य ए॒वं ॅवेदै॒ष ते॑ रुद्रभा॒गो यं नि॒रया॑चथा॒स्तं जु॑षस्व वि॒देर्गौ॑प॒त्यꣳ रा॒यस्पोषꣳ॑ सु॒वीर्यꣳ॑ संॅवथ्स॒रीणाꣳ॑ स्व॒स्तिं ॥ मनुः॑ पु॒त्रेभ्यो॑ दा॒यं ॅव्य॑भज॒थ् स नाभा॒नेदि॑ष्ठं ब्रह्म॒चर्यं॒ ॅवस॑न्तं॒ निर॑भज॒थ् स आऽग॑च्छ॒थ् सो᳚ऽब्रवीत् क॒था मा॒ निर॑भा॒गिति॒ न त्वा॒ निर॑भाक्ष॒मित्य॑-ब्रवी॒दङ्गि॑रस इ॒मे स॒त्रमा॑सते॒ ते - [ ]
पदपाठः (Word-by-word)
यः । ए॒वम् । वेद॑ । ए॒षः । ते॒ । रु॒द्र॒ । भा॒गः । यम् । नि॒रया॑चथा॒ इति॑ निः-अया॑चथाः । तम् । जु॒ष॒स्व॒ । वि॒देः । गौ॒प॒त्यम् । रा॒यः । पोष᳚म् । सु॒वीर्य॒मिति॑ सु - वीर्य᳚म् । सं॒ॅव॒थ्स॒रीणा॒मिति॑ सं - व॒थ्स॒रीणा᳚म् । स्व॒स्तिम् ॥ मनुः॑ । पु॒त्रेभ्यः॑ । दा॒यम् । वीति॑ । अ॒भ॒ज॒त् । सः । नाभा॒नेदि॑ष्ठम् । ब्र॒ह्म॒चर्य॒मिति॑ ब्रह्म-चर्य᳚म् । वस॑न्तम् । निरिति॑ । अ॒भ॒ज॒त् । सः । एति॑ । अ॒ग॒च्छ॒त् । सः । अ॒ब्र॒वी॒त् । क॒था । मा॒ । निरिति॑ । अ॒भा॒क् । इति॑ । न । त्वा॒ । निरिति॑ । अ॒भा॒क्ष॒म् । इति॑ । अ॒ब्र॒वी॒त् । अङ्गि॑रसः । इ॒मे । स॒त्रम् । आ॒स॒ते॒ । ते ।