यत् । अक्र॑न्दः । प्र॒थ॒मम् । जाय॑मानः । उ॒द्यन्नित्यु॑त्-यन्न् । स॒मु॒द्रात् । उ॒त । वा॒ । पुरी॑षात् ॥ श्ये॒नस्य॑ । प॒क्षा । ह॒रि॒णस्य॑ । बा॒हू इति॑ । उ॒प॒स्तुत्य॒मित्यु॑प - स्तुत्य᳚म् । महि॑ । जा॒तम् । ते॒ । अ॒र्व॒न्न् ॥ य॒मेन॑ । द॒त्तम् । त्रि॒तः । ए॒न॒म् । आ॒यु॒न॒क् । इन्द्रः॑ । ए॒न॒म् । प्र॒थ॒मः । अधीति॑ । अ॒ति॒ष्ठ॒त् ॥ ग॒न्ध॒र्वः । अ॒स्य॒ । र॒श॒नाम् । अ॒गृ॒भ्णा॒त् । सूरा᳚त् । अश्व᳚म् । व॒स॒वः॒ । निरिति॑ । अ॒त॒ष्ट॒ ॥ असि॑ । य॒मः । असि॑ । आ॒दि॒त्यः । अ॒र्व॒न्न् । असि॑ । त्रि॒तः । गुह्ये॑न । व्र॒तेन॑ ॥ असि॑ । सोमे॑न । स॒मया᳚ । विपृ॑क्त॒ इति॒ वि - पृ॒क्तः॒ ।

आ॒हुः । ते॒ । त्रीणि॑ । दि॒वि । बन्ध॑नानि ॥ त्रीणि॑ । ते॒ । आ॒हुः॒ । दि॒वि । बन्ध॑नानि । त्रीणि॑ । अ॒फ्स्वित्य॑प् - सु । त्रीणि॑ । अ॒न्तः । स॒मु॒द्रे ॥ उ॒त । इ॒व॒ । मे॒ । वरु॑णः । छ॒न्थ्सि॒ । अ॒र्व॒न्न् । यत्र॑ । ते॒ । आ॒हुः । प॒र॒मम् । ज॒नित्र᳚म् ॥ इ॒मा । ते॒ । वा॒जि॒न्न् । अ॒व॒मार्ज॑ना॒नीत्य॑व - मार्ज॑नानि । इ॒मा । श॒फाना᳚म् । स॒नि॒तुः । नि॒धानेति॑ नि - धाना᳚ ॥ अत्र॑ । ते॒ । भ॒द्राः । र॒श॒नाः । अ॒प॒श्य॒म् । ऋ॒तस्य॑ । याः । अ॒भि॒रक्ष॒न्तीय॑भि - रक्ष॑न्ति । गो॒पा इति॑ गो - पाः ॥ आ॒त्मान᳚म् । ते॒ । मन॑सा । आ॒रात् । अ॒जा॒ना॒म् । अ॒वः । दि॒वा ।

प॒तय॑न्तम् । प॒त॒ङ्गम् ॥ शिरः॑ । अ॒प॒श्य॒म् । प॒थिभि॒रिति॑ प॒थि - भिः॒ । सु॒गेभि॒रिति॑ सु - गेभिः॑ । अ॒रे॒णुभि॒रित्य॑रे॒णु - भिः॒ । जेह॑मानम् । प॒त॒त्रि ॥ अत्र॑ । ते॒ । रू॒पम् । उ॒त्त॒ममित्यु॑त् - त॒मम् । अ॒प॒श्य॒म् । जिगी॑षमाणम् । इ॒षः । एति॑ । प॒दे । गोः ॥ य॒दा । ते॒ । मर्तः॑ । अन्विति॑ । भोग᳚म् । आन॑ट् । आत् । इत् । ग्रसि॑ष्ठः । ओष॑धीः । अ॒जी॒गः॒ ॥ अन्विति॑ । त्वा॒ । रथः॑ । अन्विति॑ । मर्यः॑ । अ॒र्व॒न्न् । अन्विति॑ । गावः॑ । अन्विति॑ । भगः॑ । क॒नीना᳚म् ॥ अन्विति॑ । व्राता॑सः । तव॑ । स॒ख्यम् । ई॒युः॒ । अन्विति॑ । दे॒वाः । म॒मि॒रे॒ । वी॒र्य᳚म् ।

ते॒ ॥ हिर॑ण्यशृङ्ग॒ इति॒ हिर॑ण्य - शृ॒ङ्गः॒ । अयः॑ । अ॒स्य॒ । पादाः᳚ । मनो॑जवा॒ इति॒ मनः॑ - ज॒वाः॒ । अव॑रः । इन्द्रः॑ । आ॒सी॒त् ॥ दे॒वाः । इत् । अ॒स्य॒ । ह॒वि॒रद्य॒मिति॑ हविः - अद्य᳚म् । आ॒य॒न्न् । यः । अर्व॑न्तम् । प्र॒थ॒मः । अ॒द्ध्यति॑ष्ठ॒दित्य॑धि - अति॑ष्ठत् ॥ ई॒र्मान्ता॑स॒ इती॒र्म-अ॒न्ता॒सः॒ । सिलि॑कमद्ध्यमास॒ इति॒ सिलि॑क-म॒द्ध्य॒मा॒सः॒ । समिति॑ । शूर॑णासः । दि॒व्यासः॑ । अत्याः᳚ ॥ हꣳ॒॒साः । इ॒व॒ । श्रे॒णि॒श इति॑ श्रेणि - शः । य॒त॒न्ते॒ । यत् । आक्षि॑षुः । दि॒व्यम् । अज्म᳚म् । अश्वाः᳚ ॥ तव॑ । शरी॑रम् । प॒त॒यि॒ष्णु । अ॒र्व॒न्न् । तव॑ । चि॒त्तम् । वातः॑ । इ॒व॒ । ध्रजी॑मान् ॥ तव॑ । शृङ्गा॑णि । विष्ठि॒तेति॒ वि - स्थि॒ता॒ । पु॒रु॒त्रेति॑ पुरु - त्रा । अर॑ण्येषु । जर्भु॑राणा । च॒र॒न्ति॒ ॥ उप॑ ।

प्रेति॑ । अ॒गा॒त् । शस॑नम् । वा॒जी । अर्वा᳚ । दे॒व॒द्रीचेति॑ देव-द्रीचा᳚ । मन॑सा । दीद्ध्या॑नः ॥ अ॒जः । पु॒रः । नी॒य॒ते॒ । नाभिः॑ । अ॒स्य॒ । अन्विति॑ । प॒श्चात् । क॒वयः॑ । य॒न्ति॒ । रे॒भाः ॥ उप॑ । प्रेति॑ । अ॒गा॒त् । प॒र॒मम् । यत् । स॒धस्थ॒मिति॑ स॒ध - स्थ॒म् । अर्वान्॑ । अच्छ॑ । पि॒तर᳚म् । मा॒तर᳚म् । च॒ ॥ अ॒द्य । दे॒वान् । जुष्ट॑तम॒ इति॒ जुष्ट॑ - त॒मः॒ । हि । ग॒म्याः । अथ॑ । एति॑ । शा॒स्ते॒ । दा॒शुषे᳚ । वार्या॑णि ॥