ताꣳ हस्ते॒ न्य॑वेष्टयत॒ तां मृ॒गेषु॒ न्य॑दधा॒थ् सा कृ॑ष्णविषा॒णा- ऽभ॑व॒दिन्द्र॑स्य॒ योनि॑रसि॒ मा मा॑ हिꣳसी॒रिति॑ कृष्णविषा॒णां प्र य॑च्छति॒ सयो॑निमे॒व य॒ज्ञ्ं क॑रोति॒ सयो॑निं॒ दक्षि॑णाꣳ॒॒ सयो॑नि॒मिन्द्रꣳ॑ सयोनि॒त्वाय॑ कृ॒ष्यै त्वा॑ सुस॒स्याया॒ इत्या॑ह॒ तस्मा॑दकृष्टप॒च्या ओष॑धयः पच्यन्ते सुपिप्प॒लाभ्य॒-स्त्वौष॑धीभ्य॒ इत्या॑ह॒ तस्मा॒दोष॑धयः॒ फलं॑ गृह्णन्ति॒ यद्धस्ते॑न - [ ]
पदपाठः (Word-by-word)
ताम् । हस्ते᳚ । नीति॑ । अ॒वे॒ष्ट॒य॒त॒ । ताम् । मृ॒गेषु॑ । नीति॑ । अ॒द॒धा॒त् । सा । कृ॒ष्ण॒वि॒षा॒णेति॑ कृष्ण - वि॒षा॒णा । अ॒भ॒व॒त् । इन्द्र॑स्य । योनिः॑ । अ॒सि॒ । मा । मा॒ । हिꣳ॒॒सीः॒ । इति॑ । कृ॒ष्ण॒वि॒षा॒णामिति॑ कृष्ण - वि॒षा॒णाम् । प्रेति॑ । य॒च्छ॒ति॒ । सयो॑नि॒मिति॒ स - यो॒नि॒म् । ए॒व । य॒ज्ञ्म् । क॒रो॒ति॒ । सयो॑नि॒मिति॒ स - यो॒नि॒म् । दक्षि॑णाम् । सयो॑नि॒मिति॒ स - यो॒नि॒म् । इन्द्र᳚म् । स॒यो॒नि॒त्वायेति॑ सयोनि-त्वाय॑ । कृ॒ष्यै । त्वा॒ । सु॒स॒स्याया॒ इति॑ सु - स॒स्यायै᳚ । इति॑ । आ॒ह॒ । तस्मा᳚त् । अ॒कृ॒ष्ट॒प॒च्या इत्य॑कृष्ट - प॒च्याः । ओष॑धयः । प॒च्य॒न्ते॒ । सु॒पि॒प्प॒लाभ्य॒ इति॑ सु - पि॒प्प॒लाभ्यः॑ । त्वा॒ । ओष॑धीभ्य॒ इत्योष॑धि - भ्यः॒ । इति॑ । आ॒ह॒ । तस्मा᳚त् । ओष॑धयः । फल᳚म् । गृ॒ह्ण॒न्ति॒ । यत् । हस्ते॑न ।