चतु॑ष्पादो॒ हि प॒शवो॒ यं का॒मये॑ता प॒शुः स्या॒दित्य॑मे॒दस्कं॒ तस्मा॒ आ द॑द्ध्या॒न्मेदो॑रूपा॒ वै प॒शवो॑ रू॒पेणै॒वैनं॑ प॒शुभ्यो॒ निर्भ॑जत्यप॒शुरे॒व भ॑वति॒ यं का॒मये॑त पशु॒मान्थ् स्या॒दिति॒ मेद॑स्व॒त् तस्मा॒ आ द॑द्ध्या॒न्मेदो॑रूपा॒ वै प॒शवो॑ रू॒पेणै॒वास्मै॑ प॒शूनव॑ रुन्धे पशु॒माने॒व भ॑वति प्र॒जाप॑तिर्य॒ज्ञ्म॑सृजत॒ स आज्यं॑- [ ]
पदपाठः (Word-by-word)
चतु॑ष्पाद॒ इति॒ चतुः॑ - पा॒दः॒ । हि । प॒शवः॑ । यम् । का॒मये॑त । अ॒प॒शुः । स्या॒त् । इति॑ । अ॒मे॒दस्क॒मित्य॑मे॒दः-क॒म् । तस्मै᳚ । एति॑ । द॒द्ध्या॒त् । मेदो॑रूपा॒ इति॒ मेदः॑-रू॒पाः॒ । वै । प॒शवः॑ । रू॒पेण॑ । ए॒व । ए॒न॒म् । प॒शुभ्य॒ इति॑ प॒शु-भ्यः॒ । निरिति॑ । भ॒ज॒ति॒ । अ॒प॒शुः । ए॒व । भ॒व॒ति॒ । यम् । का॒मये॑त । प॒शु॒मानिति॑ पशु - मान् । स्या॒त् । इति॑ । मेद॑स्वत् । तस्मै᳚ । एति॑ । द॒द्ध्या॒त् । मेदो॑रूपा॒ इति॒ मेदः॑ - रू॒पाः॒ । वै । प॒शवः॑ । रू॒पेण॑ । ए॒व । अ॒स्मै॒ । प॒शून् । अवेति॑ । रु॒न्धे॒ । प॒शु॒मानिति॑ पशु - मान् । ए॒व । भ॒व॒ति॒ । प्र॒जाप॑ति॒रिति॑ प्र॒जा-प॒तिः॒ । य॒ज्ञ्म् । अ॒सृ॒ज॒त॒ । सः । आज्यं᳚ ।