दे॒वेषु॑ च सवित॒र्मानु॑षेषु च॒ त्वन्नो॒ अत्र॑ सुवता॒दना॑गसः ॥ चो॒द॒यि॒त्री सू॒नृता॑नां॒ चेत॑न्ती सुमती॒नां । य॒ज्ञ्ं द॑धे॒ सर॑स्वती ॥ पावी॑रवी क॒न्या॑ चि॒त्रायुः॒ सर॑स्वती वी॒रप॑त्नी॒ धियं॑ धात् । ग्नाभि॒रच्छि॑द्रꣳ शर॒णꣳ स॒जोषा॑ दुरा॒धर्.षं॑ गृण॒ते शर्म॑ यꣳसत् ॥ पू॒षा गा अन्वे॑तु नः पू॒षा र॑क्ष॒त्वर्व॑तः । पू॒षा वाजꣳ॑ सनोतु नः ॥ शु॒क्रं ते॑ अ॒न्यद्य॑ज॒तं ते॑ अ॒न्य - [ ]
पदपाठः (Word-by-word)
दे॒वेषु । च॒ । स॒वि॒तः॒ । मानु॑षेषु । च॒ । त्वम् । नः॒ । अत्र॑ । सु॒व॒ता॒त् । अना॑गसः ॥ चो॒द॒यि॒त्री । सू॒नृता॑नाम् । चेत॑न्ती । सु॒म॒ती॒नामिति॑ सु - म॒ती॒नाम् ॥ य॒ज्ञ्म् । द॒धे॒ । सर॑स्वती ॥ पावी॑रवी । क॒न्या᳚ । चि॒त्रायु॒रिति॑ चि॒त्र - आ॒युः॒ । सर॑स्वती । वी॒रप॒त्नीति॑ वी॒र - प॒त्नी॒ । धिय᳚म् । धा॒त् ॥ ग्नाभिः॑ । अच्छि॑द्रम् । श॒र॒णम् । स॒जोषा॒ इति॑ स-जोषाः᳚ । दु॒रा॒धर्.ष॒मिति॑ दुः - आ॒धर्.ष᳚म् । गृ॒ण॒ते । शर्म॑ । यꣳ॒॒स॒त् ॥ पू॒षा । गाः । अन्विति॑ । ए॒तु॒ । नः॒ । पू॒षा । र॒क्ष॒तु॒ । अर्व॑तः ॥ पू॒षा । वाज᳚म् । स॒नो॒तु॒ । नः॒ ॥ शु॒क्रम् । ते॒ । अ॒न्यत् । य॒ज॒तम् । ते॒ । अ॒न्यत् ।