दम॑ ए॒वास्यै॒ष उप॑ तिष्ठते याच्ञैवास्यै॒षोप॑ तिष्ठते॒ यथा॒ पापी॑या॒ञ्छ्रेय॑स आ॒हृत्य॑ नम॒स्यति॑ ता॒दृगे॒व तदा॑यु॒र्दा अ॑ग्ने॒ऽस्यायु॑र्मे दे॒हीत्या॑हा*ऽऽयु॒र्दा ह्ये॑ष व॑र्चो॒दा अ॑ग्नेऽसि॒ वर्चो॑ मे दे॒हीत्या॑ह वर्चो॒दा ह्ये॑ष त॑नू॒पा अ॑ग्नेऽसि त॒नुवं॑ मे पा॒हीत्या॑ह - [ ]
पदपाठः (Word-by-word)
दमः॑ । ए॒व । अ॒स्य॒ । ए॒षः । उपेति॑ । ति॒ष्ठ॒ते॒ । याच्ञै । ए॒व । अ॒स्य॒ । ए॒षा । उपेति॑ । ति॒ष्ठ॒ते॒ । यथा᳚ । पापी॑यान् । श्रेय॑से । आ॒हृत्येत्या᳚ - हृत्य॑ । न॒म॒स्यति॑ । ता॒दृक् । ए॒व । तत् । आ॒यु॒र्दा इत्या॑युः - दाः । अ॒ग्ने॒ । अ॒सि॒ । आयुः॑ । मे॒ । दे॒हि॒ । इति॑ । आ॒ह॒ । आ॒यु॒र्दा इत्या॑युः - दाः । हि । ए॒षः । व॒र्चो॒दा इति॑ वर्चः - दाः । अ॒ग्ने॒ । अ॒सि॒ । वर्चः॑ । मे॒ । दे॒हि॒ । इति॑ । आ॒ह॒ । व॒र्चो॒दा इति॑ वर्चः - दाः । हि । ए॒षः । त॒नू॒पा इति॑ तनू - पाः । अ॒ग्ने॒ । अ॒सि॒ । त॒नुव᳚म् । मे॒ । पा॒हि॒ । इति॑ । आ॒ह॒ ।