तां ॥ सि॒नी॒वा॒ली सु॑कप॒र्दा सु॑कुरी॒रा स्वौ॑प॒शा । सा तुभ्य॑मदिते मह॒ ओखां द॑धातु॒ हस्त॑योः ॥ उ॒खां क॑रोतु॒ शक्त्या॑ बा॒हुभ्या॒-मदि॑तिर्द्धि॒या । मा॒ता पु॒त्रं ॅयथो॒पस्थे॒ साऽग्निं बि॑भर्तु॒ गर्भ॒ आ ॥ म॒खस्य॒ शिरो॑ऽसि य॒ज्ञ्स्य॑ प॒दे स्थः॑ । वस॑वस्त्वा कृण्वन्तु गाय॒त्रेण॒ छन्द॑सा ऽङ्गिर॒स्वत् पृ॑थि॒व्य॑सि रु॒द्रास्त्वा॑ कृण्वन्तु॒ त्रैष्टु॑भेन॒ छन्द॑सा ऽङ्गिर॒स्वद॒न्तरि॑क्षमस्या - [ ]
पदपाठः (Word-by-word)
ताम् ॥ सि॒नी॒वा॒ली । सु॒क॒प॒र्देति॑ सु - क॒प॒र्दा । सु॒कु॒री॒रेति॑ सु - कु॒री॒रा । स्वौ॒प॒शेति॑ सु - औ॒प॒शा ॥ सा । तुभ्य᳚म् । अ॒दि॒ते॒ । म॒हे॒ । एति॑ । उ॒खाम् । द॒धा॒तु॒ । हस्त॑योः ॥ उ॒खाम् । क॒रो॒तु॒ । शक्त्या᳚ । बा॒हुभ्या॒मिति॑ बा॒हु - भ्या॒म् । अदि॑तिः । धि॒या ॥ मा॒ता । पु॒त्रम् । यथा᳚ । उ॒पस्थ॒ इत्यु॒प - स्थे॒ । सा । अ॒ग्निम् । बि॒भ॒र्तु॒ । गर्भे᳚ । आ ॥ म॒खस्य॑ । शिरः॑ । अ॒सि॒ । य॒ज्ञ्स्य॑ । प॒दे इति॑ । स्थः॒ ॥ वस॑वः । त्वा॒ । कृ॒ण्व॒न्तु॒ । गा॒य॒त्रेण॑ । छन्द॑सा । अ॒ङ्गि॒र॒स्वत् । पृ॒थि॒वी । अ॒सि॒ । रु॒द्राः । त्वा॒ । कृ॒ण्व॒न्तु॒ । त्रैष्टु॑भेन । छन्द॑सा । अ॒ङ्गि॒र॒स्वत् । अ॒न्तरि॑क्षम् । अ॒सि॒ ।