वा ए॒षो᳚ऽस्माल्लो॒काच्च्य॑वते॒ य आ॑हव॒नीय॑-मुप॒तिष्ठ॑ते॒ गार्.ह॑पत्य॒मुप॑ तिष्ठते॒ ऽस्मिन्ने॒व लो॒के प्रति॑ तिष्ठ॒त्यथो॒ गार्.ह॑पत्यायै॒व नि ह्नु॑ते गाय॒त्रीभि॒रुप॑ तिष्ठते॒ तेजो॒ वै गा॑य॒त्री तेज॑ ए॒वात्मन् ध॒त्तेऽथो॒ यदे॒तं तृ॒चम॒न्वाह॒ सन्त॑त्यै॒ गार्.ह॑पत्यं॒ ॅवा अनु॑ द्वि॒पादो॑ वी॒राः प्र जा॑यन्ते॒ य ए॒वं ॅवि॒द्वान् द्वि॒पदा॑भि॒र् गार्.ह॑पत्य-मुप॒तिष्ठ॑त॒ - [ ]
पदपाठः (Word-by-word)
वै । ए॒षः । अ॒स्मात् । लो॒कात् । च्य॒व॒ते॒ । यः । आ॒ह॒व॒नीय॒मित्या᳚ - ह॒व॒नीय᳚म् । उ॒प॒तिष्ठ॑त॒ इत्यु॑प - तिष्ठ॑ते । गार्.ह॑पत्य॒मिति॒ गार्.ह॑ - प॒त्य॒म् । उपेति॑ । ति॒ष्ठ॒ते॒ । अ॒स्मिन्न् । ए॒व । लो॒के । प्रतीति॑ । ति॒ष्ठ॒ति॒ । अथो॒ इति॑ । गार्.ह॑पत्या॒येति॒ गार्.ह॑ - प॒त्या॒य॒ । ए॒व । नीति॑ । ह्नु॒ते॒ । गा॒य॒त्रीभिः॑ । उपेति॑ । ति॒ष्ठ॒ते॒ । तेजः॑ । वै । गा॒य॒त्री । तेजः॑ । ए॒व । आ॒त्मन्न् । ध॒त्ते॒ । अथो॒ इति॑ । यत् । ए॒तम् । तृ॒चम् । अ॒न्वाहेत्य॑नु - आह॑ । संत॑त्या॒ इति॒ सं - त॒त्यै॒ । गार्.ह॑पत्य॒मिति॒ गार्.ह॑ - प॒त्य॒म् । वै । अन्विति॑ । द्वि॒पाद॒ इति॑ द्वि॒ - पादः॑ । वी॒राः । प्रेति॑ । जा॒य॒न्ते॒ । यः । ए॒वम् । वि॒द्वान् । द्वि॒पदा॑भि॒रिति॑ द्वि - पदा॑भिः । गार्.ह॑पत्य॒मिति॒ गार्.ह॑ - प॒त्य॒म् । उ॒प॒तिष्ठ॑त॒ इत्यु॑प - तिष्ठ॑ते ।