ब्र॒ह्म॒वा॒दिनो॑ वदन्ति । अ॒ग्नि॒हो॒त्रप्रा॑यणा य॒ज्ञाः । किं प्रा॑यण-मग्निहो॒त्रमिति॑ । व॒थ्सो वा अ॑ग्निहो॒त्रस्य॒ प्राय॑णम् । अ॒ग्नि॒हो॒त्रं ॅयज्ञाना᳚म् ॥ तस्य॑ पृथि॒वी सदः॑ । अ॒न्तरि॑क्ष॒-माग्नी᳚द्ध्रम् । द्यौर्.-ह॑वि॒र्द्धान᳚म् । दि॒व्या आपः॒ प्रोक्ष॑णयः । ओष॑धयो ब॒र॒.हिः

वन॒स्पत॑य इ॒द्ध्मः । दिशः॑ परि॒धयः॑ । आ॒दि॒त्यो यूपः॑ । यज॑मानः प॒शुः । स॒मु॒द्रो॑ऽवभृ॒थः । स॒म्ॅव॒थ्स॒रः स्व॑गाका॒रः । तस्मा॒दाहि॑ताग्नेः॒ सर्व॑मे॒व ब॑र्हि॒ष्यं॑ द॒त्तं भ॑वति । यथ् सा॒यं जु॒होति॑ । रात्रि॑मे॒व तेन॑ दक्षि॒ण्यां᳚ कुरुते । यत्-प्रा॒तः

अह॑रे॒व तेन॑ दक्षि॒ण्यं॑ कुरुते । यत्-ततो॒ ददा॑ति । सा दक्षि॑णा ॥ याव॑न्तो॒ वै दे॒वा अहु॑त॒मादन्न्॑ । ते परा॑ऽभवन्न् । त ए॒तद॑ग्निहो॒त्रꣳ सर्व॑स्यै॒व स॑मव॒दाया॑जुहवुः । तस्मा॑दाहुः । अ॒ग्नि॒हो॒त्रं ॅवै दे॒वा गृ॒हाणां॒ निष्कृ॑ति-मपश्य॒न्निति॑ । यथ्-सा॒यं जु॒होति॑ । रात्रि॑या ए॒व तद्धु॒ताद्या॑य

यज॑मान॒स्या-प॑राभावाय । यत्-प्रा॒तः । अह्न॑ ए॒व तद्धु॒ताद्या॑य । यज॑मान॒स्या-प॑राभावाय । यत्-ततो॒ऽश्नाति॑ । हु॒तमे॒व तत् ॥ द्वयोः॒ पय॑सा जुहुयात्-प॒शुका॑मस्य । ए॒तद्वा अ॑ग्निहो॒त्रं मि॑थु॒नम् । य ए॒वं ॅवेद॑ । प्र प्र॒जया॑ प॒शुभि॑र्-मिथु॒नैर्-जा॑यते

इ॒मामे॒व पूर्व॑या दु॒हे । अ॒मूमुत्त॑रया । अ॒धि॒श्रित्योत्त॑र॒मा न॑यति । योना॑वे॒व तद्-रेतः॑ सिञ्चति प्र॒जन॑ने ॥ आज्ये॑न जुहुया॒त्-तेज॑स्कामस्य । तेजो॒ वा आज्य᳚म् । ते॒ज॒स्व्ये॑व भ॑वति । पय॑सा प॒शुका॑मस्य । ए॒तद्वै प॑शू॒नाꣳ रू॒पम् । रू॒पेणै॒वास्मै॑ प॒शूनव॑ रुन्धे

प॒शु॒माने॒व भ॑वति । द॒द्ध्नेन्द्रि॒य का॑मस्य । इ॒न्द्रि॒यं ॅवै दधि॑ । इ॒न्द्रि॒या॒व्ये॑व भ॑वति । य॒वा॒ग्वा᳚ ग्राम॑कामस्यौष॒धा वै म॑नु॒ष्याः᳚ । भा॒ग॒धेये॑नै॒वास्मै॑ सजा॒तानव॑-रुन्धे । ग्रा॒म्ये॑व भ॑वति ॥अय॑ज्ञो॒ वा ए॒षः । यो॑सा॒मा

च॒तुरुन्न॑यति । चतु॑रक्षरꣳ रथन्त॒रम् । र॒थ॒न्त॒रस्यै॒ष वर्णः॑ । उ॒परी॑व हरति । अ॒न्तरि॑क्षं ॅवामदे॒व्यम् । वा॒म॒दे॒व्यस्यै॒ष वर्णः॑ । द्विर्जु॑होति । द्व्य॑क्षरं बृ॒हत् । बृ॒ह॒त ए॒ष वर्णः॑ । अ॒ग्नि॒हो॒त्रमे॒व तथ् साम॑न्वत्-करोति ।

यो वा अ॑ग्निहो॒त्रस्यो॑प॒सदो॒ वेद॑ । उपै॑नमुप॒सदो॑ नमन्ति । वि॒न्दत॑ उपस॒त्तार᳚म् । उ॒न्नीयोप॑ सादयति । पृ॒थि॒वीमे॒व प्री॑णाति । हो॒ष्यन्नुप॑ सादयति । अ॒न्तरि॑क्षमे॒व प्री॑णाति । हु॒त्वोप॑ सादयति । दिव॑मे॒व प्री॑णाति । ए॒ता वा अ॑ग्निहो॒त्रस्यो॑प॒सदः॑

य ए॒वं ॅवेद॑ । उपै॑न-मुप॒सदो॑ नमन्ति । वि॒न्दत॑ उपस॒त्तार᳚म् ॥ यो वा अ॑ग्निहो॒त्रस्याश्रा॑वितं प्र॒त्याश्रा॑वितꣳ॒॒ होता॑रं ब्र॒ह्माणं॑ ॅवषट्का॒रं ॅवेद॑ । तस्य॒ त्वे॑व हु॒तम् । प्रा॒णो वा अ॑ग्निहो॒त्रस्याश्रा॑वितम् । अ॒पा॒नः प्र॒त्याश्रा॑वितम् । मनो॒ होता᳚ । चक्षु॑र्-ब्र॒ह्मा । नि॒मे॒षो व॑षट्का॒रः

य ए॒वं ॅवेद॑ । तस्य॒ त्वे॑व हु॒तम् ॥ सा॒यं॒ ॅयावा॑नश्च॒ वै दे॒वाः प्रा॑त॒र्यावा॑णश्चा-ग्निहो॒त्रिणो॑ गृ॒हमाग॑च्छन्ति । तान्. यन्न त॒र्पये᳚त् । प्र॒जया᳚ऽस्य प॒शुभि॒र्वि ति॑ष्ठेरन्न् । यत्त॒र्पये᳚त् । तृ॒प्ता ए॑नं प्र॒जया॑ प॒शुभि॑स्तर्पयेयुः ॥ स॒जूर्दे॒वैः सा॒यं ॅयाव॑भि॒रिति॑ सा॒यꣳ सं मृ॑शति । स॒जूर्दे॒वैः प्रा॒तर्याव॑भि॒रिति॑ प्रा॒तः । ये चै॒व दे॒वाः सा॑यं॒ ॅयावा॑नो॒ ये च॑ प्रात॒र्यावा॑णः

ताने॒वोभयाꣳ॑ स्तर्पयति । त ए॑नं तृ॒प्ताः प्र॒जया॑ प॒शुभि॑ स्तर्पयन्ति ॥ अ॒रु॒णो ह॑ स्मा॒हौप॑वेशिः । अ॒ग्नि॒हो॒त्र ए॒वाहꣳ सा॒यं प्रा॑त॒र्वज्रं॒ भ्रातृ॑व्येभ्यः॒ प्र ह॑रामि । तस्मा॒न्-मत्पापी॑याꣳसो॒ भ्रातृ॑व्या॒ इति॑ । च॒तुरुन्न॑यति । द्विर्जु॑होति । स॒मिथ्-स॑प्त॒मी । स॒प्तप॑दा॒ शक्व॑री । शा॒क्व॒रो वज्रः॑ ( ) । अ॒ग्नि॒हो॒त्र ए॒व तथ्सा॒यं प्रा॑त॒र्वज्रं॒ ॅयज॑मानो॒ भ्रातृ॑व्याय॒ प्र ह॑रति । भव॑त्या॒त्मना᳚ । परा᳚ऽस्य॒ भ्रातृ॑व्यो भवति ।