ब्रह्मवा॒दिनो॑ वदन्ति होत॒व्यं॑ दीक्षि॒तस्य॑ गृ॒हा(3) इ न हो॑त॒व्या(3)मिति॑ ह॒विर्वै दी᳚क्षि॒तो यज्जु॑हु॒याद्-यज॑मानस्याव॒दाय॑ जुहुया॒द्-यन्न जु॑हु॒याद्-य॑ज्ञ्प॒रुर॒न्तरि॑या॒द्ये दे॒वा मनो॑जाता मनो॒युज॒ इत्या॑ह प्रा॒णा वै दे॒वा मनो॑जाता मनो॒युज॒स्तेष्वे॒व प॒रोक्षं॑ जुहोति॒ तन्नेव॑ हु॒तं नेवाहु॑तꣳ स्व॒पन्तं॒ ॅवै दी᳚क्षि॒तꣳ रक्षाꣳ॑सि जिघाꣳसन्त्य॒ग्निः- [ ]
पदपाठः (Word-by-word)
ब्र॒ह्म॒वा॒दिन॒ इति॑ ब्रह्म - वा॒दिनः॑ । व॒द॒न्ति॒ । हो॒त॒व्य᳚म् । दी॒क्षि॒तस्य॑ । गृ॒हा(3) इ । न । हो॒त॒व्या(3)म् । इति॑ । ह॒विः । वै । दी॒क्षि॒तः । यत् । जु॒हु॒यात् । यज॑मानस्य । अ॒व॒दायेत्य॑व - दाय॑ । जु॒हु॒या॒त् । यत् । न । जु॒हु॒यात् । य॒ज्ञ्॒प॒रुरिति॑ यज्ञ् - प॒रुः । अ॒न्तः । इ॒या॒त् । ये । दे॒वाः । मनो॑जाता॒ इति॒ मनः॑ - जा॒ताः॒ । म॒नो॒युज॒ इति॑ मनः-युजः॑ । इति॑ । आ॒ह॒ । प्रा॒णा इति॑ प्र - अ॒नाः । वै । दे॒वाः । मनो॑जाता॒ इति॒ मनः॑ - जा॒ताः॒ । म॒नो॒युज॒ इति॑ मनः - युजः॑ । तेषु॑ । ए॒व । प॒रोक्ष॒मिति॑ परः - अक्ष᳚म् । जु॒हो॒ति॒ । तत् । न । इ॒व॒ । हु॒तम् । न । इ॒व॒ । अहु॑तम् । स्व॒पन्त᳚म् । वै । दी॒क्षि॒तम् । रक्षाꣳ॑सि । जि॒घाꣳ॒॒स॒न्ति॒ । अ॒ग्निः ।