र्दे॒वी र्वि॒श्वदे᳚व्यावतीः पृथि॒व्याः स॒धस्थे᳚ऽङ्गिर॒स्वद्-द॑धतूखे धि॒षणा᳚स्त्वा दे॒वीर्वि॒श्वदे᳚व्यावतीः पृथि॒व्याः स॒धस्थे᳚-ऽङ्गिर॒स्व-द॒भीन्ध॑तामुखे॒ ग्नास्त्वा॑ दे॒वीर्वि॒श्वदे᳚व्यावतीः पृथि॒व्याः स॒धस्थे᳚ऽङ्गिर॒स्व-च्छ्र॑पयन्तूखे॒ वरू᳚त्रयो॒ जन॑यस्त्वा दे॒वीर्वि॒श्वदे᳚व्यावतीः पृथि॒व्याः स॒धस्थे᳚ऽङ्गिर॒स्वत् प॑चन्तूखे । मित्रै॒तामु॒खां प॑चै॒षा मा भे॑दि । ए॒तां ते॒ परि॑ ददा॒म्यभि॑त्त्यै ॥ अ॒भीमां - [ ]
पदपाठः (Word-by-word)
दे॒वीः । वि॒श्वदे᳚व्यावती॒रिति॑ वि॒श्वदे᳚व्य - व॒तीः॒ । पृ॒थि॒व्याः । स॒धस्थ॒ इति॑ स॒ध - स्थे॒ । अ॒ङ्गि॒र॒स्वत् । द॒ध॒तु॒ । उ॒खे॒ । धि॒षणाः᳚ । त्वा॒ । दे॒वीः । वि॒श्वदे᳚व्यावती॒रिति॑ वि॒श्वदे᳚व्य - व॒तीः॒ । पृ॒थि॒व्याः । स॒धस्थ॒ इति॑ स॒ध - स्थे॒ । अ॒ङ्गि॒र॒स्वत् । अ॒भीति॑ । इ॒न्ध॒ता॒म् । उ॒खे॒ । ग्नाः । त्वा॒ । दे॒वीः । वि॒श्वदे᳚व्यावती॒रिति॑ वि॒श्वदे᳚व्य - व॒तीः॒ । पृ॒थि॒व्याः । स॒धस्थ॒ इति॑ स॒ध - स्थे॒ । अ॒ङ्गि॒र॒स्वत् । श्र॒प॒य॒न्तु॒ । उ॒खे॒ । वरू᳚त्रयः । जन॑यः । त्वा॒ । दे॒वीः । वि॒श्वदे᳚व्यावती॒रिति॑ वि॒श्वदे᳚व्य - व॒तीः॒ । पृ॒थि॒व्याः । स॒धस्थ॒ इति॑ स॒ध - स्थे॒ । अ॒ङ्गि॒र॒स्वत् । प॒च॒न्तु॒ । उ॒खे॒ ॥ मित्र॑ । ए॒ताम् । उ॒खाम् । प॒च॒ । ए॒षा । मा । भे॒दि॒ ॥ ए॒ताम् । ते॒ । परीति॑ । द॒दा॒मि॒ । अभि॑त्त्यै ॥ अ॒भीति॑ । इ॒माम् ।