उ॒त्त॒राव॑तीं॒ ॅवै दे॒वा आहु॑ति॒मजु॑हवुः । अवा॑ची॒मसु॑राः । ततो॑ दे॒वा अभ॑वन्न् । पराऽसु॑राः । यं का॒मये॑त॒ वसी॑यान्थ् स्या॒दिति॑ । कनी॑य॒स्तस्य॒ पूर्वꣳ॑ हु॒त्वा । उत्त॑रं॒ भूयो॑ जुहुयात् । ए॒षा वा उ॑त्त॒राव॒त्याहु॑तिः । तां दे॒वा अ॑जुहवुः । तत॒स्ते॑ऽभवन्न्

यस्यै॒वं जुह्व॑ति । भव॑त्ये॒व ॥ यं का॒मये॑त॒ पापी॑यान्थ् स्या॒दिति॑ । भूय॒स्तस्य॒ पूर्वꣳ॑ हु॒त्वा । उत्त॑रं॒ कनी॑यो जुहुयात् । ए॒षा वा अवा॒च्याहु॑तिः । तामसु॑रा अजुहवुः । तत॒स्ते परा॑ऽभवन्न् । यस्यै॒वं जुह्व॑ति । परै॒व भ॑वति ।

हु॒त्वोप॑ सादय॒त्यजा॑मित्वाय । अथो॒ व्यावृ॑त्त्यै ॥ गार्.ह॑पत्यं॒ प्रती᳚क्षते । अन॑नुद्ध्यायिन-मे॒वैनं॑ करोति ॥ अ॒ग्नि॒हो॒त्रस्य॒ वै स्था॒णुर॑स्ति । तं ॅय ऋ॒च्छेत् । य॒ज्ञ्॒स्था॒णुमृ॑च्छेत् । ए॒ष वा अ॑ग्निहो॒त्रस्य॑ स्था॒णुः । यत्-पूर्वाऽऽहु॑तिः । तां ॅयदुत्त॑रया॒ऽभि जु॑हु॒यात्

य॒ज्ञ्॒स्था॒णु-मृ॑च्छेत् । अ॒ति॒हाय॒ पूर्वा॒माहु॑तिं जुहोति । य॒ज्ञ्॒स्था॒णुमे॒व परि॑ वृणक्ति । अथो॒ भ्रातृ॑व्यमे॒वाप्त्वा ऽति॑क्रामति ॥ अ॒वा॒चीनꣳ॑ सा॒यमुप॑ मार्ष्टि । रेत॑ ए॒व तद्-द॑धाति । ऊ॒र्द्ध्वं प्रा॒तः । प्र ज॑नयत्ये॒व तत् ॥ ब्र॒ह्म॒वा॒दिनो॑ वदन्ति । च॒तुरुन्न॑यति

द्विर्जु॑होति । अथ॒ क्व॑ द्वे आहु॑ती भवत॒ इति॑ । अ॒ग्नौ वै᳚श्वान॒र इति॑ ब्रूयात् । ए॒ष वा अ॒ग्निर्वै᳚श्वान॒रः । यद्ब्रा᳚ह्म॒णः । हु॒त्वा द्विः प्राश्ना॑ति । अ॒ग्नावे॒व वै᳚श्वान॒रे द्वे आहु॑ती जुहोति ॥ द्विर्जु॒होति॑ । द्विर्निमा᳚र्ष्टि । द्विः प्राश्ना॑ति

षट्थ् संप॑द्यन्ते । षड्वा ऋ॒तवः॑ । ऋ॒तूने॒व प्री॑णाति । ब्र॒ह्म॒वा॒दिनो॑ वदन्ति । किं॒ दे॒व॒त्य॑-मग्निहो॒त्रमिति॑ । वै॒श्व॒दे॒वमिति॑ ब्रूयात् । यद्-यजु॑षा जु॒होति॑ । तदै᳚न्द्रा॒ग्नम् । यत्-तू॒ष्णीम् । तत्-प्रा॑जाप॒त्यम्

यन्नि॒मार्ष्टि॑ । तदोष॑धीनाम् । यद्द्वि॒तीय᳚म् । तत्-पि॑तृ॒णाम् । यत्-प्राश्ना॑ति । तद्-गर्भा॑णाम् । तस्मा॒द्-गर्भा॒ अन॑श्नन्तो वर्द्धन्ते । यदा॒चाम॑ति । तन्म॑नु॒ष्या॑णाम् ॥ उद॑ङ्पर्या॒वृत्याचा॑मति

आ॒त्मनो॑ गोपी॒थाय॑ ॥ निर्णे॑नेक्ति॒ शुद्ध्यै᳚ ॥ निष्ट॑पति स्व॒गाकृ॑त्यै । उद्-दि॑शति । स॒प्त॒र्.॒षीने॒व प्री॑णाति ॥ द॒क्षि॒णा प॒र्याव॑र्तते । स्वमे॒व वी॒र्य॑मनु॑ प॒र्याव॑र्तते । तस्मा॒द्-दक्षि॒णोऽर्द्ध॑ आ॒त्मनो॑ वी॒र्या॑वत्तरः । अथो॑ आदि॒त्यस्यै॒वावृत॒मनु॑ प॒र्याव॑र्तते ॥ हु॒त्वोप॒ समि॑न्धे

ब्र॒ह्म॒व॒र्च॒सस्य॒ समि॑द्ध्यै ॥ न ब॒र॒.हिरनु॒ प्र ह॑रेत् । असꣳ॑स्थितो॒ वा ए॒ष य॒ज्ञ्ः । यद॑ग्निहो॒त्रम् । यद॑नु प्र॒हरे᳚त् । य॒ज्ञ्ं ॅविच्छि॑न्द्यात् । तस्मा॒न्नानु॑ प्र॒हृत्य᳚म् । य॒ज्ञ्स्य॒ सन्त॑त्यै ॥ अ॒पो नि न॑यति । अ॒व॒भृ॒थस्यै॒व रू॒पम॑कः ( ) ।