ब्रह्म॑णै॒वैन॒मा व॑र्तयति॒ वि ते॑ भिनद्मि तक॒रीमित्या॑ह यथाय॒जुरे॒वैतदु॑- रुद्र॒फ्सो वि॒श्वरू॑प॒ इन्दु॒रित्या॑ह प्र॒जा वै प॒शव॒ इन्दुः॑ प्र॒जयै॒वैनं॑ प॒शुभिः॒ सम॑र्द्धयति॒ दिवं॒ ॅवै य॒ज्ञ्स्य॒ व्यृ॑द्धं गच्छति पृथि॒वीमति॑रिक्तं॒ तद्यन्न श॒मये॒दार्ति॒मार्च्छे॒द्-यज॑मानो म॒ही द्यौः पृ॑थि॒वीच॑ न॒ इत्या॑ - [ ]
पदपाठः (Word-by-word)
ब्रह्म॑णा । ए॒व । ए॒न॒म् । एति॑ । व॒र्त॒य॒ति॒ । वीति॑ । ते॒ । भि॒न॒द्मि॒ । त॒क॒रीम् । इति॑ । आ॒ह॒ । य॒था॒य॒जुरिति॑ यथा - य॒जुः । ए॒व । ए॒तत् । उ॒रु॒द्र॒फ्स इत्यु॑रु - द्र॒फ्सः । वि॒श्वरू॑प॒ इति॑ वि॒श्व - रू॒पः॒ । इन्दुः॑ । इति॑ । आ॒ह॒ । प्र॒जेति॑ प्र - जा । वै । प॒शवः॑ । इन्दुः॑ । प्र॒जयेति॑ प्र - जया᳚ । ए॒व । ए॒न॒म् । प॒शुभि॒रिति॑ प॒शु - भिः॒ । समिति॑ । अ॒र्द्ध॒य॒ति॒ । दिव᳚म् । वै । य॒ज्ञ्स्य॑ । व्यृ॑द्ध॒मिति॒ वि-ऋ॒द्ध॒म् । ग॒च्छ॒ति॒ । पृ॒थि॒वीम् । अति॑रिक्त॒मित्यति॑ - रि॒क्त॒म् । तत् । यत् । न । श॒मये᳚त् । आर्ति᳚म् । एति॑ । ऋ॒च्छे॒त् । यज॑मानः । म॒ही । द्यौः । पृ॒थि॒वी । च॒ । नः॒ । इति॑ ।