ते स॒ह यु॒नज्मि॒ वाचꣳ॑ स॒ह सूर्ये॑ण ते यु॒नज्मि॑ ति॒स्रो वि॒पृचः॒ सूर्य॑स्य ते । अ॒ग्निर्दे॒वता॑ गाय॒त्री छन्द॑ उपाꣳ॒॒शोः पात्र॑मसि॒ सोमो॑ दे॒वता᳚ त्रि॒ष्टुप् छन्दो᳚ऽन्तर्या॒मस्य॒ पात्र॑म॒सीन्द्रो॑ दे॒वता॒ जग॑ती॒ छन्द॑ इन्द्रवायु॒वोः पात्र॑मसि॒ बृह॒स्पति॑र् दे॒वता॑ऽनु॒ष्टुप् छन्दो॑ मि॒त्रावरु॑णयोः॒ पात्र॑मस्य॒श्विनौ॑ दे॒वता॑ प॒ङ्क्तिश्छन्दो॒ऽश्विनोः॒ पात्र॑मसि॒ सूर्यो॑ दे॒वता॑ बृह॒ती - [ ]
पदपाठः (Word-by-word)
ते॒ । स॒ह । यु॒नज्मि॑ । वाच᳚म् । स॒ह । सूर्ये॑ण । ते॒ । यु॒नज्मि॑ । ति॒स्रः । वि॒पृच॒ इति॑ वि - पृचः॑ । सूर्य॑स्य । ते॒ ॥ अ॒ग्निः । दे॒वता᳚ । गा॒य॒त्री । छन्दः॑ । उ॒पाꣳ॒॒शोरित्यु॑प - अꣳ॒॒शोः । पात्र᳚म् । अ॒सि॒ । सोमः॑ । दे॒वता᳚ । त्रि॒ष्टुप् । छन्दः॑ । अ॒न्त॒र्या॒मस्येत्य॑न्तः - या॒मस्य॑ । पात्र᳚म् । अ॒सि॒ । इन्द्रः॑ । दे॒वता᳚ । जग॑ती । छन्दः॑ । इ॒न्द्र॒वा॒यु॒वोरिती᳚न्द्र-वा॒यु॒वोः । पात्र᳚म् । अ॒सि॒ । बृह॒स्पतिः॑ । दे॒वता᳚ । अ॒नु॒ष्टुबित्य॑नु - स्तुप् । छन्दः॑ । मि॒त्रावरु॑णयो॒रिति॑ मि॒त्रा-वरु॑णयोः । पात्र᳚म् । अ॒सि॒ । अ॒श्विनौ᳚ । दे॒वता᳚ । प॒ङ्क्तिः । छन्दः॑ । अ॒श्विनोः᳚ । पात्र᳚म् । अ॒सि॒ । सूर्यः॑ । दे॒वता᳚ । बृ॒ह॒ती ।