दे॒वाना॑मेति निष्कृ॒तमृ॒तस्य॒ योनि॑मा॒सद॒मदि॑त्याः॒ सदो॒ऽस्यदि॑त्याः॒ सद॒ आ सी॑दै॒ष वो॑ देव सवितः॒ सोम॒स्तꣳ र॑क्षद्ध्वं॒ मा वो॑ दभदे॒तत्त्वꣳ सो॑म दे॒वो दे॒वानुपा॑गा इ॒दम॒हं म॑नु॒ष्यो॑ मनु॒ष्या᳚न्थ् स॒ह प्र॒जया॑ स॒ह रा॒यस्पोषे॑ण॒ नमो॑ दे॒वेभ्यः॑ स्व॒धा पि॒तृभ्य॑ इ॒दम॒हं निर्वरु॑णस्य॒ पाशा॒थ् सुव॑र॒भि - [ ]
पदपाठः (Word-by-word)
दे॒वाना᳚म् । ए॒ति॒ । नि॒ष्कृ॒तमिति॑ निः - कृ॒तम् । ऋ॒तस्य॑ । योनि᳚म् । आ॒सद॒मित्या᳚ - सद᳚म् । अदि॑त्याः । सदः॑ । अ॒सि॒ । अदि॑त्याः । सदः॑ । एति॑ । सी॒द॒ । ए॒षः । वः॒ । दे॒व॒ । स॒वि॒तः॒ । सोमः॑ । तम् । र॒क्ष॒द्ध्व॒म् । मा । वः॒ । द॒भ॒॒त् । ए॒तत् । त्वम् । सो॒म॒ । दे॒वः । दे॒वान् । उपेति॑ । अ॒गाः॒ । इ॒दम् । अ॒हम् । म॒नु॒ष्यः॑ । म॒नु॒ष्यान्॑ । स॒ह । प्र॒जयेति॑ प्र - जया᳚ । स॒ह । रा॒यः । पोषे॑ण । नमः॑ । दे॒वेभ्यः॑ । स्व॒धेति॑ स्व - धा । पि॒तृभ्य॒ इति॑ पि॒तृ - भ्यः॒ । इ॒दम् । अ॒हम् । निरिति॑ । वरु॑णस्य । पाशा᳚त् । सुवः॑ । अ॒भि ।