मह्य॑मि॒मानित्य॑ब्रवी॒न्न वै तस्य॒ त ई॑शत॒ इत्य॑ब्रवी॒द्-यद्-य॑ज्ञ्वा॒स्तौ हीय॑ते॒ मम॒ वै तदिति॒ तस्मा᳚द्-यज्ञ्वा॒स्तु नाभ्य॒वेत्यꣳ॒॒ सो᳚ऽब्रवीद्-य॒ज्ञे मा ऽऽभ॒जाथ॑ ते प॒शून् नाभि मꣳ॑स्य॒ इति॒ तस्मा॑ ए॒तं म॒न्थिनः॑ सꣳ स्रा॒वम॑जुहो॒त् ततो॒ वै तस्य॑ रु॒द्रः प॒शून् नाभ्य॑मन्यत॒ यत्रै॒त ( ) मे॒वं ॅवि॒द्वान् म॒न्थिनः॑ सꣳ स्रा॒वं जु॒होति॒ न तत्र॑ रु॒द्रः प॒शून॒भि म॑न्यते ॥
पदपाठः (Word-by-word)
मह्य᳚म् । इ॒मान् । इति॑ । अ॒ब्र॒वी॒त् । न । वै । तस्य॑ । ते । ई॒श॒ते॒ । इति॑ । अ॒ब्र॒वी॒त् । यत् । य॒ज्ञ्॒वा॒स्ताविति॑ यज्ञ्-वा॒स्तौ । हीय॑ते । मम॑ । वै । तत् । इति॑ । तस्मा᳚त् । य॒ज्ञ्॒वा॒स्त्विति॑ यज्ञ् - वा॒स्तु । न । अ॒भ्य॒वेत्य॒मित्य॑भि - अ॒वेत्य᳚म् । सः । अ॒ब्र॒वी॒त् । य॒ज्ञे । मा॒ । एति॑ । भ॒ज॒ । अथ॑ । ते॒ । प॒शून् । न । अ॒भीति॑ । मꣳ॒॒स्ये॒ । इति॑ । तस्मै᳚ । ए॒तम् । म॒न्थिनः॑ । सꣳ॒॒स्रा॒वमिति॑ सं - स्रा॒वम् । अ॒जु॒हो॒त् । ततः॑ । वै । तस्य॑ । रु॒द्रः । प॒शून् । न । अ॒भीति॑ । अ॒म॒न्य॒त॒ । यत्र॑ । ए॒तम् ( ) । ए॒वम् । वि॒द्वान् । म॒न्थिनः॑ । सꣳ॒॒स्रा॒वमिति॑ सं - स्रा॒वम् । जु॒होति॑ । न । तत्र॑ । रु॒द्रः । प॒शून् । अ॒भीति॑ । म॒न्य॒त॒ ॥