सꣳहि॒ताऽसि॑ विश्वरू॒पीरा मो॒र्जा वि॒शा ऽऽ*गौ॑प॒त्येना ऽऽ*रा॒यस्पोषे॑ण सहस्रपो॒षं ॅवः॑ पुष्यासं॒ मयि॑ वो॒ रायः॑ श्रयन्तां ॥ उप॑ त्वाऽग्ने दि॒वेदि॑वे॒ दोषा॑वस्तर्द्धि॒या व॒यं । नमो॒ भर॑न्त॒ एम॑सि ॥ राज॑न्तमद्ध्व॒राणां᳚ गो॒पामृ॒तस्य॒ दीदि॑विं । वर्द्ध॑मानꣳ॒॒ स्वे दमे᳚ ॥ स नः॑ पि॒तेव॑ सू॒नवेऽग्ने॑ सूपाय॒नो भ॑व । सच॑स्वा नः स्व॒स्तये᳚ ॥ अग्ने॒- [ ]
पदपाठः (Word-by-word)
सꣳ॒॒हि॒तेति॑ सं - हि॒ता । अ॒सि॒ । वि॒श्व॒रू॒पीरिति॑ विश्व - रू॒पीः । एति॑ । मा॒ । ऊ॒र्जा । वि॒श॒ । एति॑ । गौ॒प॒त्येन॑ । एति॑ । रा॒यः । पोषे॑ण । स॒ह॒स्र॒पो॒षमिति॑ सहस्र - पो॒षम् । वः॒ । पु॒ष्या॒स॒म् । मयि॑ । वः॒ । रायः॑ । श्र॒य॒न्ता॒म् ॥ उपेति॑ । त्वा॒ । अ॒ग्ने॒ । दि॒वेदि॑व॒ इति॑ दि॒वे-दि॒वे॒ । दोषा॑वस्त॒रिति॒ दोषा᳚-व॒स्तः॒ । धि॒या । व॒यम् ॥ नमः॑ । भर॑न्तः । एति॑ । इ॒म॒सि॒ ॥ राज॑न्तम् । अ॒द्ध्व॒राणा᳚म् । गो॒पामिति॑ गो - पाम् । ऋ॒तस्य॑ । दीदि॑विम् ॥ वर्ध॑मानम् । स्वे । दमे᳚ ॥ सः । नः॒ । पि॒ता । इ॒व॒ । सू॒नवे᳚ । अग्ने᳚ । सू॒पा॒य॒न इति॑ सु - उ॒पा॒य॒नः । भ॒व॒ ॥ सच॑स्व । नः॒ । स्व॒स्तये᳚ ॥ अग्ने᳚ ।