अ॒न्तर्वि भा॑ति दे॒वा अ॒ग्निं धा॑रयन् द्रविणो॒दाः ॥ सु॒प॒र्णो॑ऽसि ग॒रुत्मा᳚न् त्रि॒वृत्ते॒ शिरो॑ गाय॒त्रं चक्षुः॒ स्तोम॑ आ॒त्मा साम॑ ते त॒नूर्वा॑मदे॒व्यं बृ॑हद्-रथन्त॒रे प॒क्षौ य॑ज्ञाय॒ज्ञियं॒ पुच्छं॒ छन्दाꣳ॒॒स्यङ्गा॑नि॒ धिष्णि॑याः श॒फा यजूꣳ॑षि॒ नाम॑ ॥ सु॒प॒र्णो॑ऽसि ग॒रुत्मा॒न् दिवं॑ गच्छ॒ सुवः॑ पत ॥
पदपाठः (Word-by-word)
अ॒न्तः । वीति॑ । भा॒ति॒ । दे॒वाः । अ॒ग्निम् । धा॒र॒य॒न्न् । द्र॒वि॒णो॒दा इति॑ द्रविणः - दाः ॥ सु॒प॒र्ण इति॑ सु - प॒र्णः । अ॒सि॒ । ग॒रुत्मान्॑ । त्रि॒वृदिति॑ त्रि - वृत् । ते॒ । शिरः॑ । गा॒य॒त्रम् । चक्षुः॑ । स्तोमः॑ । आ॒त्मा । साम॑ । ते॒ । त॒नूः । वा॒म॒दे॒व्यमिति॑ वाम - दे॒व्यम् । बृ॒ह॒द्र॒थ॒न्त॒रे इति॑ बृहत् - र॒थ॒न्त॒रे । प॒क्षौ । य॒ज्ञा॒य॒ज्ञिय᳚म् । पुच्छ᳚म् । छन्दाꣳ॑सि । अङ्गा॑नि । धिष्णि॑याः । श॒फाः । यजूꣳ॑षि । नाम॑ ॥ सु॒प॒र्ण इति॑ सु - प॒र्णः । अ॒सि॒ । ग॒रुत्मान्॑ । दिव᳚म् । ग॒च्छ॒ । सुवः॑ । प॒त॒ ॥