अ॒यं ॅवाव यः पव॑ते । सो᳚ऽग्नि ना॑र्चिके॒तः । स यत् प्राङ् पव॑ते । तद॑स्य॒ शिरः॑ । अथ॒ यद् द॑क्षि॒णा । स दक्षि॑णः प॒क्षः ।अथ॒ यत् प्र॒त्यक् । तत् पुच्छं᳚ । य दुदङ्ङ्॑ । स उत्त॑रः प॒क्षः

अथ॒ यथ् स॒म्ॅवाति॑ । तद॑स्य स॒मञ्च॑नं च प्र॒सार॑णं च । अथो॑ स॒पंदे॒वास्य॒ सा ॥ सꣳ ह॒ वा अ॑स्मै॒ स कामः॑ पद्यते । यत् का॑मो॒ यज॑ते । यो᳚ऽग्निं ना॑चिके॒तं चि॑नु॒ते ।य उ॑ चैन-मे॒वं ॅवेद॑ ॥ यो ह॒ वा अ॒ग्ने र्ना॑चिके॒तस्या॒यत॑नं प्रति॒॒ष्ठां ॅवेद॑ । आ॒यत॑नवान् भवति । गच्छ॑ति प्रति॒ष्ठां

हिर॑ण्यं॒ ॅवा अ॒ग्ने र्ना॑चिके॒तस्या॒यत॑नं प्रति॒ष्ठा । य ए॒वं ॅवेद॑ ।आ॒यत॑नवान् भवति । गच्छ॑ति प्रति॒ष्ठां ॥यो ह॒ वा अ॒ग्ने र्ना॑चिके॒तस्य॒ शरी॑रं॒ ॅवेद॑ । स श॑रीर ए॒व स्व॒र्गं ॅलो॒कमे॑ति । हिर॑ण्यं॒ ॅवा अ॒ग्ने र्ना॑चिके॒तस्य॒ शरी॑रं । य ए॒वं ॅवेद॑ । स श॑रीर ए॒व स्व॒र्गं ॅलो॒कमे॑ति ॥ अथो॒ यथा॑ रु॒क्म उत्-त॑प्तो भा॒य्यात्

ए॒वमे॒व स तेज॑सा॒ यश॑सा । अ॒स्मिꣳश्च॑ लो॒के॑-ऽमुष्मिꣳ॑श्च भाति ॥ उ॒रवो॑ ह॒ वै नामै॒ते लो॒काः । ये-ऽव॑रेणादि॒त्यं । अथ॑ है॒ते वरी॑याꣳसो लो॒काः । ये परे॑णादि॒त्यं । अन्त॑वन्तꣳ ह॒ वा ए॒ष क्ष॒य्यं ॅलो॒कं ज॑यति । यो-ऽव॑रेणादि॒त्यं । अथ॑ है॒षो॑-ऽन॒न्त-म॑पा॒र-म॑क्ष॒य्यं ॅलो॒कं ज॑यति । यः परे॑णादि॒त्यं ( ) ।

अ॒न॒न्तꣳ ह॒ वा अ॑पा॒र-म॑क्ष॒य्यं ॅलो॒कं ज॑यति । यो᳚ऽग्निं ना॑चिके॒तं चि॑नु॒ते । य उ॑ चैन-मे॒वं ॅवेद॑ ॥ अथो॒ यथा॒ रथे॒ तिष्ठ॒न् पक्ष॑सी पर्या॒-वर्त्त॑माने प्र॒त्यपे᳚क्षते । ए॒व-म॑होरा॒त्रे प्र॒त्यपे᳚क्षते । नास्या॑-होरा॒त्रे लो॒कमा᳚प्नुतः । यो᳚ऽग्निं ना॑चि॒केतं चि॑नु॒ते । य उ॑ चैन-मे॒वं ॅवेद॑ ।