कक्षे᳚ष्वघा॒ यव॒स्ताꣳस्ते॑ दधामि॒ जंभ॑योः ॥ यो अ॒स्मभ्य॑मराती॒याद्-यश्च॑ नो॒ द्वेष॑ते॒ जनः॑ । निन्दा॒द्यो अ॒स्मान् दिफ्सा᳚च्च॒ सर्वं॒ तं म॑स्म॒सा कु॑रु ॥ सꣳशि॑तं मे॒ ब्रह्म॒ सꣳशि॑तं ॅवी॒र्यं॑ बलं᳚ । सꣳशि॑तं क्ष॒त्रं जि॒ष्णु यस्या॒ऽहमस्मि॑ पु॒रोहि॑तः ॥ उदे॑षां बा॒हू अ॑तिर॒मुद्वर्च॒ उदू॒ बलं᳚ । क्षि॒णोमि॒ ब्रह्म॑णा॒-ऽमित्रा॒नुन्न॑यामि॒ - [ ]
पदपाठः (Word-by-word)
कक्षे॑षु । अ॒घा॒यव॒ इत्य॑घ - यवः॑ । तान् । ते॒ । द॒धा॒मि॒ । जंभ॑योः ॥ यः । अ॒स्मभ्य॒मित्य॒स्म-भ्य॒म् । अ॒रा॒ती॒यात् । यः । च॒ । नः॒ । द्वेष॑ते । जनः॑ ॥ निन्दा᳚त् । यः । अ॒स्मान् । दिफ्सा᳚त् । च॒ । सर्व᳚म् । तम् । म॒स्म॒सा । कु॒रु॒ ॥ सꣳशि॑त॒मिति॒ सं - शि॒त॒म् । मे॒ । ब्रह्म॑ । सꣳशि॑त॒मिति॒ सं - शि॒त॒म् । वी॒र्य᳚म् । बल᳚म् ॥ सꣳशि॑त॒मिति॒ सं - शि॒त॒म् । क्ष॒त्रम् । जि॒ष्णु । यस्य॑ । अ॒हम् । अस्मि॑ । पु॒रोहि॑त॒ इति॑ पु॒रः - हि॒तः॒ ॥ उदिति॑ । ए॒षा॒म् । बा॒हू इति॑ । अ॒ति॒र॒म् । उदिति॑ । वर्चः॑ । उदिति॑ । उ॒ । बल᳚म् ॥ क्षि॒णोमि॑ । ब्रह्म॑णा । अ॒मित्रान्॑ । उदिति॑ । न॒या॒मि॒ ।