सꣳ॒॒सृज्य॑ पृथि॒वीं भूमिं॑ च॒ ज्योति॑षा स॒ह । सुजा॑तं जा॒तवे॑दसम॒ग्निं ॅवै᳚श्वान॒रं ॅवि॒भुं ॥ अ॒य॒क्ष्माय॑ त्वा॒ सꣳ सृ॑जामि प्र॒जाभ्यः॑ । विश्वे᳚ त्वा दे॒वा वै᳚श्वान॒राः सꣳ सृ॑ज॒न्त्वा-नु॑ष्टुभेन॒ छन्द॑साऽङ्गिर॒स्वत् ॥ रु॒द्राः स॒भृंत्य॑ पृथि॒वीं बृ॒हज्ज्योतिः॒ समी॑धिरे । तेषां᳚ भा॒नुरज॑स्र॒ इच्छु॒क्रो दे॒वेषु॑ रोचते ॥ सꣳ सृ॑ष्टां॒ ॅवसु॑भी रु॒द्रैर्द्धीरैः᳚ कर्म॒ण्यां᳚ मृदं᳚ । हस्ता᳚भ्यां मृ॒द्वीं कृ॒त्वा सि॑नीवा॒ली क॑रोतु॒ - [ ]
पदपाठः (Word-by-word)
सꣳ॒॒सृज्येति॑ सं - सृज्य॑ । पृ॒थि॒वीम् । भूमि᳚म् । च॒ । ज्योति॑षा । स॒ह ॥ सुजा॑त॒मिति॒ सु - जा॒त॒म् । जा॒तवे॑दस॒मिति॑ जा॒त-वे॒द॒स॒म् । अ॒ग्निम् । वै॒श्वा॒न॒रम् । वि॒भुमिति॑ वि - भुम् ॥ अ॒य॒क्ष्माय॑ । त्वा॒ । समिति॑ । सृ॒जा॒मि॒ । प्र॒जाभ्य॒ इति॑ प्र-जाभ्यः॑ ॥ विश्वे᳚ । त्वा॒ । दे॒वाः । वै॒श्वा॒न॒राः । समिति॑ । सृ॒ज॒न्तु॒ । आनु॑ष्टुभे॒नेत्यानु॑-स्तु॒भे॒न॒ । छन्द॑सा । अ॒ङ्गि॒र॒स्वत् ॥ रु॒द्राः । स॒भृंत्येति॑ सं - भृत्य॑ । पृ॒थि॒वीम् । बृ॒हत् । ज्योतिः॑ । समिति॑ । ई॒धि॒रे॒ ॥ तेषा᳚म् । भा॒नुः । अज॑स्रः । इत् । शु॒क्रः । दे॒वेषु॑ । रो॒च॒ते॒ ॥ सꣳसृ॑ष्टा॒मिति॒ सं - सृ॒ष्टा॒म् । वसु॑भि॒रिति॒ वसु॑ - भिः॒ । रु॒द्रैः । धीरैः᳚ । क॒र्म॒ण्या᳚म् । मृद᳚म् ॥ हस्ता᳚भ्याम् । मृ॒द्वीम् । कृ॒त्वा । सि॒नी॒वा॒ली । क॒रो॒तु॒ ।