शतमूर्द्धञ्छ॒तं ते᳚ प्रा॒णाः स॒हस्र॑मपा॒नाः । त्वꣳ सा॑ह॒स्रस्य॑ रा॒य ई॑शिषे॒ तस्मै॑ ते विधेम॒ वाजा॑य॒ स्वाहा᳚ ॥ सु॒प॒र्णो॑ऽसि ग॒रुत्मा᳚न् पृथि॒व्याꣳ सी॑द पृ॒ष्ठे पृ॑थि॒व्याः सी॑द भा॒साऽ*न्तरि॑क्ष॒मा पृ॑ण॒ ज्योति॑षा॒ दिव॒मुत्त॑भान॒ तेज॑सा॒ दिश॒ उद् दृꣳ॑ह ॥ आ॒जुह्वा॑नः सु॒प्रती॑कः पु॒रस्ता॒दग्ने॒ स्वां ॅयोनि॒मा सी॑द सा॒द्ध्या । अ॒स्मिन्थ्-स॒धस्थे॒ अद्ध्युत्त॑रस्मि॒न् विश्वे॑ देवा॒ - [ ]
पदपाठः (Word-by-word)
श॒त॒मू॒द्र्ध॒न्निति॑ शत - मू॒र्ध॒न्न् । श॒तम् । ते॒ । प्रा॒णा इति॑ प्र-अ॒नाः । स॒हस्र᳚म् । अ॒पा॒न इत्य॑प - अ॒नाः ॥ त्वम् । सा॒ह॒स्रस्य॑ । रा॒यः । ई॒शि॒षे॒ । तस्मै᳚ । ते॒ । वि॒धे॒म॒ । वाजा॑य । स्वाहा᳚ ॥ सु॒प॒र्ण॒ इति॑ सु-प॒र्णः । अ॒सि॒ । ग॒रुत्मान्॑ । पृ॒थि॒व्याम् । सी॒द॒ । पृ॒ष्ठे । पृ॒थि॒व्याः । सी॒द॒ । भा॒सा । अ॒न्तरि॑क्षम् । एति॑ । पृ॒ण॒ । ज्योति॑षा । दिव᳚म् । उदिति॑ । स्त॒भा॒न॒ । तेज॑सा । दिशः॑ । उदिति॑ । दृꣳ॒॒ह॒ ॥ आ॒जुह्वा॑न॒ इत्या᳚ - जुह्वा॑नः । सु॒प्रती॑क॒ इति॑ सु - प्रती॑कः । पु॒रस्ता᳚त् । अग्ने᳚ । स्वाम् । योनि᳚म् । एति॑ । सी॒द॒ । सा॒द्ध्या ॥ अ॒स्मिन्न् । स॒धस्थ॒ इति॑ स॒ध - स्थे॒ । अधीति॑ । उत्त॑रस्मि॒न्नित्युत् - त॒र॒स्मि॒न्न् । विश्वे᳚ । दे॒वाः॒ ।