑ वैष्ण॒व्यर्चा ऽऽह॑व॒नीया᳚द्ध्वꣳ॒॒ सय॒न्नुद्र॑वेत् । य॒ज्ञो वै विष्णुः॑ । य॒ज्ञेनै॒व य॒ज्ञ्ꣳ सन्त॑नोति । भस्म॑ना प॒दमपि॑वपति॒ शान्त्यै᳚ ।