विभ॑क्तिं करोति॒ ब्रह्मै॒व तद॑करुपाꣳ॒॒शु य॑जति॒ यथा॑ वा॒मं ॅवसु॑ विविदा॒नो गूह॑ति ता॒दृगे॒व तद॒ग्निं प्रति॑ स्विष्ट॒कृतं॒ निरा॑ह॒ यथा॑ वा॒मं ॅवसु॑ विविदा॒नः प्र॑का॒शं जिग॑मिषति ता॒दृगे॒व तद्विभ॑क्तिमु॒क्त्वा प्र॑या॒जेन॒ वष॑ट्करोत्या॒यत॑नादे॒व नैति॒ यज॑मानो॒ वै पु॑रो॒डाशः॑ प॒शव॑ ए॒ते आहु॑ती॒ यद॒भितः॑ पुरो॒डाश॑मे॒ते आहु॑ती - [ ]
पदपाठः (Word-by-word)
विभ॑क्ति॒मिति॒ वि - भ॒क्ति॒म् । क॒रो॒ति॒ । ब्रह्म॑ । ए॒व । तत् । अ॒कः॒ । उ॒पाꣳ॒॒श्वित्यु॑प-अꣳ॒॒शु । य॒ज॒ति॒ । यथा᳚ । वा॒मम् । वसु॑ । वि॒वि॒दा॒नः । गूह॑ति । ता॒दृक् । ए॒व । तत् । अ॒ग्निम् । प्रतीति॑ । स्वि॒ष्ट॒कृत॒मिति॑ स्विष्ट- कृत᳚म् । निरिति॑ । आ॒ह॒ । यथा᳚ । वा॒मम् । वसु॑ । वि॒वि॒दा॒नः । प्र॒का॒शमिति॑ प्र - का॒शम् । जिग॑मिषति । ता॒दृक् । ए॒व । तत् । विभ॑क्ति॒मिति॒ वि - भ॒क्ति॒म् । उ॒क्त्वा । प्र॒या॒जेनेति॑ प्र - या॒जेन॑ । वष॑ट् । क॒रो॒ति॒ । आ॒यत॑ना॒दित्या᳚ - यत॑नात् । ए॒व । न । ए॒ति॒ । यज॑मानः । वै । पु॒रो॒डाशः॑ । प॒शवः॑ । ए॒ते इति॑ । आहु॑ती॒ इत्या - हु॒ती॒ । यत् । अ॒भितः॑ । पु॒रो॒डाश᳚म् । ए॒ते इति॑ । आहु॑ती॒ इत्या - हु॒ती॒ ।