द्रुक्का॑म॒श्छन्दाꣳ॑सि॒ वै देवि॑का॒श्छन्दाꣳ॑सीव॒ खलु॒ वै रुक् छन्दो॑भिरे॒वास्मि॒न् रुचं॑ दधातिक्षी॒रे भ॑वन्ति॒ रुच॑मे॒वास्मि॑न् दधति मद्ध्य॒तो धा॒तारं॑ करोति मद्ध्य॒त ए॒वैनꣳ॑ रु॒चो द॑धातिगाय॒त्री वा अनु॑मतिस्त्रि॒ष्टुग्रा॒का जग॑ती सिनीवा॒ल्य॑नु॒ष्टुप् कु॒हूर्द्धा॒ता व॑षट्का॒रः पू᳚र्वप॒क्षो रा॒काऽप॑रप॒क्षः कु॒हूर॑मावा॒स्या॑ सिनीवा॒ली पौ᳚र्णमा॒स्यनु॑मतिश्च॒न्द्रमा॑ धा॒ताऽष्टौ - [ ]
पदपाठः (Word-by-word)
रुक्का॑म॒ इति॒ रुक्-का॒मः॒ । छन्दाꣳ॑सि । वै । देवि॑काः । छन्दाꣳ॑सि । इ॒व॒ । खलु॑ । वै । रुक् । छन्दो॑भि॒रिति॒ छन्दः॑-भिः॒ । ए॒व । अ॒स्मि॒न्न् । रुच᳚म् । द॒धा॒ति॒ । क्षी॒रे । भ॒व॒न्ति॒ । रुच᳚म् । ए॒व । अ॒स्मि॒न्न् । द॒ध॒ति॒ । म॒द्ध्य॒तः । धा॒तार᳚म् । क॒रो॒ति॒ । म॒द्ध्य॒तः । ए॒व । ए॒न॒म् । रु॒चः । द॒धा॒ति॒ । गा॒य॒त्री । वै । अनु॑मति॒रित्य॑नु - म॒तिः॒ । त्रि॒ष्टुक् । रा॒का । जग॑ती । सि॒नी॒वा॒ली । अ॒नु॒ष्टुबित्य॑नु - स्तुप् । कु॒हूः । धा॒ता । व॒ष॒ट्का॒र इति॑ वषट् - का॒रः । पू॒र्व॒प॒क्ष इति॑ पूर्व - प॒क्षः । रा॒का । अ॒प॒र॒प॒क्ष इत्य॑पर - प॒क्षः । कु॒हूः । अ॒मा॒वा॒स्येत्य॑मा - वा॒स्या᳚ । सि॒नी॒वा॒ली । पौ॒र्ण॒मा॒सीति॑ पौर्ण - मा॒सी । अनु॑मति॒रित्य॑नु - म॒तिः॒ । च॒न्द्रमाः᳚ । धा॒ता । अ॒ष्टौ ।