ना॒यत॑ने शमयत्यभि॒चर॑ता प्रतिलो॒मꣳ हो॑त॒व्याः᳚ प्रा॒णाने॒वास्य॑ प्र॒तीचः॒ प्रति॑ यौति॒ तं ततो॒ येन॒ केन॑ च स्तृणुते॒ स्वकृ॑त॒ इरि॑णे जुहोति प्रद॒रे वै॒तद्वा अ॒स्यै निर्.ऋ॑तिगृहीतं॒ निर्.ऋ॑तिगृहीत ए॒वैनं॒ निर्.ऋ॑त्या ग्राहयति॒ यद्वा॒चः क्रू॒रं तेन॒ वष॑ट् करोति वा॒च ए॒वैनं॑ क्रू॒रेण॒ प्रवृ॑श्चति ता॒जगार्ति॒मार्च्छ॑ति॒ यस्य॑ का॒मये॑ता॒न्नाद्य॒ - [ ]
पदपाठः (Word-by-word)
आ॒यत॑न॒ इत्या᳚ - यत॑ने । श॒म॒य॒ति॒ । अ॒भि॒चर॒तेत्य॑भि - चर॑ता । प्र॒ति॒लो॒ममिति॑ प्रति - लो॒मम् । हो॒त॒व्याः᳚ । प्रा॒णानिति॑ प्र - अ॒नान् । ए॒व । अ॒स्य॒ । प्र॒तीचः॑ । प्रतीति॑ । यौ॒ति॒ । तम् । ततः॑ । येन॑ । केन॑ । च॒ । स्तृ॒णु॒ते॒ । स्वकृ॑त॒ इति॒ स्व - कृ॒ते॒ । इरि॑णे । जु॒हो॒ति॒ । प्र॒द॒र इति॑ प्र - द॒रे । वा॒ । ए॒तत् । वै । अ॒स्यै । निर्.ऋ॑तिगृहीत॒मिति॒ निर्.ऋ॑ति - गृ॒ही॒त॒म् । निर्.ऋ॑तिगृहीत॒ इति॒ निर्.ऋ॑ति-गृ॒ही॒ते॒ । ए॒व । ए॒न॒म् । निर्.ऋ॒त्येति॒ निः-ऋ॒त्या॒ । ग्रा॒ह॒य॒ति॒ । यत् । वा॒चः । क्रू॒रम् । तेन॑ । वष॑ट् । क॒रो॒ति॒ । वा॒चः । ए॒व । ए॒न॒म् । क्रू॒रेण॑ । प्रेति॑ । वृ॒श्च॒ति॒ । ता॒जक् । आर्ति᳚म् । एति॑ । ऋ॒च्छ॒ति॒ । यस्य॑ । का॒मये॑त । अ॒न्नाद्य॒मित्य॑न्न - अद्य᳚म् ।