ऋ॒तव॑ ऋ॒तुष्वे॒व प्रति॑ तिष्ठति ष॒ड्भिरुत्त॑राभि॒रुप॑ तिष्ठते॒ द्वाद॑श॒ सं प॑द्यन्ते॒ द्वाद॑श॒ मासाः᳚ संॅवथ्स॒रः सं॑ॅवथ्स॒र ए॒व प्रति॑ तिष्ठति॒ यथा॒ वै पुरु॒षोऽश्वो॒ गौर्-जीर्य॑त्ये॒व-म॒ग्निराहि॑तो जीर्यति संॅवथ्स॒रस्य॑ प॒रस्ता॑दाग्निपावमा॒नीभि॒-रुप॑ तिष्ठते पुनर्न॒व-मे॒वैन॑-म॒जरं॑ करो॒त्यथो॑ पु॒नात्ये॒वोप॑ तिष्ठते॒ योग॑ ए॒वास्यै॒ष उप॑ तिष्ठते॒ - [ ]
पदपाठः (Word-by-word)
ऋ॒तवः॑ । ऋ॒तुषु॑ । ऐ॒व । प्रतीति॑ । ति॒ष्ठ॒ति॒ । ष॒ड्भिरिति॑ षट् - भिः । उत्त॑राभि॒रित्युत् - त॒रा॒भिः॒ । उपेति॑ । ति॒ष्ठ॒ते॒ । द्वाद॑श । समिति॑ । प॒द्य॒न्ते॒ । द्वाद॑श । मासाः᳚ । स॒म्ॅव॒थ्स॒र इति॑ सं - व॒थ्स॒रः । स॒म्ॅव॒थ्स॒र इति॑ सं - व॒थ्स॒रे । ए॒व । प्रतीति॑ । ति॒ष्ठ॒ति॒ । यथा᳚ । वै । पुरु॑षः । अश्वः॑ । गौः । जीर्य॑ति । ए॒वम् । अ॒ग्निः । आहि॑त॒ इत्या - हि॒तः॒ । जी॒र्य॒ति॒ । स॒॒म्ॅव॒थ्स॒रस्येति॑ सं - वथ्स॒रस्य॑ । प॒रस्ता᳚त् । आ॒ग्नि॒पा॒व॒मा॒नीभि॒रित्या᳚ग्नि - पा॒व॒मा॒नीभिः॑ । उपेति॑ । ति॒ष्ठ॒ते॒ । पु॒न॒र्न॒वमिति॑ पुनः-न॒वम् । ए॒व । ए॒न॒म् । अ॒जर᳚म् । क॒रो॒ति॒ । अथो॒ इति॑ । पु॒नाति॑ । ए॒व । उपेति॑ । ति॒ष्ठ॒ते॒ । योगः॑ । ए॒व । अ॒स्य॒ । ए॒षः । उपेति॑ । ति॒ष्ठ॒ते॒ ।