प्र॒जाप॑तिः प्र॒जाः सृ॒ष्ट्वा व्य॑स्रꣳसत । स हृद॑यं भू॒तो॑ऽशयत् । आत्म॒न्॒. हा(3) इत्यह्व॑यत् । आपः॒ प्रत्य॑शृण्वन्न् । ता अ॑ग्निहो॒त्रेणै॒व य॑ज्ञ्क्र॒तुनोप॑ प॒र्याव॑र्तन्त । ताः कुसि॑न्ध॒मुपौ॑हन्न् । तस्मा॑दग्निहो॒त्रस्य॑ यज्ञ्क्र॒तोः । एक॑ ऋ॒त्विक् ॥ च॒तु॒ष्कृत्वोऽह्व॑यत् । अ॒ग्निर्-वा॒यु-रा॑दि॒त्य-श्च॒न्द्रमाः᳚

ते प्रत्य॑शृण्वन्न् । ते द॑र्.शपूर्णमा॒साभ्या॑मे॒व य॑ज्ञ्क्र॒तुनोप॑ प॒र्याव॑र्तन्त । त उपौ॑हꣳ-श्च॒त्वार्यङ्गा॑नि । तस्मा᳚द्-दर्.शपूर्णमा॒सयो᳚र् यज्ञ्क्र॒तोः । च॒त्वार॑ ऋ॒त्विजः॑ ॥ प॒ञ्च॒ कृत्वोऽह्व॑यत् । प॒शवः॒ प्रत्य॑शृण्वन्न् । ते चा॑तुर्मा॒स्यैरे॒व य॑ज्ञ्क्र॒तुनोप॑ प॒र्याव॑र्तन्त । त उपौ॑ह॒ल् ॅलोम॑ छ॒वीं माꣳ॒॒समस्थि॑ म॒ज्जान᳚म् । तस्मा᳚च्चातुर्मा॒स्यानां᳚ ॅयज्ञ्क्र॒तोः

पञ्च॒र्त्विजः॑ ॥ ष॒ट्कृत्वोऽह्व॑यत् । ऋ॒तवः॒ प्रत्य॑शृण्वन्न् । ते प॑शुब॒न्धेनै॒व य॑ज्ञ्क्र॒तुनोप॑ प॒र्याव॑र्तन्त । त उपौ॑ह॒न्थ्-स्तना॑वा॒ण्डौ शि॒श्नमवा᳚ञ्चं प्रा॒णम् । तस्मा᳚त्-पशुब॒न्धस्य॑ यज्ञ्क्र॒तोः । षडृ॒त्विजः॑ ॥ स॒प्त॒कृत्वोऽह्व॑यत् । होत्राः॒ प्रत्य॑शृण्वन्न् । ताः सौ॒म्येनै॒वाद्ध्व॒रेण॑ यज्ञ्क्र॒तुनोप॑ प॒र्याव॑र्तन्त

ता उपौ॑हन्थ्-स॒प्तशी॑र्.ष॒ण्या᳚न्-प्रा॒णान् । तस्मा᳚थ्-सौ॒म्यस्या᳚द्ध्व॒रस्य॑ यज्ञ्क्र॒तोः । स॒प्त होत्राः॒ प्राची॒र्वष॑ट्कुर्वन्ति ॥ द॒श॒कृत्वोऽह्व॑यत् । तपः॒ प्रत्य॑शृणोत् । तत्-कर्म॑णै॒व स॑म्ॅवथ्स॒रेण॒ सर्वै᳚र्यज्ञ्क्र॒तुभि॒रुप॑ प॒र्याव॑र्तत । तथ् सर्व॑मा॒त्मान॒-मप॑रिवर्ग॒-मुपौ॑हत् । तस्मा᳚थ्- सम्ॅवथ्स॒रे सर्वे॑ यज्ञ्क्र॒तवोऽव॑रुद्ध्यन्ते ॥ तस्मा॒द्-दश॑होता॒ चतु॑र्.होता । पञ्च॑होता॒ षड्ढो॑ता स॒प्तहो॑ता ( ) । एक॑होत्रे ब॒लिꣳ ह॑रन्ति । हर॑न्त्यस्मै प्र॒जा ब॒लिम् । ऐन॒मप्र॑तिख्यातं गच्छति । य ए॒वं ॅवेद॑ ।