रात्रिं॒ प्राऽ*वि॑श॒न्ते दे॒वा ही॒ना अ॑मन्यन्त॒ ते॑ऽपश्यन्नाग्ने॒यी रात्रि॑राग्ने॒याः प॒शव॑ इ॒ममे॒वाग्निꣳ स्त॑वाम॒ स नः॑ स्तु॒तः प॒शून् पुन॑र्दास्य॒तीति॒ ते᳚ऽग्निम॑स्तुव॒न्थ् स ए᳚भ्यः स्तु॒तो रात्रि॑या॒ अद्ध्यह॑र॒भि प॒शून्निरा᳚र्ज॒त्ते दे॒वाः प॒शून् वि॒त्त्वा कामाꣳ॑ अकुर्वत॒ य ए॒वं ॅवि॒द्वान॒ग्निमु॑प॒तिष्ठ॑ते पशु॒मान् भ॑व - [ ]
पदपाठः (Word-by-word)
रात्रि᳚म् । प्रेति॑ । अ॒वि॒श॒न्न् । ते । दे॒वाः । ही॒नाः । अ॒म॒न्य॒न्त॒ । ते । अ॒प॒श्य॒न्न् । आ॒ग्ने॒यी । रात्रिः॑ । आ॒ग्ने॒याः । प॒शवः॑ । इ॒मम् । ए॒व । अ॒ग्निम् । स्त॒वा॒म॒ । सः । नः॒ । स्तु॒तः । प॒शून् । पुनः॑ । दा॒स्य॒ति॒ । इति॑ । ते । अ॒ग्निम् । अ॒स्तु॒व॒न्न् । सः । ए॒भ्यः॒ । स्तु॒तः । रात्रि॑याः । अधीति॑ । अहः॑ । अ॒भीति॑ । प॒शून् । निरिति॑ । आ॒र्ज॒त् । ते । दे॒वाः । प॒शून् । वि॒त्त्वा । कामान्॑ । अ॒कु॒र्व॒त॒ । यः । ए॒वम् । वि॒द्वान् । अ॒ग्निम् । उ॒प॒तिष्ठ॑त॒ इत्यु॑प - तिष्ठ॑ते । प॒शु॒मानिति॑ पशु - मान् । भ॒व॒ति॒ ।