प्र॒जाप॑तिः॒ पुरु॑ष-मसृजत । सो᳚ऽग्निर॑ब्रवीत् । ममा॒य-मन्न॑म॒स्त्विति॑ । सो॑ऽबिभेत् । सर्वं॒ ॅवै मा॒ऽयं प्रध॑क्ष्य॒तीति॑ । स ए॒ताꣳ-श्चतु॑र्.होतॄनात्म॒-स्पर॑णानपश्यत् । तान॑जुहोत् । तैर्वै स आ॒त्मान॑-मस्पृणोत् ॥ यद॑ग्निहो॒त्रं जु॒होति॑ । एक॑होतारमे॒व तद्-य॑ज्ञ्क्र॒तु-मा᳚प्नोत्यग्निहो॒त्रम्

कुसि॑न्धं चा॒त्मनः॑ स्पृ॒णोति॑ । आ॒दि॒त्यस्य॑ च॒ सायु॑ज्यं गच्छति ॥ च॒तुरुन्न॑यति । चतु॑र्.होतारमे॒व तद्-य॑ज्ञ्क्र॒तु-मा᳚प्नोति दर्.शपूर्णमा॒सौ । च॒त्वारि॑ चा॒त्मनोऽङ्गा॑नि स्पृ॒णोति॑ । आ॒दि॒त्यस्य॑ च॒ सायु॑ज्यं गच्छति ॥ च॒तुरुन्न॑यति । स॒मित्प॑ञ्च॒मी । पञ्च॑होतारमे॒व तद्-य॑ज्ञ्क्र॒तु-मा᳚प्नोति चातुर्मा॒स्यानि॑ । लोम॑ छ॒वीं माꣳ॒॒समस्थि॑ म॒ज्जान᳚म्

तानि॑ चा॒त्मनः॑ स्पृ॒णोति॑ । आ॒दि॒त्यस्य॑ च॒ सायु॑ज्यं गच्छति ॥ च॒तुरुन्न॑यति । द्विर्जु॑होति । षड्ढो॑तारमे॒व तद्-य॑ज्ञ्क्र॒तु-मा᳚प्नोति पशुब॒न्धम् । स्तना॑वा॒ण्डौ शि॒श्नमवा᳚ञ्चं प्रा॒णम् । तानि॑ चा॒त्मनः॑ स्पृ॒णोति॑ । आ॒दि॒त्यस्य॑ च॒ सायु॑ज्यं गच्छति । च॒तुरुन्न॑यति । द्विर्जु॑होति

स॒मिथ् स॑प्त॒मी । स॒प्तहो॑तारमे॒व तद्-य॑ज्ञ्क्र॒तु-मा᳚प्नोति सौ॒म्य-म॑द्ध्व॒रम् । स॒प्त चा॒त्मनः॑ शीर्.ष॒ण्या᳚न्-प्रा॒णान्थ्-स्पृ॒णोति॑ । आ॒दि॒त्यस्य॑ च॒ सायु॑ज्यं गच्छति ॥ च॒तुरुन्न॑यति । द्विर्जु॒होति॑ । द्विर्निमा᳚र्ष्टि । द्विः प्राश्ना॑ति । दश॑होतारमे॒व तद्-य॑ज्ञ्क्र॒तु-मा᳚प्नोति सम्ॅवथ्स॒रम् । सर्वं॑ चा॒त्मान॒-मप॑रिवर्गꣳ स्पृ॒णोति॑ ( ) । आ॒दि॒त्यस्य॑ च॒ सायु॑ज्यं गच्छति ।