तꣳ है॒त-मेके॑ पशुब॒न्ध ए॒वोत्त॑रवे॒द्यां चि॑न्वते । उ॒त्त॒र॒वे॒दिस॑म्मित ए॒षो᳚ऽग्निरिति॒ वद॑न्तः । तन्न तथा॑ कु॒र्यात् । ए॒त-म॒ग्निं कामे॑न॒ व्य॑र्द्धयेत् । स ए॑नं॒ कामे॑न॒ व्यृ॑द्धः । कामे॑न॒ व्य॑र्द्धयेत् ।सौ॒म्ये वावै न॑मध्व॒रे चि॑न्वी॒त । यत्र॑ वा॒ भूयि॑ष्ठा॒ आहु॑तयो हू॒येरन्न्॑ । ए॒त-म॒ग्निं कामे॑न॒ सम॑र्द्धयति । स ए॑नं॒ कामे॑न॒ समृ॑द्धः

कामे॑न॒ सम॑र्द्धयति ॥ अथ॑ हैनं पु॒रर्.ष॑यः । उ॒त्त॒र॒वे॒द्या-मे॒व स॒त्रिय॑-मचिन्वत । ततो॒ वै तेऽवि॑न्दन्त प्र॒जां ।अ॒भि स्व॒र्गं ॅलो॒क-म॑जयन्न् । वि॒न्दत॑ ए॒व प॒जां । अ॒भि स्व॒र्गं ॅलो॒कं ज॑यति । यो᳚ऽग्निं ना॑चिके॒तं चि॑नु॒ते ।य उ॑ चैन-मे॒वं ॅवेद॑ ॥ अथ॑ हैनं ॅवा॒युर्. ऋद्धि॑कामः

य॒था॒न्यु॒प्त-मे॒वोप॑दधे । ततो॒ वै स ए॒ता-मृद्धि॑-माद्र्ध्नोत् ।यामि॒दं ॅवा॒युर्. ऋ॒द्धः । ए॒ता-मृद्धि॑-मृद्ध्नोति । यामि॒दं ॅवा॒युर्. ऋ॒द्धः । यो᳚ऽग्निं ना॑चिके॒तं चि॑नु॒ते । य उ॑ चैन-मे॒वं ॅवेद॑ ॥ अथ॑ हैनं गोब॒लो वार्ष्णः॑ प॒शुका॑मः । पांक्त॑मे॒व चि॑क्ये । पञ्च॑ पु॒रस्ता᳚त्

पञ्च॑ दक्षिण॒तः । पञ्च॑ प॒श्चात् । पञ्चो᳚त्तर॒तः । एकां॒ मद्ध्ये᳚ ।ततो॒ वै स स॒हस्रं॑ प॒शून् प्राप्नो᳚त् । प्र स॒हस्रं॑ प॒शू-ना᳚प्नोति ।यो᳚ऽग्निं ना॑चिके॒तं चि॑नु॒ते । य उ॑ चैन-मे॒वं ॅवेद॑ ॥ अथ॑ हैनं प्र॒जाप॑ति॒ र्ज्यैष्ठ्य॑कामो॒ यश॑स्कामः प्र॒जन॑नकामः । त्रि॒वृत॑मे॒व चि॑क्ये

स॒प्त पु॒रस्ता᳚त् । ति॒स्रो द॑क्षिण॒तः । स॒प्त प॒श्चात् । ति॒स्र उ॑त्तर॒तः । एकां॒ मद्ध्ये᳚ । ततो॒ वै स प्र यशो॒ ज्यैष्ठ्य॑-माप्नोत् । ए॒तां प्रजा॑तिं॒ प्राजा॑यत । यामि॒दं प्र॒जाः प्र॒जाय॑न्ते । त्रि॒वृद् वै ज्यैष्ठ्यं᳚ । मा॒ता पि॒ता पु॒त्रः

त्रि॒वृत् प्र॒जन॑नं । उ॒पस्थो॒ योनि॑ र्मद्ध्य॒मा । प्रयशो॒ ज्यैष्ठ्य॑-माप्नोति । ए॒तां प्र॑जातिं॒ प्रजा॑यते । यामि॒दं प्र॒जाः प्र॒जाय॑न्ते । यो᳚ऽग्निं ना॑चिके॒तं चि॑नु॒ते । य उ॑ चैनमे॒वं ॅवेद॑ ॥ अथ॑ हैन॒-मिन्द्रो॒ ज्यैष्ठ्य॑कामः ।ऊ॒द्र्ध्वा ए॒वोप॑दधे । ततो॒ वै स ज्यैष्ठ्य॑-मगच्छत्

ज्यैष्ठ्यं॑ गच्छति । यो᳚ऽग्निं ना॑चिके॒तं चि॑नु॒ते । य उ॑ चैन-मे॒वं ॅवेद॑ ॥ अथ॑ हैन-म॒सावा॑दि॒त्यः स्व॒र्गका॑मः ।प्राची॑रे॒वोप॑दधे । ततो॒ वै सो॑ऽभि स्व॒र्गं ॅलो॒क-म॑जयत् । अ॒भि स्व॒र्गं ॅलो॒कं ज॑यति । यो᳚ऽग्निं ना॑चिके॒तं चि॑नु॒ते ।य उ॑ चैन-मे॒वं ॅवेद॑ ॥ स यदी॒च्छेत्

ते॒ज॒स्वी य॑श॒स्वी ब्र॑ह्मवर्च॒सी स्या॒मिति॑ । प्राङा होतु॒र्द्धिष्ण्या॒-दुथ्स॑र्पेत् । येयं प्रागा॒द् यश॑स्वती । सा मा॒ प्रोर्णो॑तु ।तेज॑सा॒ यश॑सा ब्रह्मवर्च॒सेनेति॑ । ते॒ज॒स्व्ये॑व य॑श॒स्वी ब्र॑ह्मवर्च॒सी भ॑वति ॥ अथ॒ यदी॒च्छेत् । भूयि॑ष्ठं मे॒ श्रद्द॑धीरन्न् । भूयि॑ष्ठा॒ दक्षि॑णा नयेयु॒रिति॑ । दक्षि॑णासु नी॒यमा॑नासु॒ प्राच्येहि॒ प्राच्ये॒हीति॒ प्राची॑ जुषा॒णा वेत्वाज्य॑स्य॒ स्वाहेति॑ स्रु॒वेणो॑-प॒हत्या॑ हव॒नीये॑ जुहुयात्

भूयि॑ष्ठ-मे॒वास्मै॒ श्रद्द॑धते । भूयि॑ष्ठा॒ दक्षि॑णा नयन्ति ॥ पुरी॑ष-मुप॒धाय॑ । चि॒ति॒-क्लृ॒प्तिभि॑-रभि॒मृश्य॑ । अ॒ग्निं प्र॒णीयो॑पसमा॒धाय॑ । चत॑स्र ए॒ता आहु॑ती र्जुहोति । त्वम॑ग्ने रु॒द्र इति॑ शतरु॒द्रीय॑स्य रू॒पं । अग्ना॑-विष्णू॒ इति॑ वसो॒द्र्धारा॑याः । अन्न॑पत॒ इत्य॑न्न हो॒मः । स॒प्त ते॑ अग्ने स॒मिधः॑ स॒प्त जि॒ह्वा इति॑ विश्व॒प्रीः ( ) ।