त्रयो॒ वै प्रै॑यमे॒धा आ॑सन्न् । तेषां॒ त्रिरेको᳚ऽग्निहो॒त्र-म॑जुहोत् । द्विरेकः॑ । स॒कृदेकः॑ । तेषां॒ ॅयस्त्रिरजु॑होत् । स ऋ॒चाऽजु॑होत् । यो द्विः । स यजु॑षा । यः स॒कृत् । स तू॒ष्णीम्

यश्च॒ यजु॒षा ऽजु॑हो॒द्यश्च॑ तू॒ष्णीम् । तावु॒भावा᳚र्द्ध्नुताम् । तस्मा॒द्-यजु॒षा ऽऽहु॑तिः॒ पूर्वा॑ होत॒व्या᳚ । तू॒ष्णीमुत्त॑रा । उ॒भे ए॒वर्द्धी अव॑रुन्धे । अ॒ग्निर्-ज्योति॒र् ज्योति॑र॒ग्निः स्वाहेति॑ सा॒यं जु॑होति । रेत॑ ए॒व तद्-द॑धाति । सूर्यो॒ ज्योति॒र्-ज्योतिः॒ सूर्यः॒ स्वाहेति॑ प्रा॒तः । रेत॑ ए॒व हि॒तं प्र ज॑नयति ॥ रेतो॒ वा ए॒तस्य॑ हि॒तं न प्र जा॑यते

यस्या᳚ग्निहो॒त्रमहु॑तꣳ॒॒ सूर्यो॒ऽभ्यु॑देति॑ । यद्-यन्ते॒ स्यात् । उ॒न्नीय॒ प्राङु॒दाद्र॑वेत् । स उ॑प॒साद्यातमि॑तो-रासीत । स य॒दा ताम्ये᳚त् । अथ॒ भूः स्वाहेति॑ जुहुयात् । प्र॒जाप॑ति॒र्वै भू॒तः । तमे॒वो-पा॑सरत् । स ए॒वैनं॒ तत॒ उन्न॑यति । नार्ति॒मार्च्छ॑ति॒ यज॑मानः ( ) ।