अग्ने॒ विश्वे॑भिः स्वनीक दे॒वैरूर्णा॑वन्तं प्रथ॒मः सी॑द॒ योनिं᳚ । कु॒ला॒यिनं॑ घृ॒तव॑न्तꣳ सवि॒त्रे य॒ज्ञ्ं न॑य॒ यज॑मानाय सा॒धु ॥ सीद॑ होतः॒ स्व उ॑ लो॒के चि॑कि॒त्वान्थ्सा॒दया॑ य॒ज्ञ्ꣳ सु॑कृ॒तस्य॒ योनौ᳚ । दे॒वा॒वीर्दे॒वान्. ह॒विषा॑ यजा॒स्यग्ने॑ बृ॒हद्-यज॑माने॒ वयो॑ धाः ॥ नि होता॑ होतृ॒षद॑ने॒ विदा॑नस्त्वे॒षो दी॑दि॒वाꣳ अ॑सदथ् सु॒दक्षः॑ । अद॑ब्धव्रत-प्रमति॒र्वसि॑ष्ठः सहस्रं भ॒रः शुचि॑जिह्वो अ॒ग्निः ॥ त्वं दू॒तस्त्व - [ ]
पदपाठः (Word-by-word)
अग्ने᳚ । विश्वे॑भिः । स्व॒नी॒केति॑ सु - अ॒नी॒क॒ । दे॒वैः । ऊर्णा॑वन्त॒मित्यूर्णा᳚-व॒न्त॒म् । प्र॒थ॒मः । सी॒द॒ । योनि᳚म् ॥ कु॒ला॒यिन᳚म् । घृ॒तव॑न्त॒मिति॑ घृ॒त - व॒न्त॒म् । स॒वि॒त्रे । य॒ज्ञ्म् । न॒य॒ । यज॑मानाय । सा॒धु ॥ सीद॑ । हो॒तः॒ । स्वे । उ॒ । लो॒के । चि॒कि॒त्वान् । सा॒दय॑ । य॒ज्ञ्म् । सु॒कृ॒तस्येति॑ सु - कृ॒तस्य॑ । योनौ᳚ ॥ दे॒वा॒वीरिति॑ देव - अ॒वीः । दे॒वान् । ह॒विषा᳚ । य॒जा॒सि॒ । अग्ने᳚ । बृ॒हत् । यज॑माने । वयः॑ । धाः॒ ॥ नीति॑ । होता᳚ । हो॒तृ॒षद॑न॒ इति॑ होतृ-सद॑ने । विदा॑नः । त्वे॒षः । दी॒दि॒वान् । अ॒स॒द॒त् । सु॒दक्ष॒ इति॑ सु - दक्षः॑ ॥ अद॑ब्धव्रतप्रमति॒रित्यद॑ब्धव्रत - प्र॒म॒तिः॒ । वसि॑ष्ठः । स॒ह॒स्र॒भं॒र इति॑ सहस्रं - भ॒रः । शुचि॑जिह्व॒ इति॒ शुचि॑ - जि॒ह्वः॒ । अ॒ग्निः ॥ त्वम् । दू॒तः । त्वम् ।