पृथि॒व्याः स॑मिधा॒-नम॒ग्निꣳ रा॒यस्पोषा॑य बृह॒ते ह॑वामहे । इ॒र॒म्म॒दं बृ॒हदु॑क्थं॒ ॅयज॑त्रं॒ जेता॑रम॒ग्निं पृत॑नासु सास॒हिं ॥ याः सेना॑ अ॒भीत्व॑रीरा-व्या॒धिनी॒-रुग॑णा उ॒त । ये स्ते॒ना ये च॒ तस्क॑रा॒स्ताꣳस्ते॑ अ॒ग्नेऽपि॑ दधाम्या॒स्ये᳚ ॥ दꣳष्ट्रा᳚भ्यां म॒लिम्लू॒न् जंभ्यै॒-स्तस्क॑राꣳ उ॒त । हनू᳚भ्याꣳ स्ते॒नान्-भ॑गव॒स्ताꣳ-स्त्वं खा॑द॒ सुखा॑दितान् ॥ ये जने॑षु म॒लिम्ल॑वः स्ते॒नास॒-स्तस्क॑रा॒ वने᳚ । ये - [ ]
पदपाठः (Word-by-word)
पृ॒थि॒व्याः । स॒मि॒धा॒नमिति॑ सं-इ॒धा॒नम् । अ॒ग्निम् । रा॒यः । पोषा॑य । बृ॒ह॒ते । ह॒वा॒म॒हे॒ ॥ इ॒र॒मं॒दमिती॑रं - म॒दम् । बृ॒हदु॑क्थ॒मिति॑ बृ॒हत् - उ॒क्थ॒म् । यज॑त्रम् । जेता॑रम् । अ॒ग्निम् । पृत॑नासु । सा॒स॒हिम् ॥ याः । सेनाः᳚ । अ॒भीत्व॑री॒रित्य॑भि - इत्व॑रीः । आ॒व्या॒धिनी॒रित्या᳚ - व्या॒धिनीः᳚ । उग॑णाः । उ॒त ॥ ये । स्ते॒नाः । ये । च॒ । तस्क॑राः । तान् । ते॒ । अ॒ग्ने॒ । अपीति॑ । द॒धा॒मि॒ । आ॒स्ये᳚ ॥ दꣳष्ट्रा᳚भ्याम् । म॒लिम्लून्न्॑ । जंभ्यैः᳚ । तस्क॑रान् । उ॒त ॥ हनू᳚भ्या॒मिति॒ हनु॑ - भ्या॒म् । स्ते॒नान् । भ॒ग॒व॒ इति॑ भग - वः॒ । तान् । त्वम् । खा॒द॒ । सुखा॑दिता॒निति॒ सु - खा॒दि॒ता॒न् ॥ ये । जने॑षु । म॒लिम्ल॑वः । स्ते॒नासः॑ । तस्क॑राः । वने᳚ ॥ ये ।