लो॒को॑ऽसि स्व॒र्गो॑ऽसि । अ॒न॒न्तो᳚ऽस्य पा॒रो॑ऽसि । अक्षि॑तोऽस्य क्ष॒य्यो॑ऽसि । तप॑सः प्रति॒ष्ठा । त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्ता विश्व॑स्य जनयि॒ता । तन्त्वोप॑दधे काम॒दुघ॒-मक्षि॑तं । प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्वद्-ध्रु॒वा सी॑द ।

तपो॑ऽसि लो॒के श्रि॒तं । तेज॑सः प्रति॒ष्ठा । त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्तृ विश्व॑स्य जनयि॒तृ । तत् त्वोप॑दधे काम॒दुघ॒-मक्षि॑तं । प्र॒जाप॑तिस्त्वा सादयतु ।तया॑ दे॒वत॑या-ऽङ्गिर॒स्वद्-ध्रु॒वा सी॑द ।

तेजो॑ऽसि॒ तप॑सि श्रि॒तं । स॒मु॒द्रस्य॑ प्रति॒ष्ठा ।त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं ।विश्व॑स्य भ॒र्तृविश्व॑स्य जनयि॒तृ । तत् त्वोप॑दधे काम॒दुघ॒-मक्षि॑तं ।प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्वद्-ध्रु॒वा सी॑द ।

स॒मु॒द्रो॑ऽसि॒ तेज॑सि श्रि॒तः । अ॒पां प्र॑ति॒ष्ठा । त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं ।विश्व॑स्य भ॒र्ता विश्व॑स्य जनयि॒ता ।तं त्वोप॑दधे काम॒दुघ॒-मक्षि॑तं । प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्वद्-ध्रु॒वा सी॑द ।

आपः॑ स्थ समु॒द्रे श्रि॒ताः । पृ॒थि॒व्याः प्र॑ति॒ष्ठा यु॒ष्मासु॑ । इ॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्त्र्यो॑ विश्व॑स्य जनयि॒त्र्यः॑ । ता व॒ उप॑दधे काम॒दुघा॒ अक्षि॑ताः । प्र॒जाप॑तिस्त्वा सादयतु ।तया॑ दे॒वत॑या-ऽङ्गिर॒स्वद्-ध्रु॒वा सी॑द ।

पृ॒थि॒व्य॑-स्य॒फ्सु श्रि॒ता । अ॒ग्नेः प्र॑ति॒ष्ठा । त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्त्री विश्व॑स्य जनयि॒त्री । तां त्वोप॑दधे काम॒दुघा॒-मक्षि॑तां । प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्वद्-ध्रु॒वा सी॑द ।

अ॒ग्निर॑सि पृथि॒व्याꣳ श्रि॒तः । अ॒न्तरि॑क्षस्य प्रति॒ष्ठा । त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं ।विश्व॑स्य भ॒र्ता विश्व॑स्य जनयि॒ता । तं त्वोप॑दधे काम॒दुघ॒-मक्षि॑तं । प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्वद्-ध्रु॒वा सी॑द ।

अ॒न्तरि॑क्ष-मस्य॒ग्नौ श्रि॒तं । वा॒योः प्र॑ति॒ष्ठा । त्वयी॒दम॒न्तः ।विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्तृ विश्व॑स्य जनयि॒तृ ।तत् त्वोप॑दधे काम॒दुघ॒-मक्षि॑तं । प्र॒जाप॑तिस्त्वा सादयतु ।तया॑ दे॒वत॑या-ऽङ्गिर॒स्वद्-ध्रु॒वा सी॑द ।

वा॒युर॑स्य॒न्तरि॑क्षे श्रि॒तः । दि॒वः प्र॑ति॒ष्ठा । त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्ता विश्व॑स्य जनयि॒ता ।तं त्वोप॑दधे काम॒दुघ॒-मक्षि॑तं । प्र॒जाप॑तिस्त्वा सादयतु ।तया॑ दे॒वत॑या-ऽङ्गिर॒स्वद्-ध्रु॒वा सी॑द ।

द्यौर॑सि वा॒यौ श्रि॒ता । आ॒दि॒त्यस्य॑ प्रति॒ष्ठा । त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्त्री विश्व॑स्य जनयि॒त्री ।तां त्वोप॑दधे काम॒दुघा॒-मक्षि॑तां । प्र॒जाप॑तिस्त्वा सादयतु ।तया॑ दे॒वत॑या-ऽङ्गिर॒स्वद्-ध्रु॒वा सी॑द ।

आ॒दि॒त्यो॑ऽसि दि॒वि श्रि॒तः । च॒न्द्रम॑सः प्रति॒ष्ठा । त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्ता विश्व॑स्य जनयि॒ता ।तं त्वोप॑दधे काम॒दुघ॒-मक्षि॑तं । प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्वद्-ध्रु॒वा सी॑द ।

च॒न्द्रमा॑ अस्यादि॒त्ये श्रि॒तः । नक्ष॑त्राणां प्रति॒ष्ठा । त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्ता विश्व॑स्य जनयि॒ता । तं त्वोप॑दधे काम॒दुघ॒-मक्षि॑तं । प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्वद्-ध्रु॒वा सी॑द ।

नक्ष॑त्राणि स्थ च॒न्द्रम॑सि श्रि॒तानि॑ । स॒म्ॅव॒थ्स॒रस्य॑ प्रति॒ष्ठा यु॒ष्मासु॑ । इ॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं ।विश्व॑स्य भ॒र्तॄणि॒ विश्व॑स्य जनयि॒तॄणि॑ ।तानि॑ व॒ उप॑दधे काम॒दुघा॒-न्यक्षि॑तानि । प्र॒जाप॑तिस्त्वा सादयतु ।तया॑ दे॒वत॑या-ऽङ्गिर॒स्वद्-ध्रु॒वा सी॑द ।

स॒म्ॅव॒थ्स॒रो॑ऽसि॒ नक्ष॑त्रेषु श्रि॒तः । ऋ॒तू॒नां प्र॑ति॒ष्ठा । त्वयी॒दम॒न्तः ।विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्ता विश्व॑स्य जनयि॒ता । तं त्वोप॑दधे काम॒दुघ॒-मक्षि॑तं । प्र॒जाप॑तिस्त्वा सादयतु ।तया॑ दे॒वत॑या-ऽङ्गिर॒स्वद्-ध्रु॒वा सी॑द ।

ऋ॒तवः॑ स्थ सम्ॅवथ्स॒रे श्रि॒ताः । मासा॑नां प्रति॒ष्ठा यु॒ष्मासु॑ । इ॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं ।विश्व॑स्य भ॒र्तारो॒ विश्व॑स्य जनयि॒तारः॑ ।तान्. व॒ उप॑दधे काम॒दुघा॒-नक्षि॑तान् । प्र॒जाप॑तिस्त्वा सादयतु ।तया॑ दे॒वत॑या-ऽङ्गिर॒स्वद्-ध्रु॒वा सी॑द ।

मासाः᳚ स्थ॒र्तुषु॑ श्रि॒ताः । अ॒द्र्ध॒मा॒सानां᳚ प्रति॒ष्ठा यु॒ष्मासु॑ । इ॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्तारो॒ विश्व॑स्य जनयि॒तारः॑ । तान्. व॒ उप॑दधे काम॒दुघा॒-नक्षि॑तान् । प्र॒जाप॑तिस्त्वा सादयतु ।तया॑ दे॒वत॑या-ऽङ्गिर॒स्वद्-ध्रु॒वा सी॑द ।

अ॒द्र्ध॒मा॒साः स्थ॑ मा॒सु श्रि॒ताः । अ॒हो॒रा॒त्रयोः᳚ प्रति॒ष्ठा यु॒ष्मासु॑ । इ॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं ।विश्व॑स्य भ॒र्तारो॒ विश्व॑स्य जनयि॒तारः॑ ।तान्. व॒ उप॑दधे काम॒दुघा॒-नक्षि॑तान् । प्र॒जाप॑तिस्त्वा सादयतु ।तया॑ दे॒वत॑या-ऽङ्गिर॒स्वद्-ध्रु॒वा सी॑द ।

अ॒हो॒रा॒त्रे स्थो᳚ऽद्र्धमा॒सेषु॑ श्रि॒ते । भू॒तस्य॑ प्रति॒ष्ठे भव्य॑स्य प्रति॒ष्ठे । यु॒वयो॑-रि॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं ।विश्व॑स्य भ॒र्त्र्यौ॑ विश्व॑स्य जनयि॒त्र्यौ᳚ । ते वा॒मुप॑दधे काम॒दुघे॒ अक्षि॑ते । प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्वद्-ध्रु॒वा सी॑द ।

पौ॒र्ण॒मा॒स्यष्ट॑का ऽमावा॒स्या᳚ । अ॒न्ना॒दाः स्था᳚न्न॒दुघो॑ यु॒ष्मासु॑ । इ॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं ।विश्व॑स्य भ॒र्त्र्यो॑ विश्व॑स्य जनयि॒त्र्यः॑ ।ता व॒ उप॑दधे काम॒दुघा॒-अक्षि॑ताः । प्र॒जाप॑तिस्त्वा सादयतु ।तया॑ दे॒वत॑या-ऽङ्गिर॒स्वद्-ध्रु॒वा सी॑द ।

राड॑सि बृह॒ती श्रीर॒सीन्द्र॑पत्नी॒ धर्म॑पत्नी । विश्वं॑ भू॒तमनु॒ प्रभू॑ता ।त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं ।विश्व॑स्य भ॒र्त्री विश्व॑स्य जनयि॒त्री । तां त्वोप॑दधे काम॒दुघा॒-मक्षि॑तां । प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्वद्-ध्रु॒वा सी॑द ।

ओजो॑ऽसि॒ सहो॑ऽसि । बल॑मसि॒ भ्राजो॑ऽसि ।दे॒वानां॒ धामा॒मृतं᳚ । अम॑र्त्य-स्तपो॒जाः । त्वयी॒दम॒न्तः । विश्वं॑ ॅय॒क्षं ॅविश्वं॑ भू॒तं ॅविश्वꣳ॑ सुभू॒तं । विश्व॑स्य भ॒र्ता विश्व॑स्य जनयि॒ता । तं त्वोप॑दधे काम॒दुघ॒-मक्षि॑तं । प्र॒जाप॑तिस्त्वा सादयतु । तया॑ दे॒वत॑या-ऽङ्गिर॒स्वद्-ध्रु॒वा सी॑द ( ) ।