पु॑रो॒डाशा᳚त् कर॒म्भात् । धा॒ना॒सो॒मान्म॒न्थिन॑ इन्द्र शु॒क्राथ् स्वाहा॑कृत॒मिन्द्रा॑य॒ तं जु॑होमि ॥यस्ते᳚ द्र॒फ्सो मधु॑माꣳ इन्द्रि॒यावा॒न्थ् स्वाहा॑कृतः॒ पुन॑र॒प्येति॑ दे॒वान् । दि॒वः पृ॑थि॒व्याः पर्य॒न्तरि॑क्षा॒थ् स्वाहा॑ कृत॒मिन्द्रा॑य॒ तं जु॑होमि ॥ अ॒द्ध्व॒र्युर्वा ऋ॒त्विजां᳚ प्रथ॒मो यु॑ज्यते॒ तेन॒ स्तोमो॑ योक्त॒व्य॑ इत्या॑हु॒र्वाग॑ग्रे॒गा अग्र॑ एत्वृजु॒गा दे॒वेभ्यो॒ यशो॒ मयि॒ दध॑ती प्रा॒णान् प॒शुषु॑ प्र॒जां मयि॑- [ ]
पदपाठः (Word-by-word)
पु॒रो॒डाशा᳚त् । क॒र॒म्भात् ॥ धा॒ना॒सो॒मादिति॑ धाना-सो॒मात् । म॒न्थिनः॑ । इ॒न्द्र॒ । शु॒क्रात् । स्वाहा॑कृत॒मिति॒ स्वाहा᳚ - कृ॒त॒म् । इन्द्रा॑य । तम् । जु॒हो॒मि॒ ॥ यः । ते॒ । द्र॒फ्सः । मधु॑मा॒निति॒ मधु॑ - मा॒न् । इ॒न्द्रि॒यावा॒निती᳚न्द्रि॒य - वा॒न् । स्वाहा॑कृत॒ इति स्वाहा᳚-कृ॒तः॒ । पुनः॑ । अ॒प्येतीत्य॑पि - एति॑ । दे॒वान् ॥ दि॒वः । पृ॒थि॒व्याः । परीति॑ । अ॒न्तरि॑क्षात् । स्वाहा॑कृत॒मिति॒ स्वाहा᳚ - कृ॒त॒म् । इन्द्रा॑य । तम् । जु॒हो॒मि॒ ॥ अ॒द्ध्व॒र्युः । वै । ऋ॒त्विजा᳚म् । प्र॒थ॒मः । यु॒ज्य॒ते॒ । तेन॑ । स्तोमः॑ । यो॒क्त॒व्यः॑ । इति॑ । आ॒हुः॒ । वाक् । अ॒ग्रे॒गा इत्य॑ग्रे - गाः । अग्र᳚ । ए॒तु॒ । ऋ॒जु॒गा इत्यृ॑जु - गाः । दे॒वेभ्यः॑ । यशः॑ । मयि॑ । दध॑ती । प्रा॒णानिति॑ प्र - अ॒नान् । प॒शुषु॑ । प्र॒जामिति॑ प्र - जाम् । मयि॑ ।